2 Makani 15 - Baibo Busansulushi Bwa Libuku Ili

Asa mbwaakasandula shintu

¹ Mpeeke Mushimu wakwe Lesa wakaselukila Asaliya mwanaakwe Odedi.

² Lyalo wakaya mukukumana amwaami Asa. Wakamwaambila ayi, “NoBaami baAsa abantu banu bene Juda abene Benjameni amunkutike! Mwaami Lesa unanooli amwebo kulilabo kamuli anguwe. Na mumuyandoole mulaakumucana, sombi na mwamufutatila alakwe ulaakumufutatila.

³ Kwaciindi cilaamfu bene Isilaeli balinga kwikala kabateshi Lesa wancinencine alimwi kabatacitewo bapailishi beenga babeeisha nabi milawo.

⁴ Sombi ndibakaba amapensho, bakasandukila kuMwaami Lesa, Lesa wa bene Isilaeli. Bakamuyandoola akumucana.

⁵ Ciindi ico tekwakalinga muntu wakalinga kweenda muluumuno mukwiinga kwakalinga mapensho ashimfulunganya mushishi shoonse.

⁶ Cishi comwi cakalinga kulyatililwa acishi cimwi, ayalo ndabala yomwi yakalinga kulyatililwa andabala imwi mukwiinga Lesa wakalinga kuleta mapensho abuumba pali mbabo.

⁷ Sombi mwebo amuyume mutatyongoli. Mulaakulambulwa pancito iyi njemutoocita.”

⁸ Asa ndyaakanyumfwa kulaluka kwakwe Asaliya mwanaakwe Odedi, wakayuminishikwa. Wakanyonyoola shibumbwabumbwa shoonse sha mucishi ca Juda aca Benjameni kubikaawo ashibumbwabumbwa isho shakalinga mumandabala ayo ngwaakakoma mucishi ca tulundu ca Efuleemu. Wakayakulula cipaililo ca Mwaami Lesa ico cakalinga kunembo lya mwinjililo wa Ŋanda yakwe Lesa.

⁹ Bantu baanji bakesa kuli Asa kuswa kuEfuleemu, Manase alimwi akuSimyoni akwikala mucishi cakwe mukwiinga bakabona ayi Mwaami Lesa uli anguwe. Asa wakabunganya bantu boonse bene Juda abene Benjameni.

¹⁰ Bakabungana muJelusalemu mumweenshi watatu mumwaaka wa likumi ayosanwe wa bwaami bwakwe Asa.

¹¹ Ubo bushiku bakabenga milambu kuMwaami Lesa kuswa pashintu isho nshebakasaala. Bakabenga ŋombe shili 700 ambelele shili 7,000.

¹² Bakapanga cipangano ico ncebakasuminishanya kwaamba ayi banoolambila Mwaami Lesa, Lesa wa bamashali babo bakulukulu camoyo woonse abuumi bwabo boonse.

¹³ Uli woonse, mwaana nabi munene, musankwa nabi mwanakashi weshi akabule kulambila Mwaami Lesa, Lesa wa bene Isilaeli, ulaakucaikwa.

¹⁴ Muliswi lya peculu bakashomesha cakulumbila muliina lya Mwaami Lesa ayi balaakunoolama cipangano. Lyalo bakoolobesha akulisha mapeenga.

¹⁵ Bene Juda boonse bakalinga kukondetwe mukwiinga bakapanga cipangano amyoyo yabo yoonse. Bakalambila Mwaami Lesa cakusangalala alimwi alakwe wakabatambula akubapa luumuno kumbasu shoonse.

¹⁶ Mwaami Asa wakakusha bankambiyakwe banakashi baMaaka pacuuna cabo kuŋanda ya kubwalo mukwiinga bakalinga bapanga cikoshanyo cilensha bunya cakwe lesa mwanakashi Ashela. Asa wakacitimbula akucitenta muCinyika ca Kidiloni.

¹⁷ Nacibi kwaamba ayi Asa taakwe kunyonyoola misena yoonse yakulambililaako ya patulundu, wakalinga kushomeka kuMwaami Lesa mubuumi bwakwe boonse.

¹⁸ Wakabika shintu shoonse baishi nshebakabenga kuli Lesa ayi shilisalalite muŊanda yakwe Lesa. Wakabikaamo ashintu sha golodi asilifa isho nshaakabenga lakwe mwiine kuli Lesa.

¹⁹ Tekwakalingawo nkondo kushikila mumwaaka wamakumi otatwe amyaaka yosanwe mubwaami bwakwe Asa.