2 Baami 4 - Baibo Busansulushi Bwa Libuku Ili

Elisha mbwaakacafwa mukalubinje mwanakashi

¹ Bumwi bushiku mukalubinje mwanakashi wa wooyo wakalinga mulikoto lya balaluki wakaya kuli Elisha akwaamba ayi, “Nkambo, beebaangu bakafwa! Mbuli mbomwishi, bakalinga kulemeka Lesa. Ono musankwa umwi ngobakakongolako maali wesa mukubwesa bana bangu bobilo basankwa ayi babe basha kwaamba ayi nkongole imane.”

² Elisha wakamwiipusha ayi, “Ino mulisuni ayi nebo mucitilenshi? Amundwiite ncemucite kuŋanda yanu?” Lakwe wakakumbula ayi, “Taakuuwo. Ndicitebo tufuta twa olifi tuniini munongo.”

³ Lyalo Elisha wakamwaambila ayi, “Kamuya kubeshikamukobonyinaanu akusenga nongo shiinji mutaamu shiliimo.

⁴ Lyalo mwebo abana banu basankwa muye muŋanda akulicalila. Lyalo mutalike kupuumwita mafuta ayo munongo isho. Kulila yesula mweebika kulubasu.”

⁵ Mpomunyaawo mwanakashi uyo wakaya wenjila muŋanda yakwe abana bakwe abo akulicalila. Wakabwesa nongo ya tufuta uto akutalika kupuumwita munongo shimwi isho bana bakwe nshebakalinga kumutambika.

⁶ Ndibakesusha nongo shoonse isho, wakeepusha ayi, “Sa kucili ashimwi?” Umwi musankwa wakakumbula ayi, “Sobwe, iyi njeyakweelaako.” Mpomunyaawo mafuta akamanaamo.

⁷ Lyalo wakaya kuli Elisha mulaluki. Elisha wakaamba ayi, “Kamuya muulishe mafuta ayo mulipile nkongole shoonse. Kulaakuba maali aanji eshi akacaaleewo ayo mwebo abana banu ngweshi munoolyaamo.”

Elisha amwanakashi mubile wa kuShunemu

⁸ Bumwi bushiku Elisha wakaya kuShunemu uko kwakalinga kwikala mwanakashi mubile. Mwanakashi uyo wakamutamba mukulyaakwe. Kuswa bushiku ubo Elisha lyoonse na waya kuShunemu wakalinga kulya kuŋanda ya mwanakashi uyo.

⁹ Mwanakashi uyo wakaamba kuli ibaye ayi, “Nebo ndabona kwaamba ayi uyu musankwa usa kokuno lyoonse ngumuntu usalalite wakwe Lesa.

¹⁰ Atuyake cipinda paciluli ca ŋanda akubikaamo bulo, tebulu, cuuna alimwi alilampi kwaamba ayi anokoonaamo kulilabo na wesa mukutufwakashisha.”

¹¹ Bumwi bushiku Elisha wakaboolela kuShunemu akuya mucipinda cakwe ico mukookesha.

¹² Elisha wakaambila musebenshi wakwe wiitwa ayi Geyasi kuya mukwiita mwanakashi uyo. Ndyaakesa,

¹³ wakaambila Geyasi ayi, “Mwiipushe ayi, ‘Inga ndamucitilanshi ceebo ca lucafwo loonse ndwaatupa kweelana anshetwalinga kupengete? Sa kuliiwo maswi ngweenga kamusuni ayi tumwaambilileeko kumwaami nabi kumutanjilili wa bashilumamba?’ ” Lakwe mwanakashi wakakumbula ayi, “Ndicite shoonse nsheensuni muno mubamakwesu.”

¹⁴ Elisha wakeepusha Geyasi ayi, “Ino inga ndamucitilanshi?” Geyasi wakakumbula ayi, “Citooboneka kwaamba ayi taaciteewo mwaana musankwa alimwi beebaye mbacembele.”

¹⁵ Elisha wakaamba ayi, “Mwiite alimwi.” Mpeeke wakesa weemikana mumulyango.

¹⁶ Lyalo Elisha waamba ayi, “Paciindi ceenka cino mwaaka utoosa ulaakunoocite mwaana musankwa pamaansa.” Mwanakashi wakaamba ayi, “Nkambo, mutambeci nemusebenshi wanu. Mwebo muli bantu ba baLesa!”

¹⁷ Sombi bweenka bwakaamba Elisha, mwanakashi uyo wakamita akutumbuka mwaana musankwa paciindi ceenka ico mumwaaka wakaboolaawo.

¹⁸ Mwaana uyo ndyaakakula, paciindi cakutebula, mwaana musankwa uyo wakaya kuli baishi abo bakalinga abasebenshi mumuunda.

¹⁹ Cakuteengashila wakatalika kulila kuli baishi ayi, “Ndafwa mutwi! Ndafwa mutwi!” Mpomunyaawo Baishi bakaambila musebenshi wabo ayi, “Amumutole kuli banyina.”

²⁰ Musebenshi uyo wakamutola kuli banyina. Mpeeke abalo bakamufukata kushikila lisuba ndilyakashika pakati ka mutwi, lyalo wakafwa.

²¹ Bakamunyamuna bamutola mucipinda cakwe Elisha. Bakamooneka pabulo bwa muntu wakwe Lesa, baswaamo akucalaako kumulyango.

²² Lyalo bakeeta beebaabo akubaambila ayi, “Amuntumineewo musebenshi ambongolo. Ndisuni kuya kumulaluki Elisha. Ntoosa onoonobo.”

