2 Makani 18 - Baibo Busansulushi Bwa Libuku Ili

Mikaya mulaluki mbwaakacenjesha Aabu

¹ Ono Jeoshafati mwaami wa bene Juda wakabila abuumbi akuba abulemu. Mpeeke wakapanga bushicibusa aAabu mukubamba cikwati pakati ka wamuŋanda yakwe awamuŋanda yakwe Aabu mwaami wa bene Isilaeli.

² Ndipakeenda myaaka iinji, Jeoshafati wakanyamuka kuya kundabala inene ya Samaliya mukufwakashisha Aabu. Mukulemeka Jeoshafati abantu abo mbwaakalingaabo, mwaami Aabu wakabacaila mbelele shiinji aŋombe ayi basekelele akunyengelela Jeoshafati ayi akayaakwe mukulwana ndabala inene ya Lamoti mucishi ca Gilyadi.

³ Lyalo Aabu wakeepusha Jeoshafati ayi, “Sa teshi uye anebo mukulwana ndabala ya Lamoti.” Jeoshafati wakakumbula ayi, “Ndilibambite na webo walibambila. Bashilumamba bangu boonse balilibambite kuyaanu mukulwana.”

⁴ Ono Jeoshafati wakaamba alimwi ayi, “Atutaangune twiipushe Mwaami Lesa.”

⁵ Mpeeke Aabu wakeeta balaluki bakalinga mpashi myaanda yone akubeepusha ayi, “Sa nje nkalwaane ndabala ya Lamoti nabi na sobwe?” Balaluki bakakumbula ayi, “Kamuya mukalwaane. Mwaami Lesa utoomucafwa kwaamba ayi mukome.”

⁶ Sombi Jeoshafati wakeepusha ayi, “Sa taaku mulaluki aumwi ngweenga tweepushilaamo Mwaami Lesa mbwaatooyeeya?”

⁷ Aabu wakakumbula ayi, “Nkwaali womwi wiitwa ayi Mikaya mwanaakwe Imila. Sombi nebo ndimupatite mukwiinga lyoonse taalaluki shintu shibotu pali ndime, sombi sheenka shibiibi.” Jeoshafati wakamukumbula ayi, “Tooelete kwaamba boobo!”

⁸ Lyalo Aabu mwaami wa bene Isilaeli wakeeta wacinenenene wakwe womwi akumwaambila ayi aye akeete Mikaya cakufwambaana.

⁹ Bamaami boonse bobilo bakalinga kufwete mingaanjo yabo ya bwaami kabashiite pashuuna sha bwaami, palubansa lwakulupwitaawo kufwaafwi amwinjililo wa ndabala ya Samaliya. Balaluki abo bakalinga kulaluka kunembo lyabo.

¹⁰ Mulaluki umwi Sedekiya mwanaakwe Kenaana wakapanga meeca anshimbi akulwiita Aabu ayi, “Mwaami Lesa waamba ayi, ‘Mulaakulwana bene Silya anga ngumucende ucite meeca anshimbi akubakoma.’ ”

¹¹ Balaluki bamwi boonse bakaamba makani ngomunya aya ayi, “Kamuya mukalwane bene Lamoti alimwi mulaakubakoma. Mwaami Lesa ulaakumupa coolwe cakukoma.”

¹² Paciindi ceenka ico wacinenenene uyo wakalinga kuya mukwiita Mikaya wakamwaambila ayi, “Balaluki bamwi boonse balaluka kale shakuswitilila kwa mwaami, awebo waambe bweenka ubo.”

¹³ Sombi Mikaya wakakumbula ayi, “Bweenka mbocibete lushinisho ayi Mwaami Lesa ngumuumi, mbweeke ubo ntoobalwiitabo sheenka nsheshi andwiite!”

¹⁴ Mpeeke mulaluki ndyaakashika mukubonekela kumwaami Aabu, mwaami wakamwiipusha ayi, “Mikaya, sa nebo amwaami Jeoshafati tuye tukalwaane ndabala ya Lamoti nabi sobwe?” Mikaya wakakumbula ayi, “Kamuya mukalwaane! Ee, mulaakwiikoma. Mwaami Lesa ulaakumupa coolwe cakukoma.”

¹⁵ Sombi Aabu wakaamba ayi, “Na utoondwiita cikani muliina lya Mwaami Lesa, aamba calushinisho! Ulisuni nkaambe mankanda ongaye pacikani ici?”

