2 Baami 5 - Baibo Busansulushi Bwa Libuku Ili

Naamani mbwaakaba kabotu

¹ Naamani wakalinga mutanjilili wa bashilumamba bene Silya. Wakalinga kulemekwa abuumbi kumwaami wa bene Silya mukwiinga kwiinda muli nguwe, Mwaami Lesa wakalinga kulengesha bene Silya kukoma lyoonse. Wakalinga shilumamba uyoosha, nakubi boobo wakaciswa bulwashi bwa manata.

² Ono bushiku bumwi ndibakaya mukulwana abene Isilaeli, bene Silya bakacata busha mulindu umwi mwine Isilaeli uyo wakaba musebenshi wa muka Naamani.

³ Bumwi bushiku wakaambila mukamwaami wakwe ayi, “Baami bangu na bayabo kumulaluki uyo wikala kuSamaliya lakwe inga wabashilika bulwashi bwabo.”

⁴ Naamani ndyaakanyumfwa makani ayo, wakaya kumwaami akumulwiita mulindu uyo mbwaakaamba.

⁵ Mwaami wakaamba ayi, “Koya kumwaami wa kuIsilaeli, utolelele ankalata iyi kuli nguwe.” Lyalo Naamani wakanyamuka amaali a silifa ali 30,000, amaali a golodi ali 6,000 ashakufwala shibotu shili likumi.

⁶ Nkalata njaakatola yakalembwa ayi, “Iyi nkalata itoosansulula Naamani mutanjilili wa bashilumamba bangu. Ndamusenga ayi mushilike bulwashi bwakwe bwa manata.”

⁷ Ono mwaami wa bene Isilaeli ndyaakabelenga nkalata iyo, wakakwamoona shakufwala shakwe akoolobesha ayi, “Sa nebo ndime Lesa? Sa inga ndacaya akubusha kuswa kubafu? Ceebonshi mwaami wa bene Silya ncaatumina muntu uyu ayi nshilike bulwashi bwakwe bwa manata? Ono mwalibonena ayi ulisunibo pakunsumwita!”

⁸ Elisha ndyaakanyumfwa shakacitika, wakatuma nkombe kumwaami wa cishi cakwe ayi, “Ino nciinshi camulengesha kukwamoona shakufwala shanu? Muntu uyo amumutume kuli ndime kwaamba ayi eshibe ayi mucishi ca Isilaeli muli mulaluki!”

⁹ Lyalo Naamani wakaya amaaki alimwi ashikoci shakwe akwiimikana pamulyango wa ŋanda yakwe Elisha.

¹⁰ Mpomunyaawo Elisha wakatuma musebenshi wakwe ayi alwiite Naamani ayi, “Kamuya musambe mankanda ali osanwe aobilo muMulonga wa Joodani, bulwashi bwanu butoomana.”

¹¹ Sombi Naamani wakakalala akuswaako bukali akwaamba ayi, “Nebo ndalinga ndayeeya ayi utoosa eemikane kuli ndime, kupaila kuMwaami Lesa, Lesa wakwe, kutandabika lyaansa lyakwe pamusena wa bulwashi akubushilika!

¹² Kuteshibo boobo, sa Abana alimwi aFapa milonga ya muDamasikasi, teshi ibotu kwiinda milonga ili muIsilaeli? Sa te nendakasambabo mumo akuba kabotu?” Mpomunyaawo wakapiluluka akutalika kunooya kaakalalite.

¹³ Basebenshi bakwe bakaya kuli nguwe akumwaambila ayi, “Nkambo, nicalinga kwaamba ayi mulaluki wamwaambila kucita cintu ciyumu, nemwacicita. Ceebonshi tamukoonshi kuyabo mukusamba mbuli mbwaamba ayi mube kabotu?”

¹⁴ Mpomunyaawo Naamani wakaya kuMulonga wa Joodani akuliwaala mumaanshi mankanda ali osanwe aobilo bweenka bwakamwaambila Elisha. Lyalo wakaba kabotu alimwi mubili wakwe wakaboolabo anga ngwa mwaana kateta.

