2 Baami 6 - Baibo Busansulushi Bwa Libuku Ili

Keembe kakasowekela mumaanshi mbwaakakacana

¹ Bumwi bushiku likoto lya balaluki abo Elisha mbwaakalinga kweendelesha bakatongooka kuli nguwe ayi, “Musena ngotwikalaawo amwebo waceya abuumbi!

² Amutusuminishe kuya kuMulonga wa Joodani mukutema shisamu kwaamba ayi tuyake pakwikala.” Elisha wakabakumbula ayi, “Ncibotu, kamuya.”

³ Umwi pali mbabo wakamusenga ayi, “Sa teshi tuyaanu sobasebenshi banu?” Elisha wakakumbula ayi, “Ntooyaanu.”

⁴ Mpeeke bakanyamuka akuya pantu pomwi. Ndibakashika kuMulonga wa Joodani, bakatalika kutimbula shisamu.

⁵ Ngayi umwi ndyaakalinga kutema keembe kakwe kasokokela mumaanshi. Mpomunyaawo wakeepusha Elisha ayi, “Ntoocita buyani nkambo? Aka keembe ndacita kakubweleka!”

⁶ Lyalo Elisha wakeepusha ayi, “Kalokela kuli?” Musankwa uyo wakamubonesha musena ngokakalokelaawo. Mpeeke Elisha watyola kasamu, wakawaala pamaanshi akulengesha keembe kuseela.

⁷ Elisha wakaamba ayi, “Kasubuleewo.” Musankwa uyo wakakotama akubwesa keembe ako.

Bashilumamba ba bene Silya mbobakakomwa

⁸ Mwaami wa kuSilya wakalinga kulwana abene Isilaeli. Wakeepusheepusha bamatanjilili ba bashilumamba bakwe akusala musena wakuyakawo misumba yabo.

⁹ Sombi Elisha wakatuma nkombe kumwaami wa bene Isilaeli, kumucenjesha kutashikaako kumusena uyo mukwiinga bene Silya nkobatooyubilila kumulwana uko.

¹⁰ Mpeeke mwaami wa bene Isilaeli wakacenjesha bantu bakalinga kwikala kumusena uyo wakaamba Elisha, aboobo bekekala kabalibambite. Ico cakacitika mankanda aanji mumisena ipusenepusene.

¹¹ Mwaami wa bene Silya wakakalala abuumbi pacikani ici. Wakeeta bamatanjilili ba bashilumamba akubeepusha ayi, “Anu ngani muli ndimwe uli kulubasu lwa mwaami wa bene Isilaeli?”

¹² Umwi wakakumbula ayi, “Taakuuwo nomulemekwa. Ulyeelete kuba Elisha mulaluki mwine Isilaeli ulwiita mwaami wa bene Isilaeli shoonse nshemwaamba cabushishi mucipinda canu.”

¹³ Mwaami wakaamba ayi, “Amuye mumuyandoole kwaamba ayi ntume bakamucate.” Ndibakamulwiita ayi Elisha uli kuDotani,

¹⁴ mwaami wakatumaako bashilumamba baanji bakaya amaaki alimwi ashikoci. Bakashika mundabala iyo mashiku akwiishinguluka.

¹⁵ Mpeeke musebenshi wakwe Elisha ndyaakabuka macuunsacuunsa akuya pansengwe, wababonabo bashilumamba amaaki alimwi ashikoci kashingulukite ndabala. Wakaboolela kuli Elisha akwaamba ayi, “Twafwa sunu, nkambo! Ino tutoocita buyani?”

¹⁶ Elisha wakakumbula ayi, “Utaloondi, bali kulubasu lwesu mbaanji kwiinda baabo bali kulubasu lwabo.”

¹⁷ Lyalo wakatalika kupaila ayi, “NoBaami baLesa, amumucalule meenso kwaamba ayi abone!” Mwaami Lesa wakanyumfwa mupailo wakwe. Lyalo musebenshi wakwe uyo ndyaakalangilisha kukalundu wakabona maaki aanji ashikoci sha mulilo shiinji kashishingulukite Elisha.

¹⁸ Bene Silya ndibakatalika kulwana, Elisha wakapaila ayi, “NoBaami baLesa amupofoshe meenso abo!” Mwaami Lesa wakakumbula kupaila kwakwe akubapofosha meenso.

