2 Baami 25 - Baibo Busansulushi Bwa Libuku Ili

Ndabala ya Jelusalemu mboyakakomwa

¹ Mpomunyaawo mumwaaka wasanu ayone wa bwaami bwakwe Sedekiya, pabushiku bwalikumi mumweenshi walikumi, Nebukadinesa mwaami wa bene Babiloni wakanyamuka abashilumamba bakwe kuya mukulwana abene Jelusalemu. Bakayaka misumba yabo pansengwe lya ndabala iyo akuyaka mukuti wakutantilaawo kushingulusha lubumbu lwa njiyo.

² Ndabala yakalinga kushingulukitwe kushikila mwaaka walikumi awomwi wa bwaami bwakwe Sedekiya.

³ Lyalo pabushiku bwasanu ashone, mumweenshi wane wa mwaaka uyo weenka, mundabala iyo nsala yakakomena abuumbi cakwaamba ayi bantu tebakalinga kucitewo cakulya naciceyi.

⁴ Mpeeke bakatulula cilyango mulubumbu lwa ndabala. Nakubi kwaamba ayi bashilumamba bene Babiloni bakalinga kushingulukite ndabala inene iyo, bashilumamba bene Juda boonse bakamana kuloboka ciindi ca mashiku. Bakeenda mumuunda wa bwaami akuya mukuswita kumwinjililo apo pakalinga kukumanina lubumbu. Lyalo bakacica kululama kuCinyika ca Joodani.

⁵ Sombi bashilumamba bene Babiloni bakakonkela mwaami Sedekiya akumweensha kumawesa a Jeliko. Lyalo bashilumamba boonse bakamushiya eenka, mpeeke wakacatwa.

⁶ Mpomunyaawo Sedekiya bakamutola kumwaami Nebukadinesa, uyo wakalinga mundabala inene ya Libula uko nkwaakaya mukupetwa mulandu kuli Nebukadinesa.

⁷ Mpeeke bakacaya bana bakwe Sedekiya boonse kaalangilisha. Kuswawaawo Nebukadinesa wakaamba ayi Sedekiya akushikwe meenso. Lyalo bakamwaanga ncetani sha bulonse akumutola kuBabiloni.

Ŋanda yakwe Lesa mboyakamwayululwa

⁸ Lyalo pabushiku bwasanu ashobilo bwa mweenshi wasanu mumwaaka walikumi amyaaka yosanwe ayone wa bwaami bwakwe Nebukadinesa mwaami wa bene Babiloni, Nebusaladani uyo wakalinga mutanjilili wa beshikulindilila mwaami, wacinenenene wa mwaami wa bene Babiloni, wakenjila muJelusalemu.

⁹ Mpeeke wakatenta Ŋanda yakwe Lesa, ŋanda ya bwaami alimwi amaanda oonse a bacinenenene muJelusalemu.

¹⁰ Bashilumamba boonse bene Babiloni abo bakalinga kutanjililwa amutanjilili wa beshikulindilila mwaami uyo, bakamwayulula lubumbu lwa ndabala inene ya Jelusalemu.

¹¹ Kuswawaawo Nebusaladani wakatola busha kuBabiloni bantu boonse bakacaala mundabala pantu pomwi abaabo bakalinga kucishi shakupangapanga abantu abo bakalinga baya kulubasu lwa bene Babiloni.

¹² Sombi wakashiyabo bakandu abo batakalinga kucitewo buboni akubapa ncito yakulima mumyuunda ya minyansa amumyuunda imwi.

¹³ Mpomunyaawo bene Babiloni bakapwayoola macinko a bulonse, shikoci shakalinga mukati muŊanda yakwe Lesa pantu pomwi acingomo ca bulonse akutola bulonse woonse kuBabiloni.

¹⁴ Bakatola amwakubika milota, mafosholo, shakushimisha malampi, mbale shakubikaamo bulowa bwa milambu, mbale shakutentelaamo tununkila kabotu alimwi ashisebensesho sha bulonse shimwi shoonse sha muŊanda yakwe Lesa.

¹⁵ Mpeeke bakabwesa shikaye sha mulilo ambale shiniini shakusebensesha pakusanseela, nkokwaamba ayi shoonse shintu shakapangwa agolodi nabi silifa.

¹⁶ Ono bulonse kuswa kumacinko obilo, cingomo ashikoci sha muŊanda yakwe Lesa isho shakapanga Solomoni shakalinga shilemu kushipima.

