2 Makani 13 - Baibo Busansulushi Bwa Libuku Ili

Abija mbwaakalwana Jeloboamu

¹ Mumwaaka walikumi ayosanwe amyaaka yotatwe wa bwaami bwakwe Jeloboamu mucishi ca Isilaeli, Abija wakaba mwaami wa cishi ca Juda.

² Wakalela kwamyaaka yotatwe muJelusalemu. Abija wakalinga mwanaakwe Mikaya uyo wakalinga mwanaakwe Uliyelo mwanakashi. Uliyelo wakalinga kuswa kundabala inene ya Gibiya. Ono nkondo yakabuka pakati kakwe Abija alimwi aJeloboamu.

³ Abija wakabwesa bashilumamba bacibwene bakalinga 400,000 alakwe Jeloboamu wakabwesa bashilumamba bacibwene bakalinga 800,000.

⁴ Abija wakeemikana paKalundu ka Semalaimu mucishi ca tulundu ca Efuleemu akwaamba ayi, “Webo Jeloboamu anobene Isilaeli, amunkutike!

⁵ Sa tamwishi kwaamba ayi Mwaami Lesa, Lesa wa bene Isilaeli wakapa Defedi abamulunyungu lwakwe bwaami bwa bene Isilaeli kwalyoonse alyoonse mucipangano citakoonshi kupwaikwa?

⁶ Nakubi boobo Jeloboamu mwanaakwe Nebati, wacinenenene wakwe Solomoni mwanaakwe Defedi, wakabukila mwaami wakwe.

⁷ Wakabunganya bantu bataaku mbobabete batanyumfwi abo bakakakatisha Leoboamu mwanaakwe Solomoni kucita mbobakalinga kusuni. Paciindi ico Leoboamu wakalinga mwanike alimwi kaatacite lushibo kwaamba ayi abakakile.

⁸ “Ono bulya mulisuni kulwana bwaami bwa Mwaami Lesa ubo mbwaakabika mumaansaakwe Defedi abamulunyungu lwakwe. Mulicite bashilumamba baanji alimwi mulicite abacende baana ba golodi abo Jeloboamu mbwaakabumba kwaamba ayi babe balesa banu.

⁹ Mwakatandaanya bapailishi ba Mwaami Lesa, bamulunyungu lwakwe Aloni pantu pomwi abene Lefi. Mumusena wabo mwakabikaamo bapailishi baanu nobeene bweenka bucita bantu bamumishobo imwi. Uli woonse weenga waleta mucende alimwi ambelele shisankwa shili shosanwe ashobilo mulamupa mulimo wa bupailishi bwa balesa banu abo bateeshi balesa bancinencine.

¹⁰ “Sombi swebo Mwaami Lesa, ngoLesa wesu alimwi tatumushiiyi. Tulicite bapailishi ba mulunyungu lwakwe Aloni mbobasebensela Mwaami Lesa akucafwikwa abene Lefi.

¹¹ Lyoonse macuunsa amacolesha balabenga milambu yakutenta aya tununkila kabotu kuMwaami Lesa. Balabika shimaande patebulu iyo Isalalite kweelana aMilawo alimwi macolesha oonse balanyansha malampi ali pashakwaabikaawo sha golodi. Swebo tulakonkela mbwaakatwaambila Mwaami Lesa, sombi mwebo mwakamushiya.

¹² Lesa mwiine ngomutanjilili wesu, anaaba bapailishi mpobali amapeenga. Batookwaalisha kwaamba ayi tumulwaane. Nobene Isilaeli tabalwaani Mwaami Lesa, Lesa wa bamashali banu bakulukulu! Inga tamuswitililiiwo, sobwe!”

¹³ Lyalo Jeloboamu wakatuma bashilumamba ayi bamwi balwane bene Juda kwisule, bamwi kunembo lyabo.

¹⁴ Bene Juda bakabona kwaamba ayi babashinguluka. Mpeeke bakalilila Mwaami Lesa ayi abacaafwe. Mpomunyaawo bapailishi bakalisha mapeenga.

¹⁵ Lyalo bene Juda bakacita ciyobeyobe ca nkondo akulwana mubutanjilili bwakwe Abija. Mpomunyaawo Lesa wakakoma mwaami Jeloboamu abashilumamba bene Isilaeli.

¹⁶ Aboobo bene Isilaeli bakacica kuswa kubene Juda mukwiinga Lesa wakabaaba mumaansa a bene Juda.

¹⁷ Abija abashilumamba bakwe bakacaya bashilumamba bene Isilaeli baanji, nkokwaamba ayi bakacaya bashilumamba bali 500,000 bacibwene kulwana.

¹⁸ Munshila iyi bene Juda bakakoma bene Isilaeli mukwiinga bakalinga kucinkite manungo muMwaami Lesa, Lesa wa bamashali babo bakulukulu.

¹⁹ Mpeeke Abija wakakonkela Jeloboamu akubwesa mandabala amwi akwe mbuli Betelo, Jeshana, Efuloni alimwi amishi yakalinga kushingulukite mandabala anene ayo.

²⁰ Kuswawaawo Jeloboamu taakwe kubooshawo bwaami bwakwe ciindi Abija ndyaakalinga kulela. Lyalo Mwaami Lesa wakapa Jeloboamu mulandu, mpeeke wakafwa.

²¹ Sombi Abija wakaba ankusu shiinji. Wakalinga kucite bamakaakwe bali likumi abone alimwi wakashala bana basankwa bali makumi obilo abobilo abaana banakashi bali likumi abosanwe awomwi.

²² Shintu shimwi shoonse shakaamba ashakacita Abija shililembetwe mulibuku lyakwe Ido mulaluki.