2 Baami 3 - Baibo Busansulushi Bwa Libuku Ili

Inkondo yakaba pabene Isilaeli abene Moabu

¹ Mumwaaka wa likumi amyaaka yosanwe ayotatwe wa bwaami bwakwe Jeoshafati mwaami wa cishi ca Juda, Jolamu mwanaakwe Aabu wakaba mwaami wa cishi ca Isilaeli. Wakalela mucishi ca Samaliya myaaka likumi amyaaka yobilo.

² Wakabisha kuMwaami Lesa sombi kuteelana abaishi nabi baJesebelo banyina. Lakwe wakapwaya libwe ndibakeemika pamusena wakulambililaawo Baali lyakashiya baishi.

³ Nakubi boobo wakakakatila kushibiibi shakalinga kucita Jeloboamu mwanaakwe Nebati akulengesha bene Isilaeli kubisha bweenka mbuli nguwe. Ncakwiila taakwe kushilekaawo.

⁴ Mesha mwaami wa bene Moabu wakalinga kusunga mbelele. Mwaaka womwi awomwi wakalinga kubenga twana twa mbelele tuli 100,000 abooya bwa mbelele shisankwa shili 100,000 ayi ngumusonko.

⁵ Sombi Aabu mwaami wa bene Isilaeli ndyaakafwa, Mesha wakabukila mwaami wa Isilaeli.

⁶ Cakufwambaana mwaami Jolamu wakaswa kuSamaliya akubunganya bashilumamba bakwe boonse.

⁷ Wakatuma nkombe kuli Jeoshafati mwaami wa bene Juda yakwaamba ayi, “Mwaami wa bene Moabu wambukila, sa inga tooncafwiiko kumulwana?” Mwaami Jeoshafati wakakumbula ayi, “Ntoosa! Ndi mumaansaako pantu pomwi abantu bangu alimwi amaaki angu.

⁸ Ninshilanshi njeshi twiinde kuya mukulwana?” Jolamu wakakumbula ayi, “Tutootola ya luyanga lwine Edomu.”

⁹ Mpomunyaawo mwaami Jolamu, mwaami wa bene Juda awa bene Edomu bakanyamuka. Bakeenda kwanshiku shili shosanwe ashobilo. Ono maanshi akamana cakutacaalaawo nabibo tuniini twa bantu nabi shifubwa nshebakalingaasho.

¹⁰ Lyalo mwaami wa bene Isilaeli wakaamba ayi, “Twamana ono! Sa Mwaami Lesa weeta sobamaami sotatwe ayi atwaabe mumaansa a bene Moabu?”

¹¹ Sombi mwaami Jeoshafati wakeepusha ayi, “Sa kuliiwo mulaluki wa Mwaami Lesa weenga watwiipushishaako kuMwaami Lesa?” Lyalo mutanjilili umwi wa bashilumamba bakwe Jolamu wakakumbula ayi, “Elisha mwanaakwe Shapati nkwaali. Wakalinga kucafwa Elija.”

¹² Ono mwaami Jeoshafati wakaamba ayi, “Anu ngumulaluki wancinencine.” Mpeeke bamaami abo botatwe bakaya kuli Elisha.

¹³ Mpeeke Elisha wakaambila mwaami wa bene Isilaeli ayi, “Ceebonshi mwesa kuli ndime? Tamukwe kuyitanshi kubalaluki ba baishiwanu abanyinawanu?” Jolamu wakakumbula ayi, “Sobwe, Mwaami Lesa ngoweeta swebo sobamaami sotatwe ayi atwaabe mumaansa a bene Moabu.”

¹⁴ Elisha wakakumbula ayi, “Bweenka mbocibete lushinisho ayi Mwaami Lesa Shinkusu shoonse uyo ngoonsebensela ngumuumi, mbweeke ubo anebo naakwiinga nshimulanganyiiwo nabi kumukutika nintakwe kupa bulemu baJeoshafati baami ba bene Juda.

¹⁵ Ono amunangweeteewo shikulisha kalumbu.” Ono shikulisha kalumbu ndyaakalinga kukalisha, nkusu sha Mwaami Lesa shakesa pali Elisha.

¹⁶ Mpeeke wakaamba ayi, “Mwaami Lesa waamba ayi, ‘Amukabe shilindi mumulonga uyuminite uyu.

¹⁷ Nabi teshi kube muuwo nabi mfula, uyu mulonga uyuminite utoosula maanshi. Lyalo mwebo, ŋombe shanu ashifubwa shanu shimwi, shoonse shitoonwa maanshi akwaashiyakobo.’ ”

¹⁸ Elisha wakatolelela akwaamba ayi, “KuMwaami Lesa ici ncuububo kucicita alimwi ulaakwaaba abene Moabu mumaansaanu.

¹⁹ Mulaakukoma mandabala oonse acite malinga, kutimbula shisamu shabo sha shisepo, kushinka tuntupu twabo alimwi akunyonyoola myuunda yabo icite bulongo bubotu mukuwaalaamo mabwe.”

²⁰ Macuunsacuunsa ndibwakaca, paciindi cakubenga mulambu maanshi akatalika kukunka kuswa kulubasu lwa Edomu akwisusha musena uyo.

²¹ Ono bene Moabu ndibakanyumfwa ayi bamaami botatwe besa mukubalwana, muntu woonse, nkokwaamba ayi munene amwanike uyo wakalinga kukonsha kunyamuna shakulwanisha, wakeetwa ayi aye kumanyinsa a cishi cabo.

²² Ndibakabuka macuunsa lisuba lyakalinga kubala pamaanshi akulengesha ayi aboneke kusalala anga mbulowa.

²³ Bakaamba ayi, “Mbulowa! Mpashi makoto a bashilumamba ba bamaami botatwe babukilana akucayana beene abeene! Katiya tukasaale misumba yabo.”

²⁴ Sombi ndibakashika kumisumba iyo, bene Isilaeli bakanyamuka akubalwana tibili bacica. Bene Isilaeli bakatolelela kutandaanya bene Moabu akubacayoola.

²⁵ Bakalinga kuya cinyonyoola mandabala abo anene. Na bacana muunda ucite bulongo bubotu, mwine Isilaeli woonse wakalinga kuwaalamo libwe kushikila myuunda yoonse yakesula mabwe. Bakashinka atuntupu alimwi bakatimbula ashisamu sha shisepo. Kumeelelesho kwakacaalabo ndabala inene iitwa ayi Kili Aleseti. Balo beshikuwaala mabwe ashipaya bakashinguluka ndabala iyo akwiilwana.

²⁶ Mwaami wa bene Moabu ndyaakabona ayi waalilwa kukoma nkondo iyo, wakabwesa beshikulwanisha mipeeni bali 700 akweelesha kwiinda pakati ka balwani bakwe ayi alobokele kuEdomu, sombi wakaalilwa.

²⁷ Lyalo wakabwesa mwanaakwe musankwa wakwiiya uyo wakalinga kuyeeyelwa ayi inga wapyana bwaami bwakwe. Wakamutola akuya mukumubenga palubumbu lwa ndabala ayi ngumulambu kuli lesa wa bene Moabu. Bene Isilaeli bakaloonda abuumbi akuswaako kundabala baya kumishaabo.