2 Makani 11 - Baibo Busansulushi Bwa Libuku Ili

Kulaluka kwakwe Shemaya

¹ Ono Leoboamu ndyaakashika muJelusalemu, wakabunganya bashilumamba bali 180,000 kuswa mumukowa wa bene Juda awa bene Benjameni. Wakalinga kusuni kuya mukulwana mikowa ya bene Isilaeli yakumatwa kwaamba ayi abooshe bwaami bwakwe pamikowa iyo.

² Sombi Lesa wakaambila mulaluki Shemaya ayi

³ aambe maswi aya kuli Leoboamu mwanaakwe Solomoni mwaami wa bene Juda akubantu boonse bene Juda abene Benjameni ayi,

⁴ “Mutalwani bene Isilaelinyinaanu. Kamuya kumishaanu noonsebo. Ico cacitika mukuyanda kwangu.” Lyalo boonse bakanyumfwila shakaamba Mwaami Lesa. Aboobo tabakwe kuya mukulwana Jeloboamu.

Leoboamu mbwaakayaka malinga kumandabala anene

⁵ Leoboamu wakalinga kwikala muJelusalemu alimwi wakayaka malinga kumandabala a mucishi ca Juda aca Benjameni aya:

⁶ Betileemu, Etamu, Tekowa,

⁷ Beti Suli, Soko, Adulamu,

⁸ Gati, Malesha, Sifi,

⁹ Adolaimu, Lakishi, Aseka,

¹⁰ Sola, Aijaloni alimwi aEbuloni. Aya ngomandabala ayo akabikwa malinga mucishi ca Juda aca Benjameni.

¹¹ Wakayaka malinga ayumu abuumbi kumandabala aya akubika mutanjilili wa bashilumamba mundabala yomwi ayomwi. Wakabikaamo ashakulya shiinji, mafuta a olifi alimwi awaini.

¹² Shimwi nshaakabikaamo ngamayawo amasumo. Munshila iyi wakalengesha cishi ca Juda aca Benjameni kuba mumaansaakwe.

Bapailishi abene Lefi mbobakesa kuJuda

¹³ Kuswa mucishi ca Isilaeli coonse bapailishi abene Lefi bakaya kulubasu lwakwe Leoboamu.

¹⁴ Bene Lefi bakashiya mafulo amyuunda yabo akuya mukwikala muJuda amuJelusalemu mukwiinga mwaami Jeloboamu abakapyana bwaami bwakwe tebakalinga kubasuminisha kuba bapailishi ba Mwaami Lesa.

¹⁵ Jeloboamu wakasala bapailishi bakwe mwiine ayi banoosebensela pamisena yakulambililaako ya patulundu apa shibumbwabumbwa sha mpongo asha mucende mwaana isho nshaakabumba.

¹⁶ Kuswawaawo bene Isilaeli boonse bakalinga kusuni kulambila Mwaami Lesa, Lesa wa bene Isilaeli, bakakonkela bene Lefi kuya kuJelusalemu kwaamba ayi bakabenge milambu kuMwaami Lesa, Lesa wa bamashali babo bakulukulu.

¹⁷ Aba bakayuminisha bwaami bwa bene Juda. Bakalinga kucafwa Leoboamu mwanaakwe Solomoni kwamyaaka yotatwe akwikala bweenka mbobakalinga kwikala mubwaami bwakwe Defedi alimwi abwakwe Solomoni.

Bamuŋanda yakwe Leoboamu

¹⁸ Leoboamu wakeeba Maalati mwanaakwe Jelimoti mwishikulu wakwe Defedi. Maalati wakalinga mwanaakwe Abiyailo uyo wakalinga mwanaakwe Elyabu mwanakashi, mwishikulu wakwe Jese.

¹⁹ Bakashala baana basankwa botatwe, nkokwaamba ayi Jeyushi, Shemaliya alimwi aSaamu.

²⁰ Kuboolaawo wakeeba Maaka mwanaakwe Abusalomu. Mpeeke bakashala baana basankwa bone, nkokwaamba ayi Abija, Atayi, Sisa alimwi aShelomiti.

²¹ Pantu pomwi wakalinga kweebete banakashi bali 18 kubikaawo abakasuwa bali 60. Wakashala baana basankwa bali 28 kubikaawo abaana banakashi bali 60. Pakati ka bamakaakwe boonse aba alimwi abakasuwa bakwe, Maaka ngwaakalinga kusunishi.

²² Aboobo apalo pabana bakwe wakalinga kusunishi Abija mwanaakwe Maaka kwiinda bamwi boonse akumusala ayi akapyane bwaami bwakwe.

²³ Mukucenjela kwakwe, Leoboamu wakapa bana bakwe milimo ipusenepusene. Wakatuma bana bakwe bamwi mushipansha sha cishi ca Juda alimwi aca Benjameni alimwi amumandabala anene akayakilwa malinga. Wakabapa buboni buunji akubeebela banakashi baanji.