2 Bene Kolinto 8 - Baibo Busansulushi Bwa Libuku Ili

Shipo sha bene Klistu kuli Lesa

¹ Ono nobamakwesu, tulisuni kwaamba ayi mwishibishishe shaluse Lesa ndwakatondesha shoonde sha muMakedoniya.

² Bantu ba mushoonde isho bakasunkwa abuumbi kumapensho ayo ngobakeendaamo, sombi ceebo bakalinga kusangalete lyoonse, bakalinga kupa shipo amyoyo yabo yoonse, nakubi kwaamba ayi bakalinga bakandu.

³ Bakalinga kupa kweelana ambobakalinga kukonsha. Inga ndaamba ayi bakalinga kwiindilisha ampobakalinga kukonsha.

⁴ Bakatusenga cakuyandishisha ayi tubasuminishe abalo kucafwa bashomi ba kuJudeya.

⁵ Bakacita buteshi mbotwakalinga kubayeeyela, sombi kutaanguna bakalibenga kuli Lesa, lyalo kweelana akuyanda kwakwe Lesa, bakalibenga akuli ndiswe.

⁶ Nceceeco ncetwakalwiitilisha Taitasi ayi ulyeelete kumanishisha mulimo wa luse ngwaakatalika kale pakati kanu.

⁷ Mbuli mbomwiindawo bamwi mushintu shoonse, mulushomo, mukushimikila, mulushibo, mukuyandishisha kucafwa alimwi amulusuno ndomucite pali ndiswe, ndisuni kwaamba ayi mwiindeewo bamwi amukucita mulimo uyu wa luse.

⁸ Nshintokwaamba ayi uyu ngumulawo, sombi mukwaamba shabamwi mbobasunishi kucafwa, ndisuni kubona lusuno lwanu na ndwancinencine.

⁹ Mukwiinga mwebo mulishi luse lwa Mwaami wesu Jesu Klistu. Wakalinga mubile, sombi wakaba mukandu ceebo ca ndimwe kwaamba ayi mwebo mube babile mumushimu kwiinda mubukandu bwakwe.

¹⁰ Ono makani ngakwaamba ayi ncibotu kumanisha ico ncemwakatalika mwakali. Tamukwe kutaangunabo mukucicita, sombi amukuciyandishisha.

¹¹ Anu amutolelele, mucimanishe bweenka mbomwakalinga kusunishi kucicita pakutalika. Amucite boobo ashintu nshemucite.

¹² Ceebo na mulayandishisha kupa shipo, Lesa ulaakutambula shipo shanu mukubona kwaamba ayi mwapa kweelana ambomukonsha, kuteshi sheesho nshemutacite.

¹³ Nshikwe kwaamba boobo ayi bamwi boobilwe, mwebo mulemenwe.

¹⁴ Sombi pacikani cakweelanina ndaamba ayi mwebo bulya nomucite buboni buunji, ncibotu kwaamba ayi mucafwe baabo bapengete. Lyalo mwaakupenga abalo balaakumucafwa. Ubo ndikuba kweelanina.

¹⁵ Bweenka bwaamba Malembo akwe Lesa ayi, “Uyo wakatebula shiinji taakwe kuba ashakeendilila, alakwe uyo wakatebula shiniini taakwe kubulisha.”

Taitasi ababye mbobakabwesa shipo

¹⁶ Ono aalumbwe Lesa ulengesha Taitasi kulyaaba bweenka mbotulyaaba aswebo pali ndimwe.

¹⁷ Ceebo taakwe kucitabo sheesho sheenka nshitwakamwaambila, mukwiinga wakalinga kulyaabite kale mwiine kwisa kooko.

¹⁸ Twamutuma amushominyineesu uyo ulemekwa abuumbi mushoonde shoonse ceebo ca mulimo wakwe wakushimikila Makani Abotu.

¹⁹ Kuteshibo boobo, sombi wasalwa ashoonde akutumwa kwaamba ayi tweendaakwe mumulimo wa luse ngotucite. Shoonse ishi tutooshicita mukupa bulemu Mwaami Jesu akutondesha kwaamba ayi tulisunishi kucafwa bashominyineesu bakandu.

²⁰ Tatusuni kulengesha bantu kutalika kutongooka panshila njetutokweendelesheshamo shipo shakapekwa amyoyo yoonse sha mushobo wooyu.

²¹ Ceebo tulisuni kucita shiluleme, kuteshibo pameenso aMwaami peenka, sombi akubantu.

²² Pantu pomwi ambabo twatuuma aumwi mushominyineesu musankwa. Ngumuntu ngotwakeelesha mushintu shiinji, ono twakacana kwaamba ayi ulayandishisha abuumbi kucafwa. Bulya weendaawo kuyandishisha kucafwa ceebo waba alushomo lunene muli ndimwe.

²³ Ono amwiibaluke kwaamba ayi Taitasi ngumusebenshima alimwi tulasebensela pantu pomwi mukucafwa ndimwe. Bashominyineesu bamwi abo besa anguwe, batookwiimikanina shoonde alimwi mulimo wabo ulaleta bulemu kuli Klistu.

²⁴ Amutondeshe basankwa abo ayi mulibabasuni. Shoonde shoonse shaakunyumfwa cikani ico, shilaakushinisha kwaamba ayi kumulumbaisha kwesu nkwalushinisho.