2 Baami 8 - Baibo Busansulushi Bwa Libuku Ili

Mwanakashi wa kuShunemu mbwaakaboolela

¹ Ono Elisha wakaambila mwanakashi wakalinga kwikala muShunemu, uyo mwine mwaana ngwaakabusha kuswa kubafu ayi, “Mwaami Lesa utootuma nsala mucishi iyo yeshi ikatole myaaka yosanwe ayobilo. Webo abamuŋanda yako mulyeelete kuswaamo akuya kumwi.”

² Mwanakashi uyo wakanyumfwa shakaamba Elisha akuya abamuŋanda yakwe mukwikala mucishi ca Filisitiya kwamyaaka yosanwe ayobilo.

³ Myaaka yosanwe ayobilo ndiyakeenda, wakaboolela kuIsilaeli akuya kumwaami kwaamba ayi bakamupe ŋanda yakwe alimwi amuunda wakwe.

⁴ Wakacana mwaami utokwaamba aGeyasi musebenshi wakwe Elisha. Mwaami wakaamba ayi, “Ndwiite pashaankamiko isho shakacita Elisha.”

⁵ Geyasi ndyaakalinga kulwiita mwaami mbuli Elisha mbwaakabusha muntu kuswa kubafu, mwanakashi uyo wakesa mukusenga kumwaami ayi abooshe ŋanda yakwe amuunda wakwe kuli nguwe. Mpomunyaawo Geyasi wakaambila mwaami ayi, “Nomulemekwa, anooyu mwanakashi alimwi amwanaakwe uyo Elisha ngwaakabusha kuswa kubafu.”

⁶ Mwaami wakeepusha mwanakashi uyo pacikani ico, alakwe wakamulwiita mbocakacitika. Lyalo mwaami wakeeta wacinenenene wakwe umwi akumulwiita ayi abooshele mwanakashi uyo shintu shakwe shoonse kubikaawo asheesho shakaswa mumuunda wakwe ciindi coonse ndyaatakalingaako.

Elisha abenadadi mwaami wa bene Silya

⁷ Ono Elisha wakaya kuDamasikasi paciindi Benadadi mwaami wa bene Silya ndyaakalinga mulwashi. Benadadi ndyaakanyumfwa ayi Elisha wapola,

⁸ wakaambila Asayelo musebenshi wakwe ayi, “Tola cipo kumulaluki akumusenga ayi eepushe kuMwaami Lesa na ntooba kabotu.”

⁹ Lyalo Asayelo wakalongela shintu shibotu shipusenepusene sha muDamasikasi pangamela shakalinga makumi one akuya kuli Elisha. Mpeeke Asayelo ndyaakashika akwiimikana kunembo lyakwe Elisha, wakaamba ayi, “Musebenshi wanu mwaami Benadadi wantuma kwisa mukumwiipusha na ulaakuba kabotu kubulwashi mbwaacite.”

¹⁰ Elisha wakakumbula ayi, “Koya ukamulwiite ayi ulaakuba kabotu. Nakubi boobo Mwaami Lesa wanjubulwita ayi ulaakufwa.”

¹¹ Mpeeke Elisha wakamulangishisha kushikila Asayelo wanyumfwa nsoni. Mpomunyaawo Elisha wakatalika kulila.

¹² Asayelo wakeepusha ayi, “Ino nkambo mutoolilanshi?” Elisha wakakumbula ayi, “Mukwiinga ndishi shintu shiyoosha nsheshi ukacite kubene Isilaeli. Ulaakutenta misena yabo icite malinga, kucaya basankwa bacikula bwangu kumipeeni, kupwaya bana babo bakateta panshi akupasoola banakashi bacite mafumo.”

¹³ Mpomunyaawo Asayelo wakeepusha ayi, “Ino nebo nekabwabo inga nkusu ndashicana kuli?” Elisha wakakumbula ayi, “Mwaami Lesa wanjubulwita ayi webo ulaakuba mwaami wa bene Silya.”

