2 Baami 21 - Baibo Busansulushi Bwa Libuku Ili

Manase mwaami wa bene Juda

¹ Manase wakaba mwaami wa bene Juda kaacite myaaka likumi ayobilo. Wakalela muJelusalemu kwamyaaka makumi osanwe amyaaka yosanwe. Banyina bakalinga mbaEfusiba.

² Wakabishisha Mwaami Lesa mukukonkela kwishibila kulensha bunya kwa baabo Mwaami Lesa mbwaakatanda mucishi cabo.

³ Wakayakulula misena yakulambililaako ya patulundu iyo yakanyonyoola Esekiya. Wakayaka ashipaililo shakulambililaawo Baali akubumba cikoshanyo cakwe Ashela lesa mwanakashi bweenka bwakalinga bwacita Aabu mwaami wa bene Isilaeli. Manase lakwe wakalinga kulambila anyenyeenshi.

⁴ Wakayaka shipaililo sha bakunsengwe muŊanda yakwe Lesa umo Mwaami Lesa mwakaamba ayi, “MuJelusalemu mweshi nkanoolambililwa.”

⁵ Mumansa shobilo sha Ŋanda yakwe Lesa, wakayakaamo shipaililo shakulambililaamo nyenyeenshi.

⁶ Wakabenga mwanaakwe musankwa ayi ngumulambu wakutenta. Wakalinga kusonda, kucita buloshi alimwi wakalinga kucebusha akwiipusha kubeshikwaamba abafu. Paceebo ceeco wakabisha abuumbi kuMwaami Lesa akusonkomona bukali bwakwe.

⁷ Wakabika cikoshanyo cakwe Ashela lesa mwanakashi muŊanda yakwe Lesa, mumusena uyo Mwaami Lesa ngwaakaamba kuli Defedi aSolomoni mwanaakwe musankwa ayi, “Muno muJelusalemu muŊanda yakwe Lesa iyi, ngomusena ngondakasala mucishi coonse ca mikowa ya bene Isilaeli ili likumi ayobilo kwaamba ayi mweshi nkanoolambililwaamo.

⁸ Na bene Isilaeli boonse bakanookonkela milawo yangu akunoobamba Milawo yoonse iyo Mose musebenshi wangu njaakabapa, lyalo teshi nkabatandeewo mucishi ico ncendakapa bamashali babo bakulukulu.”

⁹ Sombi bene Juda tabakwe kunyumfwila Mwaami Lesa. Mpeeke Manase wakabalengesha ayi beendeewo kubisha pabaabo Mwaami Lesa mbwaakatanda mucishi kunembo lyabo.

¹⁰ Kwiinda mubasebenshi bakwe balaluki Mwaami Lesa wakaamba ayi,

¹¹ “Manase mwaami wa bene Juda wacita shibiibi ishi shiyoosha, ncakwiila shiinda pasheesho sha bene Amoli abo bataanshi kwikala mucishi ico. Wakatanjilila bene Juda mukubisha kwiinda mukulambila shibumbwabumbwa shakwe.

¹² Aboobo ayi nebo neMwaami Lesa, Lesa wa bene Isilaeli, ndaakuleta mapensho pandabala ya Jelusalemu apacishi ca Juda ayo eshi akakankamike muntu weshi akaanyumfwe.

¹³ Ndaakupa bene Jelusalemu mulandu bweenka mbondakapa bene Samaliya aAabu mwaami wa bene Isilaeli abamulunyungu lwakwe. Ndaakusalasha ndabala ya Jelusalemu bweenka muntu mbwaapukuta mbale akwisulika.

¹⁴ Ndaakufutatila abo beshi bakacaaleewo akubaaba mumaansa a balwani babo. Balwani abo balaakubakoma akusaala cishi cabo.

¹⁵ Ndaakucita boobo mukwiinga balambishisha akusonkomona bukali bwangu kuswa bushiku bamashali babo bakulukulu ndibakaswa muIjipiti kushikila asunu.”

¹⁶ Manase wakacaya bantu baanji batacite milandu, abo bacite bulowa bwakalinga kukunka mumikwakwa ya muJelusalemu, kwiilika pabubi bwakutanjilila bene Juda ayi balambile shibumbwabumbwa ico cakalengesha ayi babishishe Mwaami Lesa.

¹⁷ Shintu shimwi shoonse shakacita Manase, kubikaawo ashibiibi nshaakacita, shililembetwe mulibuku lya buumi bwa bamaami ba bene Juda.

¹⁸ Mpeeke Manase wakafwa akubikwa mumuunda wa ŋanda ya bwaami nkokwaamba muunda wa Usa. Lyalo Amoni mwanaakwe ngowakapyana bwaami bwakwe.

Amoni mwaami wa bene Juda

¹⁹ Amoni wakaba mwaami wa bene Juda kaacite myaaka makumi obilo amyaaka yobilo. Wakalela muJelusalemu kwamyaaka yobilo. Banyina bakalinga mbaMeshulemeti mwanaakwe Alusi wakaswa kundabala ya Jotiba.

²⁰ Ono alakwe wakabishisha Mwaami Lesa bweenka bwakacita Manase ishi.

²¹ Wakakonkela nshila shakwe ishi. Ncakwiila wakalinga kulambila shibumbwabumbwa shakalinga kulambila ishi.

²² Wakakaka Mwaami Lesa, Lesa wa bamashali bakwe bakulukulu alimwi taakwe kunyumfwila milawo yakwe.

²³ Lyalo bacinenenene bakwe Amoni bakamupingila kumucaya. Ncakwiila bakamucaya muŋanda yakwe ya bwaami.

²⁴ Kuswawaawo bene Juda bakacaya baabo bakacaya mwaami Amoni akupa Josiya mwanaakwe bwaami bwakwe.

²⁵ Shintu shimwi shoonse shakacita Amoni, shililembetwe mulibuku lya buumi bwa bamaami ba bene Juda.

²⁶ Amoni wakabikwa mucuumbwe ca mumuunda wa Usa. Lyalo Josiya mwanaakwe ngowakapyana bwaami bwakwe.