2 Makani 16 - Baibo Busansulushi Bwa Libuku Ili

Bene Isilaeli mbobakapensha Asa

¹ Mumwaaka wa makumi otatwe amyaaka yosanwe awomwi wa bwaami bwakwe Asa mwaami wa bene Juda, Baasha mwaami wa bene Isilaeli wakesa mukulwana bene Juda. Wakayaka lilinga kushinguluka ndabala ya Lama akubika bashilumamba muli njiyo kwaamba ayi taaku muntu weenga wenjila nabi kuswa mucishi ca bene Juda.

² Mpeeke mwaami Asa wakabwesa silifa alimwi agolodi shoonse isho shakacaala muŊanda yakwe Lesa alimwi amuŋanda ya bwaami washituma kuDamasikasi. Wakashituma kuli Benadadi mwaami wa bene Silya pantu pomwi ankoombe yakwaamba ayi,

³ “Atupangane bushicibusa bweenka bamashali besu mbobakacita. Silifa alimwi agolodi iyo ncipo kuli ndimwe. Ono amucileeke kunyumfwana amwaami Baasha mwine Isilaeli kwaamba ayi akushe bashilumamba bakwe mucishi cangu.”

⁴ Mwaami Benadadi wakasumina shaakaamba Asa akutuma bashilumamba abamatanjilili babo ayi baye balwane mandabala anene a mucishi ca Isilaeli. Bakakoma Ijoni, Dani, Abelo Beti Maaka, alimwi amandabala anene oonse mucishi cakwe Nafutali umo mwakalinga kusungilwa shakulya.

⁵ Mwaami Baasha ndyaakanyumfwa shakacitika, wakacileka kuyaka lilinga kushinguluka ndabala ya Lama.

⁶ Lyalo mwaami Asa wakabunganya bantu kuswa mucishi coonse ca Juda akubaambila ayi bayumune mabwe amapulanga ayo Baasha ngaakalinga kusebensesha kuLama. Mpeeke bakaasebensesha kuyaka malinga kundabala ya Geba alimwi aya Misipa.

Mulaluki Anani

⁷ Paciindi ico Anani mulaluki wakaya kumwaami Asa akumwaambila ayi, “Ono mukwiinga mwebo mwakacinka manungo mumwaami wa bene Silya pamusena wakucinka manungo muMwaami Lesa, Lesa wanu, bashilumamba bene Isilaeli boonse bamana kumuloboka.

⁸ Sa bene Kushi abene Libya tebakalinga kucite bashilumamba baanji, shikoci shiinji alimwi abeshikulwanina pamaaki baanji? Sombi mukwiinga mwakacinka manungo muMwaami Lesa, wakabaaba mumaansaanu.

⁹ Mwaami Lesa ulalama cishi coonse akupa nkusu kubaabo bashomeka kuli nguwe. Ono mwebo mwaciita cintu cabuluya, paceebo ceeco kuswa sunu munanoolwanabo lyoonse.”

¹⁰ Ici cakakalasha Asa abuumbi cakwaamba ayi mulaluki uyo wakamwaanga akumubika muntolongo. Ici cakalinga nceciindi Asa ndyaakatalika kupensha bantu bamwi calunkutwe.

Bwaami bwakwe Asa mbobwakamana

¹¹ Shintu shoonse shakacita Asa mubwaami bwakwe kuswa kumatalikilo kushikila akumeelelesho shililembetwe mulibuku lya bamaami ba bene Juda abene Isilaeli.

¹² Mumwaaka wa makumi otatwe amyaaka yosanwe ayone wa bwaami bwakwe, Asa wakalemana myeendo kubulwashi bwa kushimpanta. Nakubi boobo taakwe kusenga lucafwo kuMwaami Lesa, sombi wakatunaminabo beshikushilika.

¹³ Pakeendabo myaaka yobilo Asa wakafwa.

¹⁴ Asa wakabikwa mucuumbwe ncaakalipangila mwiine mulibwe ico cakalinga muNdabala yakwe Defedi. Bakasebensesha mafuta atununkila kabotu kwaamba ayi bananike mubili wakwe pakuubika. Bakakunka cibalankuni ca mulilo mukumulemeka.