¹⁴ Asayelo wakaboolela kuli Benadadi uyo wakamwiipusha ayi, “Ino Elisha waamba ayinshi?” Asayelo wakakumbula ayi, “Wandwiita ayi ncakwiila mulaakuba kabotu.”

¹⁵ Sombi pabushiku bwakaboolaawo Asayelo wakabwesa linduumba walisumpa mumaanshi akufweka mwaami pameenso. Mpeeke mwaami wakafwa. Lyalo Asayelo wakapyana bwaami bwakwe pabene Silya.

Jeolamu mwaami wa bene Juda

¹⁶ Mumwaaka wasanu wa bwaami bwakwe Jolamu mwanaakwe Aabu mwaami wa bene Isilaeli, Jeoshafati kaacili mwaami wa bene Juda, alakwe Jeolamu wakaba mwaami

¹⁷ kaacite myaaka makumi otatwe ayobilo. Wakalela muJelusalemu myaaka yosanwe ayotatwe.

¹⁸ Mukaakwe wakalinga mwanaakwe Aabu. Alakwe wakakonkela nshila shibiibi sha bamaami ba bene Isilaeli bweenka bwakacita bamuŋanda yakwe Aabu. Nkokwaamba ayi bakabishisha Mwaami Lesa,

¹⁹ sombi Mwaami Lesa taakwe kuyeeyawo kunyonyoola cishi ca Juda mukwiinga wakalinga washomesha Defedi musebenshi wakwe ayi bamulunyungu lwakwe balaakunoolela lyoonse.

²⁰ Mubwaami bwakwe Jeolamu, bene Edomu bakabukila bene Juda akusala mwaami wabo beene.

²¹ Mpomunyaawo Jeolamu wakanyamuka ashikoci shakwe shoonse kuya kuSaya uko bashilumamba bene Edomu bakabashinguluka. Sombi mashiku lakwe abamatanjilili ba bashilumamba balwanina mushikoci bakaloboka. Mpeeke bashilumamba bakwe boonse bakacicila kumaandaabo.

²² Kuswabo ciindi ico bene Edomu bakaashukila bene Juda kushikila asunu. Muciindi ico ceenka bamundabala ya Libuna abalo bakaashuka.

²³ Shintu shimwi shoonse shakacita Jeolamu shililembetwe mulibuku lya buumi bwa bamaami ba bene Juda.

²⁴ Jeolamu wakafwa akubikwa kushuumbwe sha bamaami muNdabala yakwe Defedi. Lyalo Aasiya mwanaakwe wakapyana bwaami bwakwe.

Aasiya mwaami wa bene Juda

²⁵ Mumwaaka walikumi ayobilo ya bwaami bwakwe Jolamu mwanaakwe Aabu mwaami wa bene Isilaeli, Aasiya mwanaakwe Jeolamu wakaba mwaami wa bene Juda

²⁶ kaacite myaaka makumi obilo amyaaka yobilo. Wakalela muJelusalemu kwamwaaka womwi. Aasiya wakalinga mwanaakwe Ataliya mwanaakwe Aabu mwanakashi alimwi mwishikulu wakwe Omuli mwaami wa bene Isilaeli.

²⁷ Ceebo cakwaamba ayi Aasiya wakalinga mukwe kuli Aabu, ono alakwe wakabishisha Mwaami Lesa bweenka bwakabisha bapongoshi bakwe baAabu abamuŋanda yabo.

²⁸ Mwaami Aasiya wakaya pantu pomwi aJolamu mwaami wa bene Isilaeli mukulwana Asayelo mwaami wa bene Silya kuLamoti Gilyadi. Mpeeke Jolamu wakayaswa kubene Silya.

²⁹ Lyalo Jolamu wakaboolela kundabala ya Jesiliilu kwaamba ayi shilonda shakwe isho shiye shikooshe. Ono Aasiya mwanaakwe Jeolamu mwaami wa bene Juda wakaya kuJesiliilu mukumubona.