2 Baami 20 - Baibo Busansulushi Bwa Libuku Ili

Mwaami Esekiya mbwaakaciswa akuba kabotu

¹ Muciindi ico ceenka mwaami Esekiya wakaciswa cakufwabo. Lyalo Isaya mulaluki mwanaakwe Amosi wakaya mukumubona. Mpeeke wakamulwiita ayi, “Mwaami Lesa waamba ayi, ‘Bamba kabotu shintu shako shoonse mukwiinga teshi upuluke. Libambile kufwa.’ ”

² Esekiya wakasanduluka walanga kulubumbu akupaila ayi,

³ “NoBaami baLesa, amwiingashile kwaamba ayi ndakalinga kumusebensela cakushomeka alimwi camoyo woonse. Lyoonse ndakalinga kucita shintu nshemwakalinga kusuni ayi ncite.” Kuswawaawo wakalila abuumbi.

⁴ Lyalo Isaya wakashiya mwaami. Sombi kaatana kwiinda mulubansa lwa ŋanda ya bwaami, Mwaami Lesa wakamwaambila ayi,

⁵ “Boola kuli Esekiya, mutanjilili wa bantu bangu uye umulwiite ayi, ‘Nebo neMwaami Lesa, Lesa wakwe Defedi mushali wako mukulukulu, ndanyuumfwa mupailo wako akulila kwako. Ntookushilika, lyalo pakwiinda nshiku shotatwe ukaye kuŊanda yangu.

⁶ Ndaakukunungilaako myaaka ili likumi ayosanwe. Ndaakufuna ndiwe andabala ya Jelusalemu kumwaami wa bene Asilya. Ndaakufuna ndabala ino ceebo ca bulemu bwangu acakwe Defedi musebenshi wangu.’ ”

⁷ Mpomunyaawo Isaya wakaambila beshikucafwa mwaami ayi, “Amubike mashina a mukuyu pacuute ca mwaami, lyalo utooba kabotu.”

⁸ Mwaami Esekiya wakeepusha Isaya ayi, “Ino citondeshonshi Mwaami Lesa nceshi atondeshe ayi utoonshilika kwaamba ayi panshiku shotatwe nkaye kuŊanda yakwe Lesa?”

⁹ Isaya lakwe wakakumbula ayi, “Mwaami Lesa utookupa citondesho kwaamba ayi ulaakucita kweelana akushomesha kwakwe. Ono sa ulisuni ayi cimfule ca pacitantilo cisene kunembo matantilo likumi nabi cisene kwisule matantilo likumi?”

¹⁰ Esekiya wakakumbula ayi, “Ncibombu kusenya cimfule kunembo matantilo likumi! Sombi atubone na inga casena mwisule matantilo likumi.”

¹¹ Mpomunyaawo Isaya mulaluki wakapaila kuMwaami Lesa. Lyalo Mwaami Lesa wakalengesha ayi cimfule cisene mwisule matantilo likumi pacitantilo cakapanga mwaami Aasi.

Beshinkombe bakaswa kuBabiloni

¹² Paciindi ceenka ico Melodaki Baladani mwanaakwe Baladani, mwaami wa bene Babiloni, wakanyumfwa ayi mwaami Esekiya ngumulwashi. Paceebo ceeco wakamutumina nkalata alimwi acipo.

¹³ Esekiya wakatambula beshinkombe alimwi wakabatondesha buboni bwakwe boonse, nkokwaamba ayi silifa, golodi, tununkila kabotu mubuyani, mafuta anunkila kabotu, shakulwanisha shakwe shoonse alimwi abuboni boonse bwakalinga mushipinda shakwe shakubusungilamo. Taaku cintu nabi comwi muŋanda ya bwaami nabi mubuleelo bwakwe boonse cakacaala kutababonesha.

¹⁴ Mpomunyaawo Isaya mulaluki wakaya mukwiipusha mwaami Esekiya ayi, “Ino bantu balya baswa kuli alimwi baamba ayinshi?” Esekiya wakakumbula ayi, “Baswabo kulaale, kucishi ca Babiloni.”

¹⁵ Isaya wakeepusha ayi, “Babonaawonshi muŋanda ya bwaami muno?” Esekiya wakakumbula ayi, “Shoonsebo bashibona. Taaku cintu nabi comwi mushipinda shangu shakusungilamo buboni nceentakwe kubabonesha.”

¹⁶ Mpomunyaawo Isaya wakalwiita mwaami ayi, “Mwaami Lesa Shinkusu shoonse waamba ayi,

¹⁷ ‘Ciindi cilaakushikila buboni boonse bwa muŋanda yako ya bwaami, pantu pomwi asheesho bamashali bako bakulukulu nshebakasunga kushikila bushiku bwa sunu. Shoonse shilaakutolwa kucishi ca Babiloni. Ncakwiila taaku ceshi cikacaale.

¹⁸ Bamulunyungu lwako bamwi, bulowa bwako omwiine, balaakubatola kuya mukuba basebenshi bakacaikwa lushalo muŋanda ya mwaami wa bene Babiloni.’ ”

¹⁹ Mwaami Esekiya lakwe wakanyumfwa ayi kulaakuba luumuno paciindi ca bwikaalo bwakwe. Aboobo wakakumbula ayi, “Maswi a Mwaami Lesa ngowandwiita ngabotu.”

Buleelo bwakwe Esekiya mbobwakamana

²⁰ Shintu shimwi shoonse shakacita mwaami Esekiya, kuswitilila kwakwe alimwi ambwaakayaka cishiba amufolo wakuleta maanshi mundabala inene shililembetwe mulibuku lya buumi bwa bamaami ba bene Juda.

²¹ Mpeeke Esekiya wakafwa. Lyalo Manase mwanaakwe ngowakapyana bwaami bwakwe.