¹⁹ Lyalo Elisha wakaya kuli mbabo akwaamba ayi, “Mwaluba nshila, ino teshi ndabala njemutooyandoola. Amunkonkele mutole kumusankwa ngomutooyandoola.” Mpeeke wakabatola kundabala inene ya Samaliya.

²⁰ Ciindi ndibakenjilabo mundabala inene iyo Elisha wakapaila ayi, “NoBaami baLesa amucalule meenso abo kwaamba ayi babone.” Mwaami Lesa wakakumbula mupailo wakwe akucalula meenso abo, lyalo bakacana ayi bali muSamaliya.

²¹ Mwaami wa bene Isilaeli ndyaakabona bene Silya, wakeepusha Elisha ayi, “Sa mbacaaye nkambo? Sa mbacaaye?”

²² Wakakumbula ayi, “Tau, sa inga mwacaya bashilumamba abo mbomwacata busha pakulwana? Sobwe, amubapebo shakulya ashakunwa akubaleka baboolele kumwaami wabo.”

²³ Mpomunyaawo Mwaami wa bene Isilaeli wakabambila shakulya shakusekelela shiinji. Ndibakamana kulya akunwa, wakabatumya kumwaami wabo mwine Silya. Kuswawaawo bene Silya bakacileka kulwana bene Isilaeli.

Bene Silya mbobakashinguluka ndabala ya Samaliya

²⁴ Mukuya kwanshiku Benadadi mwaami wa bene Silya, wakabunganya bashilumamba bakwe kuya mukulwana bene Isilaeli akushinguluka ndabala inene ya Samaliya.

²⁵ Nsala yakakomena ceebo ca ndabala yakalinga kushingulukitwe. Paceebo ceeco mutwi wa mbongolo wakalinga kuulwa maali a silifa ali 80, aalo matyotyoolo a mpolobe kaaulwa maali a silifa ali osanwe

²⁶ Bumwi bushiku mwaami wa bene Isilaeli wakalinga kuya ceenda muya lubumbu lwa ndabala. Mpeeke wakanyumfwa mwanakashi woolobesha ayi, “Amuncafweeko nomulemekwa!”

²⁷ Lakwe mwaami wakakumbula ayi, “Na Mwaami Lesa taatookucafwa, nebo inga ndakucafwanshi? Sa nebo ndicitewo witi na waini?

²⁸ Nciinshi cashupa?” Mwanakashi uyo wakakumbula ayi, “Bumwi bushiku mwanakashi uyu wakandwiita ayi, ‘Leta mwanaako tumulye sunu, lyalo ciilo tulaakulya mwanaangu.’

²⁹ Lyalo mwanaangu twakamuteleka akumulya. Ono bushiku bwakaboolaawo ndakamulwiita ayi, ‘Ono awebo leta mwanaako tumulye.’ Sombi lakwe wakamushisa.”

³⁰ Mwaami ndyaakanyumfwa makani ayo, wakakwamoona mungaanjo wakwe. Bantu bakalinga pafwaafwi alubumbu bakabona ayi mwaami wakalinga kufwete masaka mukati ka mungaanjo wakwe.

³¹ Mpeeke wakoolobesha ayi, “Mwaami Lesa ampe mulandu nabi unene buyani na Elisha mwanaakwe Shafati mbule kumusutula mutwi lisuba kalitana kuwa!”

³² Mpomunyaawo wakatuma muntu ayi alete Elisha. Muciindi ico, Elisha wakalinga kuŋanda abamaloba abo bakalinga bamufwakashila. Shinkombe wa mwaami kaatana kushika, Elisha wakaambila bamaloba ayi, “Mucayi ulya watuma muntu kwisa mukunsutula mutwi! Ono na apole, mucalisheeko kumulyango kwaamba ayi atenjili. Lakwe mwaami unanooli kwisule lya muntu uyo, keesa.”

³³ Elisha kaatana kumanisha kwaamba makani aya, mwaami wakesa waamba ayi, “NguMwaami Lesa walengesha ayi mapensho aya kwisa pali ndiswe! Ino ono noolindililanshi lucafwo kuswa kuli nguwe?”