¹⁷ Licinko lyomwi alyomwi lyakalinga kulaampa mamita ali 8. Citwi cakalinga palicinko lyomwi alyomwi cakalinga kulaampa mamita ali 1.3 alimwi cakashingulushikwa ancetani amapomegilaneti a bulonse mukucibotesha.

Bene Juda mbobakatolwa kuBabiloni

¹⁸ Kuswawaawo Nebusaladani, mutanjilili wa beshikulindilila mwaami wakacata busha Selaya mupailishi munene, Sefaniya mupailishi umukonkela kubikaawo abeshikulindilila mwinjililo wa Ŋanda yakwe Lesa botatwe.

¹⁹ Pakati ka baabo bakacaala mundabala inene, wakabwesa mutanjilili wa bashilumamba alimwi abeshikupandaako maano mwaami bali bosanwe. Wakabwesa uyo wakalinga kucafwa mutanjilili wa bashilumamba mukulemba makani a bashilumamba alimwi abacinenenene bakalinga makumi osanwe alikumi lyomwi.

²⁰ Mpomunyaawo, Nebusaladani wakabatola kumwaami wa bene Babiloni uyo wakalinga mundabala ya Libula.

²¹ Uko kuLibula, mucishi ca Amati, mwaami wakapingula ayi bacaikwe. Anu mboboobo bene Juda mbobakatolwa busha kuswa kucishi cabo.

Gedaliya mweendeleshi wa bene Juda

²² Lyalo Nebukadinesa mwaami wa bene Babiloni wakasala Gedaliya mwanaakwe Aikamu mwishikulu wakwe Shafani kuba mweendeleshi wa baabo bakacaala muJuda.

²³ Ono bamatanjilili ba bashilumamba bene Juda pantu pomwi abashilumamba boonse ndibakanyumfwa ayi mwaami wa bene Babiloni wakasala Gedaliya kuba mweendeleshi wa bene Juda, bakaya kuli Gedaliya muMisipa. Meena a bamatanjilili ba bashilumamba ngaaya, Ishimaeli mwanaakwe Netaniya, Jowanani mwanaakwe Kaleya, Selaya mwanaakwe Tanuumeti uyo wakalinga kuswa kundabala ya Netofa alimwi aJesaniya wa kundabala ya Maaka.

²⁴ Mpomunyaawo Gedaliya wakabaambila ayi, “Nebo ntoomushomesha ayi taakuuwo nceenga mwaloonda bacinenenene bene Babiloni. Amwikale mucishi cino munoosebensela mwaami wa bene Babiloni, lyalo shoonse shintu shitoomweendela kabotu.”

²⁵ Lyalo mumweenshi wasanu ayobilo mumwaaka uyo, Ishimaeli mwanaakwe Netaniya mwishikulu wakwe Elishama wakalinga wa mulifumo lya bwaami, wakaya kuMisipa abantu likumi akucaya Gedaliya. Wakacaya abene Isilaeli abene Babiloni abo mbwaakalingaabo.

²⁶ Ono bene Isilaeli boonse, babile abakandu pantu pomwi abamatanjilili ba bashilumamba bakacicila kuIjipiti mukwiinga bakalinga kuloonda bene Babiloni.

Jeoiyakini mbwaakaangululwa muntolongo

²⁷ Mumwaaka Efilu Melodaki ndyaakaba mwaami wa bene Babiloni, wakanyumfwila nkumbu Jeoiyakini mwaami wa bene Juda akumwaangulula kuswa muntolongo. Ici cakacitika pabushiku bwa makumi obilo anshiiku shosanwe ashobilo mumweenshi walikumi amyeenshi yobilo wa mwaaka wamakumi otatwe amyaaka yosanwe ayobilo kuswa ciindi Jeoiyakini ndyaakatolwa busha.

²⁸ Efilu Melodaki wakamulela kabotu akumupa musena wiindaawo bulemu pamisena yakapekwa bamaami bamwi abo bakalinga basha mucishi ca Babiloni.

²⁹ Mpomunyaawo Jeoiyakini bakamusuminisha kufuula shakufwala shakwe sha bukaili akufwala shakufwala shibotu. Wakasuminishikwa kunoolya amwaami kwabuumi bwakwe boonse.

³⁰ Mpeeke bushiku abushiku mwaami wakalinga kupa Jeoiyakini maali akuula shintu nshakalinga kuyanda mubuumi bwakwe.