2 Bene Kolinto 12 - Baibo Busansulushi Bwa Libuku Ili

Mwaami nshaakayubulwita Paulo

¹ Ndyeelete kulilumbaisha nakubi kwaamba ayi taaku mpindu. Ono bulya ntokwaamba shasheesho nshindakabona anga mushiloto asheesho shakanjubulwita Mwaami.

² Ndishi musankwa umwi ushoma muli Klistu wabwesekwa akutolwa kwiculu kwiine. Pakeenda myaaka likumi ayone ici ndicakacitika. Nshishi na cakacitika cancinencine, na wakalinga kubonabo anga muciloto, Lesa eenkabo ngooshi.

³ Ndabooshaawo, ndishi kwaamba ayi musankwa uyu wakasompwetwa kuMusena ukondelesha. Nshishi na ncakwiila cakacitika ici, na wakalinga kubona anga muciloto, Lesa eenkabo ngooshi.

⁴ Kumusena uko wakanyumfwa shintu isho muntu nshaatakonshi kusansulula alimwi nshaatakwe kusuminishikwa kwaamba.

⁵ Aboobo ndaakulilumbaisha ceebo ca musankwa uyo, sombi teshi nkalilumbaishe palwaangu citobo pashintu shitondesha mboondefukite.

⁶ Nabi na ndayanda kulilumbaisha, inga nshibiiwo muluya ceebo inga kaaŋamba shalushinisho. Ono teshi nkalilumbaishe mukwiinga nshisuni umwi muntu kwaamba ayi akanjeyele kwiinda pasheesho nsheencita akwaamba.

⁷ Ono kwaamba ayi ntalisumpuli bunene ceebo ca sheesho shikankamika nshindakayubulwitwa, ndakabikwa muumfwa mumubili uyo wiimfwi muciimo ca mutumwi wakwe Satana utoonguma kwaamba ayi ntalilumbaishi.

⁸ Ndakapaila kuli Lesa mankanda otatwe kwaamba ayi cintu ici acikusheemo.

⁹ Sombi wakankumbula ayi, “Luse lwangu lulikwene pali ndiwe, ceebo nkusu shangu shilaboneka bunene na koolefukite.” Ono nanoolilumbaisha cakukondwa ceebo cakulefuka kwangu kwaamba ayi nkusu shakwe Klistu shibe pali ndime.

¹⁰ Aboobo ceebo cakwe Klistu ndikondetwe kulefuka, kutukanwa, kupenga, kupenshekwa alimwi amakatasho. Mukwiinga, muciindi ndyeendefukite, lyalo ndyeenjuma.

Paulo mbwaakalisukama shabene Kolinto

¹¹ Ono ntoocita anga ngumuntu muluya! Sombi ndimwe mwanengesha kuba boobo. Mwebo ndimwe mwakalinga kweelete kunumbaisha ceebo nakubi kwaamba ayi taaku mboombete, sombi abo mbomwaamba ayi, “Batumwi beendaawo,” tabanyindiiwo.

¹² Shaankamiko ashitondesho sha nkusu sha kwiculu, isho shitondesha butumwi bwangu bwancinencine shakacitwa pakati kanu cakukalika moyo.

¹³ Sa kuliiwo cintu cimwi ncendakacita kushoonde shimwi ico ncitakwe kucita kuli ndimwe, kulekabo cakwaamba ayi nshikwe kumupensha pashintu nshendakalinga kuyanda? Nobamakwesu amundekelele na nkokulubya uko.

¹⁴ Bulya luno ndwatatu ndoondibambite kumufwakashisha. Alimwi teshi nkamupensheewo ceebo nshintokweendela shintu shanu, sombi mwebo nobeene. Teshi baana beelete kubamba shiyanda bashali, sombi mbashali babamba shiyanda baana.

¹⁵ Ndisangalete kusebensesha shoonse nsheencite anebo nemwiine ceebo cakumucafwa. Ono sa mulyeelete kunsuna paniini ceebo ndimusuni bunene?

¹⁶ Cimwi ciindi inga mwasumina kwaamba ayi nshikwe kumupenshaawo. Sombi umwi inga waamba ayi ndakalinga kucenjete, alimwi ndamwiinda kumaano ashintu shabubeshi.

¹⁷ Ono munshilanshi? Sa ndakamunyengelelaawo kwiinda mubaabo mbondakatuma?

¹⁸ Ndakasenga Taitasi kwaamba ayi ese amufwakashishe alimwi ndakamutuma pantu pomwi amushominyineesu umwi. Sa inga mwaamba ayi Taitasi wakamunyengelelaawo? Sa lakwe anebo tatusebenseshi muyeeyo womwi? Sa buumi bwesu tabukoshenye?

¹⁹ Mpashi mulayeeya kwaamba ayi lyoonse ili twakalinga kunooliimikaninabo kuli ndimwe. Sobwe! Tulaamba kweelana abuyanda Klistu pameenso akwe Lesa alimwi shoonse nshetucita shilacitwa kwaamba ayi mwebo nomusunikwi, mucafwikwe.

²⁰ Ceebo ntooloonda kwaamba ayi ndaakwisa uko ndaakumucana kamutabete mbuli mbondakalinga kumuyeeyela, nabi mwebo kumbona mbomutasuni. Ntooloonda ayi ndaakucana kwaambana, munyono, bukali, kulisuna, matushi, kufuya, kulisumpula akunyonyongana.

²¹ Ntooloonda kwaamba ayi ndaakwisaako alimwi, Lesa inga wanengesha kunyumfwa nsoni pameenso anu mukwiinga ndaakutalika kulila ceebo ca baabo boonse bakabisha kale kale, batana kusanduka kuswa kushibiibi shabo sha lunkumbwa, cikololo ashimwi shoonse shakutalilemeka.