2 Baami 23 - Baibo Busansulushi Bwa Libuku Ili

Josiya mbwaakapanga cipangano aMwaami Lesa

¹ Mwaami Josiya wakeeta bamaloba boonse bene Juda alimwi abene Jelusalemu.

² Lyalo bakaya boonse muŊanda yakwe Lesa, kubikaawo bapailishi, balaluki alimwi abantu boonse babile abakandu. Mpeeke mwaami wakabelenga Libuku lyoonse lya Cipangano cakwe Lesa ilyo ndibakacana muŊanda yakwe Lesa kunembo lya bantu boonse abo.

³ Mpomunyaawo mwaami wakeemikana pafwaafwi alicinko lya bwaami akupanga cipangano aMwaami Lesa. Wakashomesha kumunyumfwila akukonkela milawo amilasho yakwe camoyo wakwe woonse abuumi bwakwe boonse. Wakashomesha akucita kweelana ashilembetwe mulibuku ilyo. Mpeeke bantu boonse bakashomesha kulama cipangano ici.

⁴ Lyalo Josiya wakaambila Ilikiya mupailishi munene, bapailishi bakalinga kucafwa mupailishi munene alimwi abaabo bakalinga kulindilila kumwinjililo wa Ŋanda yakwe Lesa ayi balete shintu shoonse isho nshebakalinga kusebensesha pakulambila Baali, Ashela lesa mwanakashi alimwi anyenyeenshi. Mpeeke mwaami wakatenta shintu isho shoonse kunsengwe lya ndabala ya Jelusalemu, pafwaafwi aCinyika ca Kidiloni. Lyalo wakabwesa milota akwiitola kuBetelo.

⁵ Wakakusha ncito bapailishi boonse abo bamaami ba bene Juda mbobakenjisha ayi banoobenga milambu mumisena yakulambililaako ya patulundu mumandabala a muJuda alimwi ayeeyo yakalinga kushingulukite Jelusalemu. Nkokwaamba ayi bapailishi boonse abo bakalinga kubenga milambu kuli Baali, kulisuba, kumweenshi, alimwi akunyenyeenshi.

⁶ Mpeeke muŊanda yakwe Lesa wakakushaamo cikoshanyo cakwe Ashela lesa mwanakashi, wacikusha mundabala akucitola kuCinyika ca Kidiloni kuya mukucitenta uko. Lyalo wakacipelapela kushikila caba busu akusanseela busu ubo pashuumbwe sha bantubo.

⁷ Wakanyonyoola maanda muŊanda yakwe Lesa umo mwakalinga kwikala basankwa bakalinga kucitana bufuule amoomo banakashi mobakalinga kutungila shakufwala shakulambilisha Ashela lesa mwanakashi.

⁸ Wakaleta bapailishi boonse kuJelusalemu kuswa mumandabala a bene Juda. Wakanyonyoola misena yakulambililaako ya patulundu uko bapailishi abo nkobakalinga kubengela milambu kuswa kuGeba tibili akuBiyasheba. Wakapwaya twaanda twa mishimu twakalinga kuminjililo kubikaawo amwinjililo wakayaka Joshuwa, mweendeleshi wa ndabala, iyo yakalinga kucipiko ca mwinjililo unene pakwinjila mundabala.

⁹ Bapailishi ba misena yakulambililaako ya patulundu abo tebakalinga kusuminishikwa kusebensa muŊanda yakwe Lesa, sombi bakalinga kulya cimaande abapailishinyinaabo.

¹⁰ Mwaami Josiya wakanyonyoola musena wakulambililaako wa kuTofeti muCinyika ca Inomu kwaamba ayi taaku muntu weenga wabenga mwanaakwe musankwa nabi mwanakashi ayi ngumulambu wakutenta kuli Moleki.

¹¹ Wakakushaawo amaaki ayo bamaami ba bene Juda ngobakalinga kubenga kulisuba alimwi ashikoci nshebakalinga kusebensesha pakulambila lisuba. Shintu ishi shakalinga kwikala mulubansa lwa Ŋanda yakwe Lesa, pafwaafwi amwinjililo kuteshi kulaale apakalinga kwikala Natani Meleki uyo wakalinga wacinenenene.

