2 Bene Kolinto 10 - Baibo Busansulushi Bwa Libuku Ili

Paulo mbwaakeemikanina butumwi bwakwe

¹ Nebo nePaulo, ntooyanda kumusenga ono. Bantu balaamba ayi na kaandi amwebo ndalibombya, sombi na nkaantabete amwebo ndamukalalila. Kwiinda mukulibombya ankuumbu shakwe Klistu ntoomusenga ayi

² mutankakatishi kwaamba ayi nkese abukali ceebo ncakwiila ndakonsha kukalalila bantu abo batuyeeyela ayi tulacita mulimo wesu mubuntu.

³ Ee, tuli bantu, sombi tatulwaani bucita bali mubuntu.

⁴ Shilwanisho nshetusebensesha teshi sha pacishi ca panshi, sombi nsha nkusu shakwe Lesa isho shinyonyoola bulwani bwa bubi.

⁵ Tulamanisha kupikishanya akulisumpula uko kulengesha bantu ayi bateshibi Lesa. Tulakoma miyeeyo yoonse kwaamba ayi ibe yeeyo inyumfwila Klistu.

⁶ Ono mwaakubonekabo ayi mutoonyumfwila Klistu cakumaninina, tulilibambite kupa mulandu uyo woonse utanyumfwili.

⁷ Amubone shimucitikila. Na kuli muntu uliyeeyela kwaamba ayi ngwakwe Klistu, ncibotu aliyeeye alimwi ceebo swebo tuli bakwe Klistu bweenka mbwaabete lakwe.

⁸ Nakubi kwaamba ayi ndaindilisha paniini kulilumbaisha ceebo ca nkusu nshaakatupa Mwaami Jesu, isho shakumuyaka kuteshi kumumwaya, nshinyumfwi nsoni, sobwe.

⁹ Nshisuni kuboneka anga ntoomukonga mumakalata ngoomulembela.

¹⁰ Ceebo umwi inga waamba ayi, “Makalata ngaaleemba Paulo alicite bulemu alimwi ankusu. Sombi ndyaaba aswebo ulaboneka anga ngumubombu alimwi kwaamba kwakwe nkuubu.”

¹¹ Sombi muntu wa mushobo uyo ulyeelete kwishiba ayi taapu bupusano buliiwo pakati ka sheesho nshetulemba nditutabete amwebo, ansheshi tukacite twaakunooli kooko.

¹² Tatubete mbuli baabo. Swebo tatukoonshi kulyeeleka nabi kulikoshanisha abaabo balibika mpobatabete. Na balyeeleka bene kubeene akulikoshanisha beene kubeene, ingayi tababete basongo.

¹³ Ono swebo, kulilumbaisha kwesu teshi kukeendilile manyinsa amwi. Tulalilumbaisha mukati ka manyinsa a milimo iyo Lesa njaakatupa. Ncakwiila amwebo muli mumanyinsa a milimo iyo.

¹⁴ Ceebo cakwaamba ayi muli mumanyinsa ayo, tatukwe kwaindilila nditwakesa kuli ndimwe akumushimikila Makani Abotu apali Klistu.

¹⁵ Aboobo tatulilumbaishi pamilimo yakacita bamwi kusotoka manyinsa Lesa ngwaakatupa. Sombi tulayanda ayi lushomo lwanu lukomene alimwi ayi tukakonshe kucita milimo imwi iindaawo pakati kanu, kweela mumanyinsa Lesa ngwaakatupa.

¹⁶ Nkokwaamba ayi tukashimikile Makani Abotu amushishi shicanika kusotoka kooko. Ceebo tatusuni kulilumbaisha pamulimo wakacita umwi muntu mumuunda wakwe.

¹⁷ Bweenka bwaamba Malembo akwe Lesa ayi, “Sombi uyo usuni kulilumbaisha, aalilumbaishe paceeco cakacita Mwaami Lesa.”

¹⁸ Mukwiinga teshi wooyo ulilumbaisha mwiine utambulwa, sobwe. Sombi ngooyo Mwaami Lesa ngwaalumbaisha.