2 Bene Kolinto 4 - Baibo Busansulushi Bwa Libuku Ili

Bubile buli munongo

¹ Paceebo ceeco tatubooli pesule ceebo tulishi kwaamba ayi Lesa wakatupa mulimo uyu kwiinda munkumbu shakwe.

² Twakaleka shoonse sha bushishi shilensha nsoni. Tatuciti milimo mububeshi nabi kubika bubeshi mumaswi akwe Lesa. Sombi pameenso akwe Lesa tulaamba shalushinisho, akweelesha kulengesha bantu boonse ayi batutambule mumyoyo yabo.

³ Ceebo na Makani Abotu ngotushimikila alishisitwe, ingayi nkubaabo beenka batoosoweka.

⁴ Bantu abo tabashomi ceebo Satana uyo uli anga ngulesa pacishi ca panshi, wabika maano abo mumunshinshe. Ulabakasha kubona mumuni utoomunika pali mbabo, uyo mumuni uswa muMakani Abotu aamba shabulemu bwakwe Klistu. Klistu ngootondesha Lesa mbwaabete.

⁵ Ceebo tatushimikili shapali ndiswe sobeene, sombi shapali Jesu Klistu ayi ngoMwaami. Swebo tulalyaamba ayi tuli basebenshi banu ceebo cakwe Jesu.

⁶ Ceebo Lesa wakaamba ayi, “Akube mumuni umunika kuswa mumunshinshe.” Lesa eenkabo uyo ngoolengesha mumuni kumunika mumyoyo yesu, kwaamba ayi twishibe bulemu bwakwe bumunika pameenso akwe Klistu.

⁷ Sombi swebo tuli anga ninongo mubikitwe bubile, kwaamba ayi cishibikwe ayi nkusu shiindaawo nshetucite tashishi shesu sobeene, sombi nshakwe Lesa.

⁸ Tulapenshekwa munshila shiinji, sombi tatupwaiki. Cimwi ciindi tulatonsha, nakubi boobo tatutyongoli.

⁹ Balwani besu mbaanji, sombi tatubuli shikutucafwa. Nakubi kwaamba ayi cimwi ciindi tulacisikwa, sombi tatunyonyoolwi.

¹⁰ Lyoonse tuleenda alufu lwakwe Jesu mumibili yesu, kwaamba ayi abwalo buumi bwakwe buboneke mumibili yesu.

¹¹ Mubuumi bwesu boonse tulaboolelabo pakalindi ceebo cakwe Klistu, kwaamba ayi buumi bwakwe buboneke mumibili yesu ifwa.

¹² Nkokwaamba ayi kuli ndiswe lufu lutokweendelabo mumaansa, sombi mwebo mbuumi.

¹³ Malembo akwe Lesa alaamba ayi, “Ndakashoma, aboobo ndakaamba.” Mumushimu weenka uyo walushomo ngotucite aswebo tulaamba ceebo tulashoma.

¹⁴ Tulishi kwaamba ayi Lesa uyo wakabusha Mwaami Jesu kuswa kubafu, ulaakutubusha aswebo bweenka mbuli Jesu akututola soonse andimwe uko nkwaabete.

¹⁵ Muyeeyo wa shoonse ishi nkwaamba ayi mwebo mutambule shoolwe alimwi bweenka luse lwakwe Lesa mbolutooya cishika kubantu baanji, amipailo yakulumba itoofula mukulemeka Lesa.

Tulekala mulushomo

¹⁶ Nceceeco ncetutabooleli pesule. Nakubi kwaamba ayi mibili yesu itooya cicembela, sombi Mwaami utooya citufushishako nkusu muMushimu bushiku abushiku.

¹⁷ Aya mapensho oobu ngotutoobona teshi a ciindi cilaamfu, sombi alaakutuletela bulemu bwiindaawo abuumbi alimwi butamaani ubo buteelanishikwi amapensho oonse

¹⁸ Mukwiinga tatwiililwi shintu shiboneka, sombi isho shitaboneki. Ceebo shiboneka shilekalabo ciindi ciniini, sombi shitaboneki shilekala muyayaya.