2 Bene Kolinto 1 - Baibo Busansulushi Bwa Libuku Ili

¹ Ndime Paulo, mutumwi wakwe Klistu Jesu kwiinda mukuyanda kwakwe Lesa. Ndi pantu pomwi amushominyineesu Timoti. Ntoolembela ndimwe nocoonde cakwe Lesa cili muKolinto abashomi boonse bali mucishi ca Akeya.

² Luse aluumuno shibe amwebo kuswa kuli Lesa Ishiwesu aMwaami Jesu Klistu.

Paulo mbwaakalumba Lesa

³ Atulumbe Lesa Ishi Mwaami wesu Jesu Klistu, Ishiwesu shinkumbu uyo utucafwa!

⁴ Ulatucafwa mumapensho esu oonse kwaamba ayi tukonshe kucafwa bamwi bacite mapensho amushobo uli woonse, kwiinda mulucafwo ulo ndotwakatambula kuswa kuli Lesa.

⁵ Mukwiinga bweenka bwakapenga Klistu, aswebo tulapenga. Ono bweenka Lesa mbwaakacafwa Klistu, aswebo ulatucafwa kwiinda muli nguwe.

⁶ Lyoonse nditupenga mwebo mulatambula lucafwo lwakukalika myoyo kwaamba ayi mukapulushikwe. Ono ndituyuminishikwa, nkwaamba ayi amwebo muyuminishikwe akuba ankusu shakwiinda mumapensho ayo ngotwiindaamo aswebo.

⁷ Aboobo lushomo ndotucite pali ndimwe talutenkaanishikwi ceebo tulishi kwaamba ayi bweenka mbomupenga, mbotupenga aswebo, alimwi mulanooyuminishikwa bweenka mbuli ndiswe.

⁸ Nobamakwesu tulisuni kwaamba ayi mwishibe mapensho ngotwakabona mucishi ca Esha. Mapensho akalinga afula cakwiinda paayo ngotukonsha kukoma palweesu. Aboobo tetwakalinga kushoma kwaamba ayi inga katucili boomi.

⁹ Ncakwiila mumyoyo yesu lufu lwakalinga lweelela kale. Sombi ici cakacitika kwaamba ayi tutalishoomi sobeene, sombi Lesa eenkabo uyo ubusha bantu kuswa kubafu.

¹⁰ Wakatufuna mumapensho alufu amushobo uyo alimwi ulaakutufuna. Ono tulishomete kwaamba ayi ulaakutolelela kutufuna

¹¹ kweelana ambomutucafwa mumipailo yanu. Lyalo baanji balaakulumbaisha Lesa mukwiinga wakatupa shoolwe ceebo ca mipailo ya bantu baanji.

Lweendo lwakwe Paulo

¹² Ono kuli cintu comwi ncetukonsha kulilumbaishilaawo. Tulishi cakutatonsha ayi koonse koonse twakalinga kulilemeka cakubula kampenda akushomeka kweelana abuyanda Lesa, bunene bunene pakati kanu. Tetwakalinga kutanjililwa abusongo bwabuntu, sombi nkusu sha luse lwakwe Lesa.

¹³ Makalata ngotumulembela ngoobu kubelenga akunyumfwa. Nakubi boobo bulya tamunyumfwishishi nshetulemba,

¹⁴ sombi ndishi kwaamba ayi kunembo mulaakushinyumfwishisha. Lyalo pabushiku Mwaami wesu Jesu Klistu ndyeshi akese, noonse mulaakulilumbaisha ceebo cesu aswebo ceebo canu.

¹⁵ Ceebo cakushoma boobo, ndakalinga kuyeeya kwaamba ayi ntaangune kufwakashisha ndimwe ayi mukapekwe shoolwe mankanda obilo.

¹⁶ Ndakalinga kuyeeya kumufwakashisha pakuya kuMakedoniya, alimwi pakuboola munkancafwe shiyandika mulweendo lwangu lwakuya kuJudeya.

¹⁷ Ndindakayeeya boobo, sa mutooyeeya ayi ndakalinga kucita cakampuwe? Sa ndi anga ngumuntu utayeeyi pakucita shintu, uyo waamba ayi, “Ee” alimwi ayi, “Sobwe” paciindi comwi?

¹⁸ Bweenka Lesa mbwaashomeka, ncendakamulasha tecakalinga cakwaamba ayi, “Ee” nabi ayi, “Sobwe”.

¹⁹ Ceebo Jesu Klistu Mwanaakwe Lesa uyo Sailasi, Timoti anebo ngotwakashimikila pakati kanu, teshi “Ee” nabi ayi, “Sobwe” paciindi comwi, sombi lakwe lyoonse ngu “Ee” wakwe Lesa.

²⁰ Mukwiinga lakwe ngo “Ee” kusheesho shoonse shakashomesha Lesa. Nceceeco ncetwaambila ayi “Ameni” kwiinda muliina lyakwe Klistu, lyoonse nditulumba Lesa.

²¹ Lesa ngowakatulengesha kwaamba ayi swebo amwebo tube bayumu muli Klistu. Peculu lya waawo ngowakatutuma,

²² wakatubika cishibilo cakwe, akutupa Mushimu Usalashi mumyoyo yesu kwaamba ayi ube anga ncecisumina mulandu ca shintu sheshi shikese.

²³ Lesa ulishi kwaamba ayi nshibeci. Ncakwiila nceentakwe kwishita kuKolinto nkwaamba ayi ntamupeenshi alimwi.

²⁴ Tatutokweelesha kunoomulwiita pasheesho nshemweelete kushoma. Ceebo tulishi kale kwaamba ayi muli bayumu mulushomo. Anu tutoosebenselabo pantu pomwi ayi mukeendeewo kusangalala.