2 Baami 7 - Baibo Busansulushi Bwa Libuku Ili

¹ Elisha wakakumbula ayi, “Kutika, Mwaami Lesa waamba ayi, ‘Ciilo ciindi cino, mwebo mulaakuula makilogilamu otatwe a witi wiindaawo kubota nabi makilogilamu osanwe ayomwi a bale palyaali lyomwi lya Silifa kumwinjililo wa ndabala ya Samaliya.’ ”

² Mpomunyaawo shikucafwa mwaami wakaambila Elisha ayi, “Ico tacikoonshi kucitika nabi Mwaami Lesa mwiine watuma witi abale paciindi ciniinibo!” Elisha wakamukumbula ayi, “Ulaakucibona kacicitika, nakubi boobo webo teshi ukalyeeko.”

Bashilumamba bene Silya mbobakacica

³ Kwakalinga bantu bone bakalinga kuciswa bulwashi bwa manata abo bakalinga kunsengwe lya mwinjililo wa ndabala ya Samaliya. Basankwa abo bakatalika kubandika ayi, “Sa tunanoolindilabo kushikila tufwe?

⁴ Tacicafwi kwaamba ayi tuye mundabala inene iyi, tutooya tufwebo kunsala, alimwi na tunooshiitebo peenka pano, tutoofwa apalo. Anu katiyabo kumisumba ya bene Silya. Na baye batucaaye, ingayi katufwabo, sombi na batulekelele, ingayi twaba acoolwe.”

⁵ Ono ndikwalinga kuya cishiya, bakaya kumisumba ya bene Silya, sombi ndibakashika, tekwakalinga muntu nabi womwi.

⁶ Mwaami Lesa wakalengesha ayi bene Silya banyumfwe anga mbashilumamba batoosa cicica amaaki alimwi ashikoci. Balo bene Silya bakayeeya ayi mwaami wa bene Isilaeli walipila bamaami ba bene Iti abene Ijipiti pantu pomwi abashilumamba babo ayi bese babalwaane.

⁷ Aboobo macolesha ayo bene Silya bakacica kuloonda kucaikwa. Bakashiya matente, maaki ambongolo. Nkokwaamba ayi bakashiya misumba bweenka mbobakeeyaka.

⁸ Basankwa bone abo ndibakashika kweela misumba bakaya benjila mutente yomwi. Mpeeke bakalya akunwa isho shakalingaamo. Lyalo bakanyamuna silifa, golodi alimwi ashakufwala isho nshebakacanaamo akuya mukushishisa. Mpomunyaawo bakaboola benjila mutente aimwi akubwesa shintu shimwi baya bashishisa ashalo.

⁹ Mpeeke bakalyaamboosha ayi, “Tatweelete kucita bobulya! Tulicite makani abotu alimwi tatweelete kwaashibabo sweenka. Na tulindile ayi tukaambe macuunsa, ncakwiila tulaakupekwa mulandu. Anu katiya tukaluule kubacinenenene ba mwaami!”

¹⁰ Lyalo bakaya balwiita beshikulindilila mwinjililo wa ndabala inene ya Samaliya ayi, “Twalinga twaya kumisumba ine Silya, sombi tatuna kubonaawo muntu nabi womwi. Twacaana maaki ambongolo kashaangitwebo. Aalo matente alibo bweenka mbobakaayaka.”

¹¹ Beshikulindilila kumwinjililo bakaambilisha makani ayo, lyalo akaluulwa kuŋanda ya bwaami.

¹² Cakalinga ciindi ca mashiku, sombi mwaami wakabuka akwaambila bacinenenene bakwe ayi, “Amubone! Ntoomulwiita bene Silya ncebatooyanda kucita! Balishi ayi muno muli nsala. Ono bashiya misumba yabo kashanga akuya mukuyuba muluundu. Batooyeeya ayi swebo tutooswa mundabala inene ino akuya mukuyandoola shakulya. Lyalo batucaate busha, kututola katuli boomi akubwesa ndabala inene ino.”

¹³ Wacinenenene wakwe womwi wakaamba ayi, “Bantu bali mundabala inene ino balibo anga mbaabo bafwa kale. Ono amutumebo basankwa bamwi amaaki osanwe ayo acalaawo kwaamba ayi baye babone cacitika.”

¹⁴ Bakasala basankwa bamwi. Lyalo mwaami wakabatuma mushikoci shobilo akubatuma ayi bakabone cacitika kubashilumamba bene Silya.

¹⁵ Basankwa abo bakakonkela bene Silya cakuya mukushika kuMulonga wa Joodani. Munshila yoonse bakalinga kuya bucana shakufwala ashisebensesho nshebakashiya ndibakacica. Lyalo bakaboolela mukuluula kumwaami.

¹⁶ Mpomunyaawo bene Samaliya bakaya mukusaala misumba ya bene Silya. Mpeeke makilogilamu otatwe a witi wiindaawo kubota nabi makilogilamu osanwe ayomwi a bale akalinga kuulishikwa lyaali lyomwi lya silifa bweenka bwakaamba Mwaami Lesa.

¹⁷ Ono cakacanika ayi mwaami wa bene Isilaeli wakabika shikumucafwa ulya ayi alindilile pamwinjililo. Ono bantu pakwiinda shikumucafwa uyo bakamulyata, lyalo wakafwa bweenka bwakaamba Elisha mwaami ndyaakaya kuŋanda yakwe mukumubona.

¹⁸ Cakacitika bweenka Elisha mbwaakaambila mwaami ayi, “Ciilo ciindi cino, mwebo mulaakuula makilogilamu otatwe a witi wiindaawo kubota nabi makilogilamu osanwe ayomwi a bale palyaali lyomwi lya Silifa kumwinjililo wa ndabala ya Samaliya.”

¹⁹ Shikucafwa mwaami ndyaakanyumfwa boobo wakaamba ayi, “Ico tacikoonshi kucitika nabi Mwaami Lesa mwiine watuma witi abale paciindi ciniinibo!” Lyalo Elisha wakamukumbula ayi, “Ulaakucibona kacicitika, nakubi boobo webo teshi ukalyeeko.”

²⁰ Ono bweenka ubo mbocakamucitikila. Bantu bakamulyata pakwiinda mumwinjililo wa ndabala, lyalo wakafwa.