¹⁵ Wakaboolela kuli Elisha abantu bakwe boonse akumwaambila ayi, “Ono ndeshiba ayi taaku Lesa umwi, sombibo Lesa wa bene Isilaeli. Ono nkambo, ndaseenga ayi mutambule cipo kuswa kuli ndime nemusebenshi wanu.”

¹⁶ Elisha wakakumbula ayi, “Bweenka mbocibete lushinisho ayi Mwaami Lesa uyo ngoonsebensela ngumuumi, mbweeke ubo teshi ntambulewo cipo.” Naamani wakeelesha kumukakatisha, sombi wakakaka.

¹⁷ Ono Naamani wakaamba ayi, “Ono teshi mutambule cipo cangu, amunsuminishe nemusebenshi wanu ayi ntole bulongo bukonsha kunyamuna shifubwa shili anga mbongolo shobilo kumisheesu mukwiinga kuswa sunu, teshi nkabengewo milambu yakutenta nabi milambu imwibo kuli lesa umwi, sombibo kuMwaami Lesa.

¹⁸ Mwaami Lesa anoondekelela na ndashindikila baami bangu kuŋanda yakwe Limoni, lesa wa bene Silya mukumulambila. Ncakwiila Mwaami Lesa ulaakundekelela!”

¹⁹ Elisha wakaamba ayi, “Koya muluumuno.” Alakwe Naamani wakaya. Naamani ndyaakeendakobo mushinso ufwaafwi,

²⁰ Geyasi musebenshi wakwe Elisha wakalyaamboosha ayi, “Mwaami wangu waleka Naamani waya cakutalipilaawo nabi kaniini! Mbubo neenga watambula shalinga shabenga mwine Silya ulya. Bweenka mbocibete lushinisho ayi Mwaami Lesa ngumuumi, mbweeke ubo ntoomukonkela nje mbweseeko nakaceyi.”

²¹ Mpomunyaawo Geyasi wakakonkela Naamani. Ingayi Naamani abone muntu kaacicila kuli nguwe, wakaseluka mucikoci kuya mukumukumanya. Mpeeke wakamwiipusha ayi, “Sa kuli cabica?”

²² Geyasi wakakumbula ayi, “Sobwe, taaku cabica, sombi baami bangu mbobantuma mukumulwiita ayi balaluki bobilo ba mulikoto lya balaluki ba mucishi ca tulundu ca Efuleemu besa. Ono balisuni ayi mubape maali a silifa ali 3,000 ashakufwala shibotu shobilo.”

²³ Naamani wakakumbula ayi, “Ndakusenga utole maali a silifa ali 6,000.” Wakamukakatisha kushikila wamwaangila maali a silifa ayo mumasaka obilo pantu pomwi ashakufwala shibotu shobilo. Naamani wakashipa basebenshi bakwe bobilo akubatanjisha kunembo lyakwe Geyasi.

²⁴ Ndibakashika kukalundu kwakalinga kwikala Elisha, Geyasi wakabwesa masaka obilo ayo akwaatola muŋanda. Lyalo basebenshi bakwe Naamani wababooshaamo.

²⁵ Geyasi wakaboolela muŋanda waya kunembo lyakwe Elisha. Lyalo Elisha wakamwiipusha ayi, “Ino walinga kuli?” Lakwe Geyasi wakakumbula ayi, “Taaku nkondalinga, nkambo.”

²⁶ Sombi Elisha wakaamba ayi, “Webo utooyeeya ayi nebo nshindalingaako mumushimu ciindi musankwa ulya ndyaaseluka mucikoci kwaamba ayi akukumanye. Cino ciindi tacishi cakutambula maali, shakufwala, myuunda ya maolifi alimwi aya minyansa nabi mbelele, ŋombe alimwi abasebenshi!

²⁷ Ono bulya bulwashi bwakwe Naamani bwa manata butoosa pali ndiwe abamulunyungu bako boonse kwamuyayaya!” Mpomunyaawo Geyasi ndyaakaswaawo wakaba amanata. Cikanda cakwe cakaboolaabo tututu anga ncaandwa.