2 Baami 9 - Baibo Busansulushi Bwa Libuku Ili

Jewu mbwaakaba mwaami wa bene Isilaeli

¹ Ono mulaluki Elisha wakaambila umwi wa mulikoto lya balaluki ayi, “Pimpa cakufwala cako ca peculu uye kuLamoti mucishi ca Gilyadi. Uyumune amusaashi uyu wa mafuta a olifi.

² Washika uko, uyandoole Jewu mwanaakwe Jeoshafati, mwishikulu wakwe Nimushi. Lyalo umukushe pababye akumutola kucipinda ca mukati ca ŋanda.

³ Upuumwite mafuta aya pamutwi wakwe akwaamba ayi, ‘Mwaami Lesa waamba ayi, Ndakunanika mafuta kwaamba ayi ube mwaami wa bene Isilaeli.’ Lyalo ukasweemo cakufwambaana.”

⁴ Mpomunyaawo mulaluki wacanike wakaya kuLamoti

⁵ uko nkwaakaya mukucana bamatanjilili ba bashilumamba bali mulibungano. Lyalo wakaamba ayi, “Nkambo ndicite makani akumwaambila.” Jewu wakamwiipusha ayi, “Ngani pali ndiswe ngootokwaambila?” Mulaluki wakakumbula ayi, “Mwebo nweenka nkambo.”

⁶ Lyalo bobilo abo bakaya mucipinda. Mpeeke mulaluki uyo wakatila mafuta a olifi pamutwi wakwe Jewu akumwaambila ayi, “Mwaami Lesa, Lesa wa bene Isilaeli waamba ayi, ‘Ndakunanika kwaamba ayi ube mwaami wa bantu bangu bene Isilaeli.

⁷ Ulaakucaya mwaami wako mwanaakwe Aabu kwaamba ayi mubooshe cishole pali Jesebelo ceebo cakucaya balaluki bangu abasebenshi bangu bamwi.

⁸ Bamuŋanda yakwe Aabu boonse balaakumana kufwa. Ncakwiila ndaakucaya baana basankwa boonse bamuŋanda yakwe muIsilaeli, nkokwaamba ayi banike abanene.

⁹ Kubamuŋanda yakwe ndaakucita bweenka mbondakacita kubamuŋanda yakwe Jeloboamu mwanaakwe Nebati alimwi abakwe Baasha mwanaakwe Aija.

¹⁰ Jesebelo teshi akafukilweewo mucuumbwe. Mubili wakwe ulaakulikwabo abakabwa mundabala ya Jesiliilu.’ ” Ndyaakamana kwaamba boobo mulaluki uyo wakaswa mucipinda umo akucica lubilo.

¹¹ Jewu wakaboolela kubabye abo bakamwiipusha ayi, “Sa kuli kabotu? Anu muluya ulya walinga kuyandoolanshi?” Jewu wakakumbula ayi, “Ulya muntu mulimwishi ashalo nshaamba mulishishi.”

¹² Balo bakakumbula ayi, “Sobwe tatushishi, tulwiitebo nshaamba.” Jewu wakaamba ayi, “Wandwiita ayi Mwaami Lesa waamba ayi, ‘Ndakunanika mafuta kwaamba ayi ube mwaami wa bene Isilaeli.’ ”

¹³ Mpomunyaawo babye abo bakafuula shakufwala sha peculu akushiyala pamatantilo aŋanda kwaamba ayi Jewu eemikaneewo. Lyalo bakalisha mapeenga akoolobesha ayi, “Jewu ngumwaami!”

Jewu mbwaakacaya Jolamu mwaami wa bene Isilaeli

¹⁴ Lyalo Jewu mwanaakwe Jeoshafati, mwishikulu wakwe Nimushi wakapingila Jolamu. Ono Jolamu abashilumamba boonse bene Isilaeli bakalinga kutabilila ndabala ya Lamoti mucishi ca Gilyadi kuli Asayelo mwaami wa bene Silya.

¹⁵ Sombi mwaami Jolamu wakaboolela kuJesiliilu kwaamba ayi shilonda nshaakayaswa kubene Silya shikooshe. Mpeeke Jewu wakaambila babye ayi, “Na muli kulubasu lwangu, mutaleeki muntu nabi womwi kuswa muLamoti ayi aye mukulwiita bene Jesiliilu.”

¹⁶ Lyalo wakatanta mucikoci cakwe akuya kuJesiliilu. Ico ciindi Jolamu kaatana akuba kabotu, alakwe Aasiya mwaami wa bene Juda wakalinga kweenka uko mukumubona.

¹⁷ Ushikulindilila paŋanda ilaamfu kuJesiliilu wakabona Jewu abashilumamba bakwe kabesa, wakoolobesha ayi, “Ndabona bashilumamba batoosa!” Jolamu wakaamba ayi, “Tumaako shiliaki aye eepushe na besabo muluumuno.”

¹⁸ Shiliaki uyo wakaya mukukumana aJewu akwaamba ayi, “Mwaami utokwiipusha ayi, ‘Sa mwesa muluumuno?’ ” Jewu wakakumbula ayi, “Webo toobeteko lubasu kumakani ayo! Tiya unoosa mwisule lyangu.” Mpomunyaawo shikulindilila paŋanda ilaamfu wakaluula ayi, “Shiliaki washika kuli mbabo, sombi taatoosa.”

