2 Baami 17 - Baibo Busansulushi Bwa Libuku Ili

Osheya mwaami wa bene Isilaeli

¹ Mumwaaka walikumi ayobilo wa bwaami bwakwe Aasi mwaami wa bene Juda, Osheya mwanaakwe Ela wakaba mwaami wa bene Isilaeli. Wakalela muSamaliya kwamyaaka yosanwe ayone.

² Wakabisha kuMwaami Lesa, sombi kubisha kwakwe takukwe kweelana akubisha kwa bamaami bakataanguna pali nguwe.

³ Ono Shalimanesa mwaami wa bene Asilya wakesa mukulwana Osheya. Mpeeke Osheya wakalyaaba mumaansaakwe akutalika kumupa misonko pamwaaka amwaaka.

⁴ Sombi mwaaka umwi Osheya wakatuma nkombe kuli So mwaami wa bene Ijipiti kusenga lucafwo kuli nguwe. Wakacileka kupa misonko ya pamwaaka amwaaka kumwaami wa bene Asilya. Shalimanesa ndyaakanyumfwa cikani ico, wakacata Osheya akumubika muntolongo.

Ndabala ya Samaliya mboyakakomwa

⁵ Kuswawaawo Shalimanesa wakaya mukulwana cishi ca Isilaeli akushinguluka ndabala ya Samaliya kwamyaaka yotatwe.

⁶ Mumwaaka wasanu ayone wa bwaami bwakwe Osheya, mwaami wa bene Asilya wakakoma ndabala ya Samaliya akutola busha bene Isilaeli kucishi ca Asilya. Bamwi wakabekalika mundabala ya Ala, bamwi kufwaafwi aMulonga wa Aboli mumusena wiitwa ayi Gosani, bamwi mumandabala anene a mucishi ca bene Medi.

⁷ Ndabala ya Samaliya yakakomwa mukwiinga bene Isilaeli bakabisha kuMwaami Lesa, Lesa wabo uyo wakabafuna kumwaami wa bene Ijipiti akubakusha mubusha. Bakalinga kulambila balesa bamwi,

⁸ akukonkela kwishibila kwa bantu abo Mwaami Lesa mbwaakatanda mucishi cabo. Bakatambula amicito iyo yakaletwa abamaami ba bene Isilaeli.

⁹ Bene Isilaeli bakacita shintu Mwaami Lesa nshaatakwe kusuminisha. Bakalinga kupanga misena yakulambililaako ya patulundu mumandabala abo oonse, nkokwaamba ayi aniini alimwi aanene.

¹⁰ Patulundu toonse amunshaashisamu shicite shimfule shibotu bakeemika mabwe akuyaka shikoshanyo shakwe Ashela lesa mwanakashi.

¹¹ Pamisena yoonse yakulambililaako ya patulundu bakalinga kutentelaawo tununkila kabotu mukukonkela kwishibila kwa bantu abo Mwaami Lesa mbwaakatanda mucishi cabo. Aboobo bakasonkomona bukali bwa Mwaami Lesa ceebo ca micito yabo ibiibi.

¹² Munshila iyo tabakwe kunyumfwila mulasho wa Mwaami Lesa wakwaamba ayi, “Tamweelete kulambila shibumbwabumbwa.”

¹³ Mwaami Lesa wakatuma beshinkombe abalaluki mukucenjesha bene Isilaeli abene Juda ayi, “Amusanduke kuswa kushibiibi shanu akunyumfwila milawo amilasho iyo icanwa muMilawo njindakapa bamashali banu bakulukulu kwiinda mubalaluki basebenshi bangu.”

¹⁴ Sombi tabakwe kumunyumfwila. Ncakwiila bakalinga beshicimpamya mbuli bamashali babo bakulukulu abo batakwe kushoma muMwaami Lesa, Lesa wabo.

¹⁵ Bakakaka milasho yakwe yoonse acipangano ico ncaakapanga abamashali babo bakulukulu alimwi akucenjesha uko nkwaakabapa. Bakalinga kulambila shibumbwabumbwa shitacite ncito abalo bakaba bantu batacite ncito. Bakakonkela bwikaalo bwa bantu bakalinga kubashingulukite nabi Mwaami Lesa wakabaambila ayi, “Mutanoocita isho nshebacita.”

¹⁶ Bakapwaya milawo yoonse ya Mwaami Lesa, Lesa wabo alimwi bakabumba bacende baana ba golodi ayi mbakulambila. Bakapanga acikoshanyo cakwe Ashela lesa mwanakashi, bakalinga kulambila nyenyeenshi akulambila Baali.

