2 Makani 14 - Baibo Busansulushi Bwa Libuku Ili

Asa mwaami wa bene Juda

¹ Abija wakafwa akubikwa kushuumbwe sha bamaami muNdabala inene yakwe Defedi. Lyalo Asa mwanaakwe ngowakapyana bwaami bwakwe. Mubwaami bwakwe Asa, cishi cakalinga muluumuno kwamyaaka likumi.

² Asa wakacita shakakonda Mwaami Lesa, Lesa wakwe mukucita shintu shiluleme ashibotu.

³ Wakakushamo shipaililo sha bakunsengwe, kunyonyoola misena yakulambililaako ya patulundu, kupwaya macinko asalalite akutimboola shikoshanyo shakwe Ashela lesa mwanakashi.

⁴ Wakaambila bantu ayi banoolambilabo Mwaami Lesa, Lesa wa bamashali babo akulama milawo amilasho yakwe.

⁵ Ono ceebo cakwaamba ayi wakanyonyoola misena yakulambililaako ya patulundu alimwi ashipaililo shakutentelaawo tununkila kabotu mumandabala a bene Juda oonse, cishi cakalinga muluumuno mubwaami bwakwe boonse.

⁶ Muciindi ico wakayaka mandabala mucishi ca Juda akalinga kucite malinga. Kwamyaaka iinji tekwakalingawo nkondo mukwiinga Mwaami Lesa wakamupa luumuno.

⁷ Lyalo Asa wakaambila bene Juda ayi, “Atuyumye mandabala aya mukuyakilaako malinga, maanda alaamfu a beshikulindilila, minjililo alimwi ampingilo sha sheela. Tulicite nkusu shakweendelesha cishi ici mukwiinga twacita kuyanda kwa Mwaami Lesa, Lesa wesu. Wakatufuna akutupa luumuno kumbasu shoonse.” Aboobo bakayaka akuswitilila.

⁸ Mwaami Asa wakalinga kucite likoto lya bashilumamba bene Juda bali 300,000 abo bakalinga kucite mayawo anene amasumo. Wakalinga kucita alikoto lya bashilumamba bene Benjameni bali 280,000 abo bakalinga kucite mayawo amaata. Boonse aba bakalinga bashilumamba bacibwene kulwana.

⁹ Kwakalinga Sela mwine Kushi uyo wakesa mukulwana cishi ca Juda abashilumamba bali 1,000,000 ashikoci shili 300. Wakashika akuMalesha.

¹⁰ Asa wakaya mukumulwana. Lyalo makoto a bashilumamba oonse obilo bakalibamba mumisena yakulwanina muCinyika ca Sefata kufwaafwi akuMalesha.

¹¹ Asa wakapaila kuMwaami Lesa, Lesa wakwe ayi, “NoBaami bangu, mwebo inga mwacafwa bashilumamba balefukite bweenka mbweenga mwacafwa bashilumamba beshinkusu. Amutucaafwe swebo bulya noBaami baLesa, baLesa besu mukwiinga twacinka manungo muli ndimwe alimwi twesa mukulwana bashilumamba baanji beshinkusu muliina lyanu. NoBaami baLesa mwebo muli baLesa besu, taaku weenga wamukoma mwebo.”

¹² Mwaami Lesa wakakoma bashilumamba bene Kushi, Asa abene Juda ndibakabalwana. Bakacica,

¹³ alakwe Asa abashilumamba bakwe bakabakonkela kuya mukushika kuGela. Bene Kushi baanji bakacaikwa cakwaamba ayi tabakwe kucikonsha kulibungabunga ayi balwane alimwi. Mwaami Lesa abashilumamba bakwe bakabakoma, mpeeke bashilumamba abo bakasaala shintu shiinji.

¹⁴ Lyalo bakanyonyoola mishi yoonse yakalinga kushingulukite ndabala ya Gela mukwiinga bantu boonse bakalinga kwikala mumo bakaloonda Mwaami Lesa. Bashilumamba bakasaala mishi yoonse iyo akubwesa shintu shiinji.

¹⁵ Bakalwana misumba ya beembeshi akubwesa mbelele shiinji pantu pomwi angamela. Lyalo bakaboolela kuJelusalemu.