2 Makani 17 - Baibo Busansulushi Bwa Libuku Ili

Jeoshafati mbwaakaba mwaami

¹ Jeoshafati mwanaakwe musankwa ngowakapyana bwaami bwa baishi baAsa akuyumya bwaami bwakwe mukulitabilila kubene Isilaeli.

² Wakabika bashilumamba mumandabala oonse a bene Juda ayo akalinga kucite malinga, mandabala amwi a mucishi ca Juda alimwi amumandabala ayo Asa ngwaakakoma mucishi ca Efuleemu.

³ Mwaami Lesa wakapa coolwe Jeoshafati mukwiinga wakakonkela nshila shitaanshi sha baishi. Taakalinga kulambila Baali.

⁴ Wakasebensela Lesa wa baishi akukonkela milawo yakwe. Taakwe kukonkela bwakalinga kucita bene Isilaeli.

⁵ Mwaami Lesa wakayumya bwaami bwakwe Jeoshafati. Bene Juda bakalinga kumuletela shipo, cakwaamba ayi alakwe wakaba mubile alimwi wakalinga kulemekwa abuumbi.

⁶ Wakalinga kusebensela Mwaami Lesa camoyo woonse alimwi wakanyonyoola misena yakulambililaako ya patulundu akutimboola shikoshanyo shakwe Ashela muJuda.

⁷ Mumwaaka watatu wa bwaami bwakwe, Jeoshafati wakatuma bacinenenene kwaamba ayi baye bakeeishe mumandabala a mucishi ca Juda. Wakatuma Beni Ailu, Obadiya, Sekaliya, Netanelo alimwi aMikaya.

⁸ Bakaya abene Lefi bosanwe abone abapailishi bobilo. Bene Lefi mbobakayaabo nguShemaya, Netaniya, Sebadiya, Asayelo, Shemilamoti, Jeonatani, Adonija, Tobija alimwi aTobadonija abalo bapailishi bakalinga Elishama aJeolamu.

⁹ Bakabwesa libuku lya Milawo ya Mwaami Lesa akuyaalyo mumandabala oonse muJuda kuya ciisha shakalinga mulibuku ilyo kubantu.

Bulemu bwakwe Jeoshafati

¹⁰ Mwaami Lesa wakalengesha bamushishi shakalinga kushingulukite cishi ca Juda kuba aboowa kulwana mwaami Jeoshafati.

¹¹ Bene Filisiti bamwi bakaletela Jeoshafati silifa uunji ashipo shimwi. Abalo baAlabu bakamuletela mbelele shili 7,700 ampongo shili 7,700.

¹² Kuswawaawo Jeoshafati wakatolelela kuya ciba ankusu. Mucishi ca Juda coonse wakayaka malinga amandabala anene

¹³ umo mobakalinga kusungila shintu shiinji abuumbi. MuJelusalemu wakabikaamo bashilumamba bacibwene kulwana

¹⁴ kweelana ashipani shabo. Adina ngowakalinga mutanjilili wa bashilumamba ba mushipani sha bene Juda. Wakalinga kutanjilila bashilumamba bali 300,000.

¹⁵ Wakuboolaawo nguJeowanani. Lakwe wakalinga kutanjilila bashilumamba bali 280,000.

¹⁶ Wakuboolaawo nguAmasiya mwanaakwe Sikili. Amasiya wakalinga kutanjilila bashilumamba bali 200,000. Amasiya uyo wakalibenga kusebensela Mwaami Lesa.

¹⁷ Mutanjilili wa bashilumamba ba mushipani sha bene Benjameni wakalinga Eliyada, shilumamba wakalinga kucibwene kulwana. Lakwe wakalinga kutanjilila bashilumamba bali 200,000 abo bakalinga kupakete mayawo amata.

¹⁸ Wakuboolaawo nguJeosabadi uyo wakalinga kutanjilila bashilumamba bali 180,000 abo bakalinga kucite shakulwanisha shibotu.

¹⁹ Aba mbobashilumamba bakasebensela mwaami muJelusalemu. Wakabika bashilumamba bamwi mumandabala amwi akalinga kucite malinga mucishi ca Juda.