¹² Mwaami Josiya wakapwaya shipaililo shakalinga shayaka bamaami ba bene Juda paciluli ca ŋanda ya bwaami, peculu lya cipinda ca mwaami Aasi. Wakapwaya ashipaililo shakayaka mwaami Manase mumansa shobilo sha Ŋanda yakwe Lesa. Wakapwayoola shipaililo isho shakaboolabo anga ngumuseese! Mpeeke wakashisowa muCinyika ca Kidiloni.

¹³ Josiya wakanyonyoola shipaililo isho shakayaka Mwaami Solomoni kwicwe lya Jelusalemu kumalenge aKalundu ka Kunyonyoolwa, isho shakalinga kusebenseshekwa pakulambila shibumbwabumbwa shilensha bunya. Nkokwaamba ayi kulambila Ashitaloti lesa mwanakashi wa bene Sidoni, Kemoshi lesa wa bene Moabu, alimwi aMoleki lesa wa bene Amoni.

¹⁴ Mwaami Josiya wakapwaya macinko asalalite mutupanshapansha. Wakatimboola shikoshanyo shakwe Ashela lesa mwanakashi akufweka waawo mposhakalinga kwiimfwi ashifuwa sha bantu.

¹⁵ Josiya wakanyonyoola musena wakulambililaako muBetelo uyo wakayaka mwaami Jeloboamu mwanaakwe Nebati uyo wakalengesha bene Isilaeli kubisha. Josiya wakapwaya cipaililo, wapwayoola mabwe a ncico tibili ababo anga ndusuko. Lyalo wakatenta cikoshanyo cakwe Ashela.

¹⁶ Lyalo Josiya wakalangalanga wabona shuumbwe apo mukalundu. Wakatuma bantu ayi bakushe shifuwa akushitenta pacipaililo kwaamba ayi bacibiishe kweelana amaswi akaamba Mwaami Lesa kwiinda mumulaluki uyo wakalaluka shintu ishi.

¹⁷ Mpeeke mwaami wakeepusha ayi, “Ino cuumbwe ici nceentoobona ncabaani?” Bene Betelo bakakumbula ayi, “Ncuumbwe ca mulaluki uyo wakalinga waswa kuJuda akulaluka isho shoonse nshewacita pacipaililo ici.”

¹⁸ Mpomunyaawo Josiya wakabalwiita ayi, “Mutacicaati, amucileekebo. Mafuwa akwe taaelete kuseneshekwa.” Lyalo mafuwa akwe tabakwe kwaakushaamo nabi kukusha a mulaluki uyo wakalinga waswa kuSamaliya.

¹⁹ Mumandabala oonse a muIsilaeli, mwaami Josiya wakapwayoola twaanda twa mishimu twa pamisena yakulambililaako ya patulundu iyo yakayaka bamaami ba bene Isilaeli abo bakasonkomona bukali bwa Mwaami Lesa. Mumisena iyo yoonse mwaami Josiya wakacita bweenka mbwaakacita kucipaililo ca kuBetelo.

²⁰ Wakacaya bapailishi ba kumisena yakulambililaako iyo pashipaililo apo mpobakalinga kusebensela. Wakatenta mafuwa a bantu pacipaililo cili coonse. Kuswawaawo wakaboolela kuJelusalemu.

Josiya mbwaakasekelela bushiku bwa Pasika bwakwiibaluka kusotokela

²¹ Mwaami Josiya wakaambila bantu boonse ayi, “Amusekelele bushiku bwa Pasika bwakwiibaluka kusotokela mukulemeka Mwaami Lesa, Lesa wanu kweelana ambocilembetwe muLibuku lya Cipangano.”

²² Takuna kubaawo kale kusekelela bushiku bwa Pasika bwakwiibaluka kusotokela kwa mushobo uyo muciindi ca bamaami ba bene Isilaeli aca bamaami ba bene Juda, kuswa ciindi boomboloshi ndibakalinga kulela cishi.

²³ Sombi mumwaaka walikumi amyaaka yosanwe ayotatwe wa bwaami bwakwe Josiya, bushiku bwa Pasika bwakwiibaluka kusotokela ubo bwakasekelelwa muJelusalemu mukulemeka Mwaami Lesa.

