2 Makani 12 - Baibo Busansulushi Bwa Libuku Ili

Bene Ijipiti mbobakalwana bene Juda

¹ Kuswabo bwaami bwakwe Leoboamu ndibwakayuma, lakwe abantu bakwe bene Isilaeli bakacileka kukonkela Milawo ya Mwaami Lesa.

² Ono mukwiinga bantu aba bakacileka kushomeka kuMwaami Lesa, Shishaki mwaami wa bene Ijipiti wakalwana bene Jelusalemu mumwaaka wasanu wa bwaami bwakwe Leoboamu.

³ Wakalinga kucite shikoci shili 1,200, beshikulwanina pamaaki bali 60,000 abashilumamba bene Libya, Sukuti abene Kushi batakonsheki kubelengwa. Bashilumamba abo bakaswa kucishi ca Ijipiti.

⁴ Wakabwesa mandabala akalinga kucite malinga a bene Juda kwisa mukushika akuJelusalemu.

⁵ Lyalo Shemaya mulaluki wakaya kuli Leoboamu akubamatanjilili ba bene Juda abo bakabungana muJelusalemu ceebo cakuloonda Shishaki. Mpeeke wakabaambila ayi, “Mwaami Lesa waamba ayi, ‘Mwanshiiya, aboobo anebo ntoomushiya mukumwaaba kuli Shishaki.’ ”

⁶ Bamatanjilili ba bene Isilaeli pantu pomwi amwaami wabo bakaliceesha akwaamba ayi, “Mwaami Lesa uliluleme.”

⁷ Ono Mwaami Lesa ndyaakabona ayi bantu abo baliceesha, wakaambila Shemaya alimwi ayi, “Ono ceebo cakwaamba ayi baliceesha, teshi mbanyonyooleewo. Sombi ntoobafuna ca onoono. Bene Jelusalemu teshi bakanyumfwewo cilemeneshi ca bukali bwangu kwiinda muli Shishaki.

⁸ Nakubi boobo balaakuba mumaansaakwe Shishaki kwaamba ayi bakeshibe kupusana kuli pakati ka kusebensela ndime alimwi apakusebensela bamaami ba shishi shimwi sha panshi.”

⁹ Shishaki mwaami wa bene Ijipiti ndyaakalwana Jelusalemu wakabwesa shintu shamakwebo shoonse sha muŊanda yakwe Lesa alimwi amuŋanda ya mwaami, pantu pomwi amayawo a golodi ayo Solomoni ngaakapanga.

¹⁰ Mukuboosheshaawo, mwaami Leoboamu wakapanga mayawo amwi a bulonse akwaabika mumaansa a bamatanjilili babeshikulindilila kuminjililo ya kuŋanda ya bwaami.

¹¹ Lyoonse mwaami na utooya kuŊanda yakwe Lesa beshikulindilila bakalinga kwaanyamuna. Lyalo na wamanisha bakalinga kwaaboosha muŋanda ya beshikulindilila.

¹² Ceebo cakwaamba ayi Leoboamu wakaliceesha, Mwaami Lesa wakabooshaamo moyo pali nguwe. Lyalo taakwe kunyonyoola bwaami bwakwe cakumaninina. Ncakwiila mwakaba luumuno muJuda.

Shakulela kwakwe Leoboamu mubufwaafwi

¹³ Bwaami bwa mwaami Leoboamu bwakayuma abuumbi muJelusalemu alimwi wakalela kwaciindi cilaamfu. Wakalinga kucite myaaka makumi one awomwi ndyaakaba mwaami alimwi wakalela myaaka likumi ayosanwe ayobilo muJelusalemu, ndabala inene iyo Mwaami Lesa njaakasala pakati ka mikowa yoonse ya bene Isilaeli ayi ibe musena mweshi anoolambililwa. Leoboamu wakalinga mwanaakwe Naama, mwanakashi mwine Amoni.

¹⁴ Wakabisha mukwiinga taakwe kukonkela Mwaami Lesa amoyo wakwe woonse.

¹⁵ Shintu shoonse shimwi shakacita Leoboamu mubwaami bwakwe kuswa kumatalikilo kushikila kumeelelesho, shililembetwe mulibuku lyakwe Shemaya mulaluki amulibuku lyakwe Ido mulaluki. Muciindi coonse ico mwaami Leoboamu amwaami Jeloboamu bakalingabo mbeshikulwana.

¹⁶ Leoboamu wakafwa akubikwa kushuumbwe sha bamaami muNdabala inene yakwe Defedi. Lyalo Abija mwanaakwe wakapyana bwaami bwakwe.