¹⁹ Aumwi shiliaki wakatumwaako. Lyalo ndyaakashika kuli mbabo wakaamba ayi, “Mwaami utokwiipusha ayi, ‘Sa mwesa muluumuno?’ ” Jewu wakakumbula ayi, “Webo toobeteko lubasu kumakani ayo! Tiya unoosa mwisule lyangu.”

²⁰ Shikulindilila paŋanda ilaamfu wakaluula ayi, “Shiliaki washika kuli mbabo, sombi alakwe taatoosa.” Mpeeke wakatolelela ayi, “Mutanjilili wa likoto lya bantu abo utokweensha cikoci anga ngumuntu ucinkukite, bweenka mbuli Jewu mwanaakwe Nimushi!”

²¹ Mwaami Jolamu wakaamba ayi, “Cikoci cangu acibambwe cakufwambaana.” Cakabambwa, lyalo lakwe Jolamu mwaami wa bene Isilaeli aAasiya mwaami wa bene Juda bakantanta akuya mukukumanya Jewu, womwi awomwi mucikoci cakwe. Bakamukumanya mumuunda uyo wakalinga wakwe Naboti mwine Jesiliilu.

²² Jolamu wakeepusha Jewu ayi, “Sa wesa muluumuno?” Jewu wakakumbula ayi, “Ino inga kwaba buyani luumuno na kakucili buloshi alimwi akulambila shibumbwabumbwa isho banyoko baJesebelo nshebakaleta muIsilaeli.”

²³ Jolamu wakapilulula cikoci cakwe, wacica akoolobesha ayi, “Aasiya bantu aba bambukila!”

²⁴ Jewu wakabika mufwi kubuta bwakwe, wauwaala cankusu akuyasa Jolamu mwisule akuya mukuyasa moyo. Lyalo Jolamu wakawa mucikoci wafwa.

²⁵ Mpomunyaawo Jewu wakaambila musebenshi wakwe Bidika ayi, “Bwesa mubili wakwe usowe mumuunda wakwe Naboti. Ingashila ayi webo anebo twakalinga kuya ceenda mushikoci mwisule lya baAabu baishi Jolamu, Mwaami Lesa wakaambila Aabu ayi,

²⁶ ‘Ndakabona Naboti mbwaakacaikwa abana bakwe ciilo. Ndamushomesha ayi ndaakukupa mulandu muno mweenka mumuunda.’ Ono tola mubili wakwe Jolamu akuusowa mumuunda wakwe Naboti kwaamba ayi kushomesha kwa Mwaami Lesa kucitike cancinencine.”

Mwaami Aasiya wa bene Juda mbwaakafwa

²⁷ Mwaami Aasiya ndyaakabona shoonse shakacitika, wakacicisha cikoci akuya kundabala ya Beti Agani. Mpomunyaawo Jewu wakamutandaanya kaaya coolobesha ayi, “Amumucaaye alakwe!” Lyalo bakamucisa kaaya acikoci munshila yakuya kuGaa pafwaafwi andabala ya Ibuleyamu. Sombi wakalinga kuyabo tibili washika akundabala ya Megido uko nkwaakafwita.

²⁸ Basebenshi bakwe bakabwesa mubili wakwe bauboosha kuJelusalemu mucikoci akuubika kushuumbwe sha bamaami muNdabala yakwe Defedi.

²⁹ Aasiya wakaba mwaami wa bene Juda mumwaaka wa likumi awomwi wa bwaami bwakwe Jolamu mwanaakwe Aabu mwaami wa bene Isilaeli.

Jesebelo mbwaakacaikwa

³⁰ Jewu wakashika kuJesiliilu. Jesebelo ndyaakanyumfwa shakacitika, wakalibamba kumeenso akusakula kabotu misusu yakwe. Lyalo wakaya weemikana pambwelyo kaasondela.

³¹ Jewu ndyaakapola pamwinjililo Jesebelo wakoolobesha ayi, “Webo Simuli omucayi! Ino wesa mukucitanshi kuno?”

³² Jewu wakalanga peculu akoolobesha ayi, “Ngani uli kulubasu lwangu?” Basebenshi ba kuŋanda ya bwaami bobilo nabi botatwe bakasondela pambwelyo.

³³ Mpeeke Jewu wakabaambila ayi, “Amumuwaale panshi!” Bakamuwaala panshi abulowa bwakwe bwakasamfukila kulubumbu akumaaki. Mpomunyaawo Jewu wakeensha maaki acikoci pamubili wakwe

³⁴ wenjila muŋanda ya bwaami akuya mukulya. Lyalo wakaamba ayi, “Amubwese mwanakashi ushinganishitwe muye mumubiike mukwiinga ngumwanaamwaami.”

³⁵ Sombi basankwa abo bakaya mukumubika bakacanakobo shifuwa sha kumutwi, alimwi ashifuwa sha kumaansa asha kushimpanta shakwe.

³⁶ Ndibakatola makani aya kuli Jewu lakwe wakaamba ayi, “Ici cakacitika kweelana abwakaamba Mwaami Lesa muli Elija mwine Tishibe musebenshi wakwe ayi, ‘Bakabwa balaakulya mubili wakwe Jesebelo mundabala ya Jesiliilu.

³⁷ Sheshi shikaacaale shilaakupalanganishikwa anga ngamafumba. Taaku muntu weshi akashishiibe ayi nshakwe Jesebelo.’ ”