Shintu shimwi shakacita Josiya

²⁴ Mwaami Josiya wakakusha beshikwaamba abafu abeshikulotela pantu pomwi abalesa bamumaanda, shibumbwabumbwa ashimwi shoonse shakalinga kulambilwa isho shilensha bunya mucishi ca Juda amundabala ya Jelusalemu. Wakacita boobo mukukonkela milawo yakalinga kulembetwe mulibuku ilyo Ilikiya mupailishi munene ndyaakacana muŊanda yakwe Lesa.

²⁵ Takuna kubawo kale mwaami wakeelanaakwe mukucita shoonse shakaamba Mwaami Lesa camoyo wakwe woonse amiyeeyo yakwe yoonse ankusu shakwe shoonse. Ncakwiila wakalinga kukonkela Milawo yakwe Mose yoonse.

²⁶ Sombi bukali buyoosha bwa Mwaami Lesa bwakasonkomonwa pabene Juda ceebo ca ceeco cakacita mwaami Manase. Anu asunu asunu tacina kumana.

²⁷ Aboobo Mwaami Lesa wakaamba ayi, “Nebo ndaakucita kucishi ca Juda ico ncendakacita kucishi ca Isilaeli. Ndaakukusha bene Juda kuswa kumeenso angu, kukaka Jelusalemu ndabala iyo njendakasala alimwi aŊanda yangu umo mondakaamba ayi mweshi noolambililwa.”

Bwaami bwakwe Josiya mbobwakamana

²⁸ Shintu shimwi shoonse shakacita mwaami Josiya, shililembetwe mulibuku lya buumi bwa bamaami ba bene Juda.

²⁹ Muciindi ca bwaami bwakwe Josiya, Neko mwaami wa bene Ijipiti wakaya abashilumamba bakwe kuMulonga wa Yufuletisi mukucafwa mwaami wa bene Asilya. Mwaami Josiya wakaya mukulwana bashilumamba bene Ijipiti kuMegido. Lyalo Josiya bakamucaya munkondo iyo.

³⁰ Mpeeke bacinenenene bakwe bakabwesa mubili wakwe mucikoci akuutola kuJelusalemu uko nkobakamubika mucuumbwe cakwe mwiine. Mpomunyaawo bene Juda bakasala Jeowasi mwanaakwe Josiya musankwa ayi apyane bwaami bwakwe.

Jeowasi mwaami wa bene Juda

³¹ Jeowasi wakaba mwaami wa bene Juda kaacite myaaka makumi obilo ayotatwe. Wakalela muJelusalemu kwamyeenshi yotatwe. Banyina bakalinga mbaAmutalu mwanaakwe Jelemiya kuswa kundabala ya Libina.

³² Alakwe wabishisha Mwaami Lesa bweenka bwakacita bamashali bakwe bakulukulu.

³³ Bwaami bwakwe bwakamana Neko mwaami wa bene Ijipiti ndyaakamutola busha kuLibula mucishi ca Amati. Lyalo mwaami Neko wakaambila bene Juda ayi balipile makilogilamu a silifa ali 3,400 alimwi amakilogilamu a golodi ali 34 ayi ngumusonko.

³⁴ Mwaami Neko wakasala Eliyakimu mwanaakwe Josiya ayi abe mwaami wa bene Juda kwaamba ayi apyane bwaami bwakwe Josiya. Mpeeke liina lyakwe lya Eliyakimu wakalisandula kuba Jeoiyakimu. Ono mwaami Neko wakatola Jeowasi kuIjipiti uko nkwaakaya mukufwita.

Jeoiyakimu mwaami wa bene Juda

³⁵ Mwaami Jeoiyakimu wakabwesa maali a musonko kuswa kubantu kweelana anshebakalinga kucite kwaamba ayi akwanishe maali akulipila musonko kumwaami wa bene Ijipiti.

³⁶ Jeoiyakimu wakaba mwaami wa bene Juda kaacite myaaka makumi obilo amyaaka yosanwe. Wakalela muJelusalemu kwamyaaka likumi awomwi. Banyina bakalinga mbaSebida mwanaakwe Pedaya wa kundabala ya Luma.

³⁷ Jeoiyakimu wakabishisha Mwaami Lesa mukukonkela shakacita bamashali bakwe bakulukulu.