¹⁶ Lyalo Mikaya wakaamba ayi, “Ntoobona bashilumamba bene Isilaeli bapalangene patulundu anga nimbelele shitacite mweembeshi. Ono Mwaami Lesa waamba ayi, ‘Aba bantu tabacite mutanjilili, amubaleeke baye kumishaabo muluumuno.’ ”

¹⁷ Mpomunyaawo Aabu wakaambila Jeoshafati ayi, “Sa nshikwe kukulwiita ayi uyu taalalukiwo shibotu pali ndime? Lyoonse ulalalukabo sheenka shibiibi!”

¹⁸ Mpeeke Mikaya wakatolelela kwaamba ayi, “Ono amunyumfwe makani aya! Ndakabona Mwaami Lesa kaashiite pacuuna ca bwaami kwiculu abaanjelo bakwe boonse kabeemfwi kushinguluka nguwe.

¹⁹ Mwaami Lesa wakeepusha ayi, ‘Ngani eshi akacenjeeke Aabu kwaamba ayi akacaikwe kuLamoti?’ Baanjelo bamwi bakaamba cikani comwi, ingayi bamwi bakaamba cimbi

²⁰ kushikila mushimu wakesa kunembo lya Mwaami Lesa akwaamba ayi, ‘Ntooya nkamucenjeeke.’ Mwaami Lesa wakeepusha ayi, ‘Ulaakumucenjeeka buyani?’

²¹ Mushimu wakakumbula ayi, ‘Ndaakuya mukulengesha balaluki bakwe Aabu kwaamba shabubeshi.’ Mwaami Lesa wakaamba ayi, ‘Koya ukamucenjeeke. Ulaakucikonsha.’ ”

²² Lyalo Mikaya wakamanisha akwaamba ayi, “Mbwaabete makani ubo. Mwaami Lesa waambila balaluki banu ayi bamubece. Lakwe mwiine wapingula kale ayi mutookwiinda mushinkunka!”

²³ Lyalo mulaluki Sedekiya mwanaakwe Kenaana wakaya kuli Mikaya, wamuuma lupaka pameenso akumwiipusha ayi, “Mushimu wa Mwaami Lesa wakaswaawo lili muli ndime akwisa mukwaamba awebo?”

²⁴ Mikaya wakakumbula ayi, “Ulaakwishiba na ukaye mukuyuba mucipinda ca mukati ka ŋanda.”

²⁵ Mpeeke mwaami Aabu wakaambila wacinenenene wakwe umwi ayi, “Amucate Mikaya mumutole kuli Amoni, mweendeleshi wa ndabala inene iyi alimwi akuli Joashi mwanaamwaami.

²⁶ Muye mukabalwiite bamubike muntolongo akunoomupa shinkwa amaanshi kushikila ndaakuboola kaancili muumi.”

²⁷ Mikaya wakaamba ayi, “Na mulaakuboola kamuli boomi, nkokwaamba ayi anu Mwaami Lesa taakwe kwaamba muli ndime!” Mpeeke wakatolelela kwaamba ayi, “Ishi nshendaamba mushilabilile noonse!”

Kufwa kwakwe Aabu

²⁸ Mpomunyaawo Aabu mwaami wa bene Isilaeli aJeoshafati mwaami wa bene Juda bakaya mukulwana ndabala ya Lamoti mucishi ca Gilyadi.

²⁹ Aabu wakaambila Jeoshafati ayi, “Twatalika kulwana ntoolilubyalubya, sombi webo ufwale mungaanjo wa bwaami.” Lyalo mwaami wa bene Isilaeli wakalinga kulwana kabatamwishi ayi ngumwaami.

³⁰ Ono mwaami wa bene Silya wakaambila bamatanjilili ba bashilumamba balwanina mushikoci ayi batayi mukucaya umwi, sombibo mwaami wa bene Isilaeli.

³¹ Lyalo ndibakabona mwaami Jeoshafati, balo boonse bakayeeya ayi ngomwaami wa bene Isilaeli. Lyalo bakapiluluka akuyanda kumucaya. Sombi ndyaakoolobesha, Mwaami Lesa wakamufuna akubasoonosha kuli nguwe

³² mukwiinga ndibakabona ayi teshi mwaami wa bene Isilaeli, bakacileka kumulwana.

³³ Nakubi boobo shilumamba umwi mwine Silya wakawaala mufwi ciwaalewaale akuyasa mwaami Aabu pakati kamanungilo a shakufwala shakwe sha nkondo. Wakoolobesha kuli shikweensha cikoci cakwe ayi, “Maawe wanjasa! Piluluka tusweemo munkondo.”

³⁴ Nkondo yakakalala kushikila macolesha. Muciindi ico mwaami Aabu lakwe wakalinga kunootandabetebo mucikoci cakwe kaalangene abene Silya. Ingayi macolesha wakafwa.