2 Bene Kolinto 2 - Baibo Busansulushi Bwa Libuku Ili

¹ Paceebo ceeco ndakayeeya kwaamba ayi ntesi mukumufwakashisha akumupensha alimwi.

² Ceebo na ndamupensha, ngani weenga wansangalasha? Mbaabo beenka mbondapensha.

³ Ndakamulembela mbuli mbondakacita, kwaamba ayi ndaakwisa, ntakoongumanishikwi abantu abo beelete kunsangalasha. Ceebo ndashoma kwaamba ayi ndinsangalala amwebo mulasangalala.

⁴ Ndakamulembela cakuungumana akucisa moyo alimwi akulila abuumbi, kuteshi kwaamba ayi mulenshe nsoni, sombi kwaamba ayi mwishibe lusuno kukomena ndooncite pali ndimwe.

Paulo mbwaakalekelela wooyo wakabisha

⁵ Musankwa uyo wakabisha taakwe kubishisha ndime, sombi mwebo nobamwi. Nshisuni kulemya makani pamusankwa uyo wakabisha.

⁶ Ceebo baanji pakati kanu bakamupa mulandu wa mushobo wooyo kweelana akubisha kwakwe.

⁷ Ono bulya mulyeelete kumulekelela akumuyumyayumya kwaamba ayi atoongumani bunene.

⁸ Aboobo ndamusenga kwaamba ayi mutondeshe ayi ncakwiila mulimusuni.

⁹ Ndakamulembela nkalata ilya ceebo ndakalinga kusuni kumusunka na mulakonsha kunyumfwila mushintu shoonse.

¹⁰ Kulilabo muntu ngomwalekelela anebo ndamulekelela. Ceebo na ndalekelela muntu, na kaciyandika kumulekelela, Klistu ulishi kwaamba ayi ndacita boobo ceebo ca ndimwe.

¹¹ Tulishi bucenjeshi bwakwe Satana alimwi tatusuni kwaamba ayi atwiinde kumaano.

Paulo mbwaakekala paniini muTulowasi

¹² Ono ndindakashika kuTulowasi mukushimikila Makani Abotu akwe Klistu, ndakabona kwaamba ayi Mwaami wakancalwita mulyango wakusebensa.

¹³ Nakubi boobo moyo wangu tewakalinga kushiite kabotu ceebo mushomima Taitasi nshikwe kumucanaako uko. Aboobo ndakalasha bwaangu akuya kuMakedoniya.

Klistu ulatulengesha kukoma

¹⁴ Ono aalumbwe Lesa utulengesha kukoma kwiinda muli Klistu. Ulatusebensesha mukulengesha makani apali Klistu kuya koonse koonse anga mbweema bubotu.

¹⁵ Ceebo swebo tuli anga mbweema bwa tununkila kabotu pakutenta uto Jesu Klistu ntwaabenga kuli Lesa. Bweema ubo bwanyumfwika kubaabo beshi bakapulushikwe abaabo batoosowekwa.

¹⁶ Kubaabo batoosoweka, bweema ubo mbwalufu. Sombi kubaabo beshi bakapulushikwe, mbubotu alimwi bulaleta buumi. Ono ngani weelete kucita mulimo wa mushobo uyu?

¹⁷ Tatubete mbuli bamwi baanji bashimikila maswi akwe Lesa anga batoocitabo makwebo mwakucanina shiyandika mubuumi. Sombi ceebo Lesa wakatutuma, tulashimikila cakushomeka pameenso akwe, mukwiinga tuli muli Klistu.