2 Baami 24 - Baibo Busansulushi Bwa Libuku Ili

¹ Mubwaami bwakwe Jeoiyakimu, Nebukadinesa mwaami wa bene Babiloni wakaya mukulwana cishi ca bene Juda. Mpeeke Jeoiyakimu wakaba musebenshi wakwe Nebukadinesa kwamyaaka yotatwe, lyalo wakamubukila.

² Kuswawaawo Mwaami Lesa wakatuma bashilumamba baanji bene Babiloni, Silya, Moabu alimwi abene Amoni mukulwana Jeoiyakimu. Wakacita boobo kwaamba ayi banyonyoole cishi ca Juda kweelana abwakaamba Mwaami Lesa kwiinda mubalaluki basebenshi bakwe.

³ Ici cakacitika kweelana abwakaamba Mwaami Lesa kwaamba ayi akushe bene Juda pameenso akwe mukwiinga wa shibiibi isho shakacita mwaami Manase.

⁴ Wakacaya bantu baanji abo batacite milandu muJelusalemu. Paceebo ceeco Mwaami Lesa taakwe kumulekelela.

⁵ Shintu shimwi shoonse shakacita Jeoiyakimu shililembetwe mulibuku lya buumi bwa bamaami ba bene Juda.

⁶ Jeoiyakimu wakafwa, lyalo Jeoiyakini mwanaakwe musankwa ngowakapyana bwaami bwakwe.

⁷ Mwaami wa bene Ijipiti abashilumamba bakwe tabakwe kunyamukaawo kuswa muIjipiti kuya mukulwana mukwiinga mwaami wa bene Babiloni wakamunyaya lubasu lwa cishi cakwe kuswa kuMulonga wa Yufuletisi kuya mukushika kunyinsa ya Ijipiti ya kumatwa.

Jeoiyakini mwaami wa bene Juda

⁸ Jeoiyakini wakaba mwaami wa bene Juda kaacite myaaka likumi amyaaka yosanwe ayotatwe. Wakalela muJelusalemu kwamyeenshi yotatwe. Banyina bakalinga baNeushita, mwanaakwe Elinatani wa kuJelusalemu.

⁹ Jeoiyakini wakabishisha Mwaami Lesa mukukonkela bwakacita ishi.

¹⁰ Mubwaami bwakwe Jeoiyakini, bashilumamba bakwe Nebukadinesa mwaami wa bene Babiloni abamatanjilili babo, bakaya kuJelusalemu akushinguluka ndabala iyo.

¹¹ Ndibakalinga kushingulukite ndabala iyo, Nebukadinesa mwiine wakabakonkela kuJelusalemu.

¹² Lyalo mwaami Jeoiyakini mwaami wa bene Juda wakalyaaba mumaansaakwe Nebukadinesa pantu pomwi abanyina, bana bakwe basankwa, bamatanjilili ba bashilumamba alimwi abacinenenene ba kuŋanda ya bwaami boonse. Mumwaaka wasanu ayotatwe wa bwaami bwakwe Nebukadinesa mwaami wa bene Babiloni, Jeoiyakini mwaami wa bene Juda wakatolwa busha kuli nguwe.

¹³ Nebukadinesa wakabwesa abuboni boonse bwa muŊanda yakwe Lesa kubikaawo abwa muŋanda ya bwaami akubutola kuBabiloni. Nebukadinesa wakapwaya shisebensesho sha golodi sha muŊanda yakwe Lesa isho mwaami Solomoni nshaakapanga, bweenka bwakaamba Mwaami Lesa.

¹⁴ Wakatola busha bene Jelusalemu boonse, nkokwaamba ayi bacinenenene, bashilumamba, bacishi shakupangapanga alimwi abeshikufula sheela. Boonse bakacatwa busha bakalinga 10,000. Kwakacaalabo baabo bakalinga bakandu mucishi ca Juda.

¹⁵ Nebukadinesa wakatola busha Jeoiyakini kuBabiloni pantu pomwi abanyina, bamakaakwe, bacinenenene alimwi ababile boonse ba mucishi ca Juda.

¹⁶ Wakatola busha kuBabiloni likoto lyoonse lya bashilumamba bali 7,000, ee, bayumu alimwi bakonsha kuya kunkondo. Wakatola abacishi shakupangapanga alimwi abeshikufula sheela bali 1,000.

¹⁷ Mwaami Nebukadinesa wakabwesa bashimishaabo Jeoiyakini akubabika pabwaami bwa bene Juda akubatumba liina liimbi lya Sedekiya.

Sedekiya mwaami wa bene Juda

¹⁸ Sedekiya wakaba mwaami wa bene Juda kaacite myaaka makumi obilo amwaaka womwi. Wakalela muJelusalemu myaaka likumi awomwi. Banyina bakalinga mbaAmutalu, mwanaakwe Jelemiya wa kundabala ya Libina.

¹⁹ Mwaami Sedekiya wakabishisha Mwaami Lesa bweenka bwakacita mwaami Jeoiyakimu.

²⁰ Mwaami Lesa wakakalala abuumbi pabene Jelusalemu apabene Juda cakwaamba ayi wakabakusha pameenso akwe. Ono mwaami Sedekiya wakabukila mwaami wa bene Babiloni.