2 Baami 22 - Baibo Busansulushi Bwa Libuku Ili

Josiya mwaami wa bene Juda

¹ Josiya wakaba mwaami wa bene Juda kaacite myaaka yosanwe ayotatwe. Wakalela muJelusalemu myaaka makumi otatwe awomwi. Banyina bakalinga mbaJedida, mwanaakwe Adaya. Jedida wakaswa kundabala ya Bosikati.

² Josiya wakacita shiluleme pameenso a Mwaami Lesa mukukonkela shoonse isho shakalinga kucita Defedi mushali wakwe mukulukulu. Wakalinga kukonkela milawo yoonse yakwe Lesa cakutapusa.

Libuku lya milawo mbolyakacanwa

³ Mumwaaka wa likumi amyaaka yosanwe ayotatwe wa bwaami bwakwe, Josiya wakatuma Shafani mulembi mwanaakwe Asaliya musankwa, mwishikulu wakwe Meshulamu, kuya kuŊanda yakwe Lesa. Wakamwaambila ayi,

⁴ “Koya kuli Ilikiya mupailishi munene akwiipusha mweelo wa maali ayo bapailishi basebensela pamulyango waŊanda yakwe Lesa ngobatambulaako kuswa kubantu.

⁵ Lyalo mumwaambile ayi ape maali ayo kubasebenshi batokweendelesha mulimo wakubamba Ŋanda yakwe Lesa. Maali ayo banoofolesha abo batoobamba Ŋanda iyo.

⁶ Nkokwaamba ayi beshikubesa mapulanga, bayaki, beshikubesa mabwe. Aalo mapulanga amabwe akusebensesha pakuyaka anokuulwa mweenka mumaali ayo.

⁷ Ono mbobashomeka kale, tabeelete kulemba mbweshi bakasebenseshe maali ayo, sobwe.”

⁸ Mpeeke Ilikiya mupailishi munene wakalwiita Shafani mulembi ayi, “Ndacana Libuku lya Milawo muŊanda yakwe Lesa.” Mpomunyaawo Ilikiya wakapa Shafani libuku ilyo, lyalo shafani wakalibelenga.

⁹ Kuswawaawo Shafani wakaboolela kumwaami akuluula ayi, “Bacinenenene banu babwesa maali alinga muŊanda yakwe Lesa akupa basebenshi batokweendelesha mulimo wakubamba Ŋanda yakwe Lesa.”

¹⁰ Lyalo wakaamba ayi, “Ndicite alibuku ilyo Ilikiya ndyaampa.” Lyalo wakalibelengela mwaami.

¹¹ Mpomunyaawo mwaami ndyaakanyumfwa maswi a muLibuku lya Milawo ilyo, wakakwamoona shakufwala shakwe mubuumba.

¹² Lyalo wakaambila Ilikiya mupailishi, Ayikamu mwanaakwe Shafani, Akibo mwanaakwe Mikaya, Shafani mulembi alimwi akuli Asaya shikucafwa mwaami ayi,

¹³ “Kamuya mukeepushileko ndime abene Juda boonse kuMwaami Lesa pasheesho shilembetwe mulibuku lya Milawo ili lyacanikwa. Mwaami Lesa ulikalalite abuumbi pali ndiswe mukwiinga bamashali besu bakulukulu tabakwe kukonkela maswi ali mulibuku ili.”

¹⁴ Lyalo Ilikiya, Ayikamu, Akibo, Shafani alimwi aAsaya bakaya mukwiipusha kuli Ulida, mulaluki mwanakashi wakalinga kwikala cipansha cipya ca Jelusalemu. Shalumu mwanaakwe Tikifwa mwishikulu wakwe Ayasi wakalinga ngoibaye. Shalumu wakalinga kulama shisani sha muŊanda yakwe Lesa. Mpeeke bakamulwiita isho shakacitika.

¹⁵ Lyalo wakabaambila ayi baboolele kumwaami akumulwiita ayi,

¹⁶ “Mwaami Lesa waamba ayi, ‘Ntoopa Jelusalemu mulandu pantu pomwi abantu boonse bekalaamo bweenka mbocilembetwe mulibuku ilyo mwaami ndyaabelenga.

¹⁷ Bakankaka alimwi bakalinga kubenga milambu kubalesa bamwi, ono bulya basonkomona bukali bwangu ceebo ca shintu nshebakacita. Bukali bwangu pandabala ya Jelusalemu mbunene abuumbi alimwi teshi bukamaane.

¹⁸ Sombi mulwiite mwaami wa bene Juda uyo wamutuma ayi mwiipushe kuli ndime neMwaami Lesa, ayi nebo neMwaami Lesa, Lesa wa bene Isilaeli, ndaamba ayi webo wakutika shakalembwa mulibuku.

¹⁹ Wasanduka kuswa kushibiibi shako akulibombya pameenso angu kwiinda mukukwamoona shakufwala shako akulila ndiwakanyumfwa mbondakalinga kupinga kupa mulandu kundabala ya Jelusalemu abantu bekalaamo. Ndaakucita boobo ilaakunooyoosha kwiilanga. Ncakwiila ilaakuba musena uyo bantu ngweshi bakanoosebensesha pakushingana. Sombi ndanyuumfwa kusenga kwako.

²⁰ Aboobo webo ulaakufwabo muluumuno kaantana kupa mulandu ndabala ya Jelusalemu.’ ” Lyalo basankwa abo bakaboolela kumwaami Josiya amakani ayo.