2 Bene Tesalonika 1 - Baibo Busansulushi Bwa Libuku Ili

¹ Ndime Paulo pantu pomwi aSailasi alimwi aTimoti. Tutoolembela ndimwe nocoonde ca kuTesalonika nomuli mumaansaakwe Lesa Ishiwesu aMwaami wesu Jesu Klistu.

² Luse aluumuno shibe amwebo kuswa kuli Lesa Ishiwesu aMwaami Jesu Klistu.

Koombolosha kwakwe Klistu aakwisa

³ Nobamakwesu, tulyeelete kulumba Lesa ceebo canu lyoonse. Cililuleme abuumbi kuli ndiswe kulumba Lesa ceebo lushomo lwanu lwakomena abuumbi alimwi kusunana kwanu kutooya ciindaawo.

⁴ Paceebo ceeco tulikondetwe pali ndimwe mushoonde shakwe Lesa. Tulikondetwe pali ndimwe ceebo cakukomenya myoyo akutaboola pesule mulushomo kweelana aciindi ndyemuli mumapensho amakatasho.

⁵ Ishi shoonse shitootondesha calushinisho kwaamba ayi Lesa uloombolosha cabululami. Aboobo citokwaamba ayi mulyeelete kwinjila muBweene bwakwe Lesa ubo mboomutoopengela.

⁶ Lesa ulaakucita ncaaelete kucita mukwiinga ulaakulengesha kupenga abo bamupensha

⁷ alimwi ulaakulengesha mapensho anu amapensho esu kumana. Lesa ulaakucita boobo na Mwaami Jesu akaboneke kaaswa kwiculu abaanjelo bakwe bacite nkusu shiinji.

⁸ Ulaakwisa amulilo weshi ukanoobilima akutondesha bukali bwakwe kubakaka kwishiba Lesa abaabo bakaka kukonkela shaamba Makani Abotu a paMwaami wesu Jesu.

⁹ Mulandu wabo ulaakuba kunyonyooka kutamaani. Balaakupansanishikwa kuMwaami wesu Jesu alimwi abulemu bwa nkusu shakwe.

¹⁰ Shoonse ishi shilaakucitika pabushiku bunene bulya aakwisa mukutambulwa cabulemu akulumbaishikwa kubantu bakwe, nkokwaamba ayi abo boonse bashoma. Amwebo mulaakuba mulikoto lyabo ceebo mwakashoma makani ngotwakamulwiita.

¹¹ Paceebo ceeco tulamupailila lyoonse kwaamba ayi Lesa amulengeshe kuba bantu beelete kwikala buumi ubo mbwaakamwiitila. Tulapaila ayi kwiinda munkusu shakwe amulengeshe kukonsha kucita shintu shibotu nshemuyanda kucita akumanisha milimo itondesha lushomo lwanu.

¹² Mukucita boobo, liina lya Mwaami wesu Jesu lilaakupekwa bulemu ceebo canu. Amwebo ulaakumulengesha kuba abulemu. Shoonse ishi shilaakucitika ceebo ca luse lwakwe Lesa wesu alwa Mwaami Jesu Klistu.