²³ Beebaabo bakeepusha ayi, “Ino utookweendelanshi Sunu? Sunu tabushi bushiku bwa Cibelu nabi bwa Mweenshi Upya.” Mwanakashi uyo wakakumbula ayi, “Tacicite mulandu.”

²⁴ Lyalo wakabamba cakwikalaawo pambongolo akwaambila musebenshi wakwe ayi, “Wuume mbongolo kwaamba ayi inooya lubilo. Kutabomba citobo ndaamba ayi bomba.”

²⁵ Mpomunyaawo wakanyamuka waya kuKalundu ka Kamelo uko Elisha kwakalinga. Elisha wakamubona kaacilibo kulaale akwaambila Geyasi musebenshi wakwe ayi, “Bona, mwanakashi wa kuShunemu waashika!

²⁶ Mucicilile unyumfwe na kuli kabotu nkwaaswa. Wiipushe na ibaye nabi mwanaakwe musankwa uli kabotu.” Mwanakashi uyo wakalwiita Geyasi ayi kulibo kabotu.

²⁷ Sombi ndyaakesa kuli Elisha, wakafukama akumucata kushimpanta. Geyasi wakalinga kusuni kumushindikaako, sombi Elisha wakaamba ayi, “Mulekebo mwiine. Sa toobwene ayi kuli camupensha abuumbi mumoyo? Ono Mwaami Lesa taaku ncaandwiita.”

²⁸ Mwanakashi uyo wakamwaambila ayi, “Nkambo, sa ndakamusenga mwaana musankwa? Sa nshikwe kumulwiita ayi mutambeci?”

²⁹ Elisha wakalanga kuli Geyasi akwaamba ayi, “Pimpa mungaanjo wako mulamba! Kweendesha, bwesa nkoli yangu unooya. Na ukumanye muntu munshila utamwaanshi alimwi na muntu wakwaansha utamaani ciindi kumukumbula. Ululamebo kuŋanda akutandabika nkoli yangu pameenso a mwaana musankwa uyo.”

³⁰ Mwanakashi uyo wakaambila Elisha ayi, “Bweenka mbocibete lushinisho ayi Mwaami Lesa ngumuumi, amwebo mbomubete boomi, mbweeke ubo teshi mushiyeewo.” Lyalo abo bobilo bakatalika kuya pantu pomwi.

³¹ Geyasi lakwe wakatanjila kuya, washika akubika nkoli pameenso a mwaana musankwa uyo, sombi taaku cakacitika nabi kunyanyaala kwakaboneka pamwaana uyo. Lyalo Geyasi wakaboolela ayi akumanye Elisha akwaamba ayi, “Mwaana ulya taakwe kubukaawo.”

³² Elisha ndyaakashika wakenjila eenka mucipinda akucana mwaana musankwa ulya kaakungubete pabulo.

³³ Mpomunyaawo wakacala kumulyango akupaila kuMwaami Lesa.

³⁴ Lyalo wakoona pamwaana, kululika mulomo kumulomo, meenso kumeenso alimwi amaansa kumaansa. Ndyaakoona boobo, mubili wa mwaana uyo wakatalika kulungula.

³⁵ Elisha wakabuka, weendeenda mucipinda umo. Mpeeke wakaboolela waya watandabala pamwaana alimwi. Mwaana uyo wakatyamuka mankanda ali osanwe aobilo, lyalo wakalasha.

³⁶ Lyalo Elisha wakeeta Geyasi ayi aambile banyina mwaana benjile. Ndibakenjila wakabaambila ayi, “Ngooyu mwanaako.”

³⁷ Mwanakashi wakawiita pamyeendo yakwe cakushisha ciwa panshi, mpeeke wakabwesa mwanaakwe akuya.

Shaankamiko shobilo shimwi

³⁸ Ono kunembo mucishi coonse ndimwakaba nsala, Elisha wakaboolela kuGilugala. Mpeeke ndyaakalinga kwiisha balaluki, wakaambila musebenshi wakwe ayi abike nongo inene pamulilo akuteleka musushi wa nyama kwaamba ayi balye.

³⁹ Ngayi umwi pabalaluki wakaya muluundu mukuyapa bucisa. Wakacana munyansa wa muluundu akuyapa shisepo shiinji sha nguwo kweelana anshaakalinga kukonsha kunyamuna. Lyalo wakashileta akushitimbweetaako kumusushi kaateshi na nshiseponshi.

⁴⁰ Musushi uyo wakaabilwa bantu ayi balye. Ono ndibakalyaamo bakoolobesha ayi, “NobaElisha, mwabikwa shikola umu!” Mpomunyaawo musushi bakaalilwa kuulya.

⁴¹ Elisha wakasenga busu akubuwaala munongo akwaamba ayi, “Amubabikileemo musushi aumwi.” Mpeeke ndibakalyaako shikola shakamanaamo.

⁴² Lyalo bushiku bumwi musankwa umwi wakaswa kuBaali Shalisha, wakaletela Elisha shinkwa wakalinga makumi obilo wakapangwa abale wakutaanguna mumwaaka uyo. Wakamuletela amitwi ya shili anga ngamaila. Elisha wakaambila musebenshi wakwe ayi ape likoto lya balaluki balye.

⁴³ Sombi wakaamba ayi, “Sa mutooyeeya ayi nguunji cakukwana bantu bali mwaanda?” Elisha wakakumbula ayi, “Bapebo balye mukwiinga Mwaami Lesa waamba ayi batoolya bakute alimwi batoushiyakobo.”

⁴⁴ Mpeeke musebenshi wakabwesa cakulya ico wabapa. Ncakwiila bakalya akuushiyakobo kweelana abwakaamba Mwaami Lesa.