¹⁷ Bakalinga kubenga bana babo basankwa abanakashi ayi njimilambu yakutenta, bakalinga kuya kubeshikusonda akubeshikulotela. Ncakwiila bakabika maano abo oonse kushintu shitacite ncito kumeenso a Mwaami Lesa. Paceebo ceeco bakasonkomona bukali bwakwe.

¹⁸ Aboobo Mwaami Lesa wakakalala abuumbi pabene Isilaeli akubatandaanya kuswa pameenso akwe, kushiyakobo bamumukowa wakwe Juda.

¹⁹ Nakubi boobo abalo bene Juda tabakwe kukonkela milawo ya Mwaami Lesa, Lesa wabo. Bakakonkela kwishibila kwa bene Isilaeli.

²⁰ Mwaami Lesa wakakaka bene Isilaeli boonse. Wakabapa mulandu akubaaba mumaansa a balwani babo beshilunkutwe tibili wabatanda kuswa pameenso akwe.

²¹ Pesule Mwaami Lesa ndyaakamana kupansaanya bene Isilaeli kuswa kubene Juda, bene Isilaeli bakasala Jeloboamu mwanaakwe Nebati ayi abe mwaami wabo. Mpeeke Jeloboamu wakabalengesha kukaka Mwaami Lesa akucita cibiibi ciyoosha.

²² Abalo bakamukonkela akukakatila mushibiibi shoonse shakalinga kucita Jeloboamu

²³ kushikila bushiku Mwaami Lesa ndyaakabatanda kuswa pameenso akwe. Bakacita boobo kweelana ambwaakalinga apa kucenjesha kwiinda mubasebenshi bakwe balaluki. Aboobo bene Isilaeli bakatolwa busha kucishi ca Asilya uko nkobabete abobulya.

Bene Asilya mbobakekala mucishi ca Isilaeli

²⁴ Mwaami wa bene Asilya wakabwesa bantu kuswa mundabala ya Babiloni, Kuta, Afa, Amati alimwi aya Sefafaimu akuya mukubabika mumandabala a mucishi ca Samaliya, kwaamba ayi baboolele pamusena wa bene Isilaeli. Lyalo bakabwesa mandabala ayo akwikalaamo.

²⁵ Ndibakatalika kwikala uko, tebakalinga kulambila Mwaami Lesa. Lyalo Mwaami Lesa wakatuma nkalamu isho shakacayawo bamwi pakati kabo.

²⁶ Mpomunyaawo cakaluulwa kumwaami wa bene Asilya ayi, “Bantu abo mbomwakatuma mukwikala mumandabala a mucishi ca Samaliya tabeshi milawo yakwe Lesa wa cishi ico. Paceebo ceeco wakabatumina nkalamu isho shitoobacaya.”

²⁷ Lyalo mwaami wa bene Asilya uyo wakaamba ayi, “Amutume mupailishi womwi pakati kabasha mbotwakacata ayi aboolele kuya mukwiisha bantu milawo yakwe Lesa wa mucishi cilya.”

²⁸ Mpomunyaawo mupailishi mwine Isilaeli uyo wakatolwa busha kuswa kuSamaliya wakaya wekala muBetelo, uko nkwaakekala akwiisha bantu mbobalambila Mwaami Lesa.

²⁹ Sombi likoto lya mushobo womwi awomwi wa bantu lyakapanga lesa wa nguwo mumandabala ayo ngobakalinga kushiiteemo muSamaliya. Balesa abo bakababika mumisena yakulambililaako ya patulundu iyo yakayaka bene Samaliya.

³⁰ Bene Babiloni bakabumba shibumbwabumbwa shakwe Sakoti Benoti. Bene Kuta abalo bakabumba shakwe Negali. Balo bene Amati bakabumba shakwe Ashima.

³¹ Bene Afa bakabumba shakwe Nibasi ashakwe Tataki. Bene Sefafaimu bakabenga bana babo ayi njimilambu yakutenta kuli Adilameleki aAnameleki balesa babo.

³² Aba bantu abalo bakalinga kulambila Mwaami Lesa. Sombi pakati kabo bakalinga kusala bamwi kuba bapailishi ba mumisena yakulambililaako ya patulundu.

³³ Bakalinga kulambila Mwaami Lesa, sombi bakalinga akulambila balesa babo beene kweelana akwishibila kwa mushishi uko nkobakakushikwa.

³⁴ Ncakwiila kushikila asunu bacicita kweelana akwishibila kwabo kukulukulu. Tabalambiliwo Mwaami Lesa nabi kukonkela milasho amilawo iyo Mwaami Lesa njaakapa bamulunyungu lwakwe Jakobo uyo ngwaakatumba ayi Isilaeli.

³⁵ Mwaami Lesa wakapanga cipangano ambabo akubaambila ayi, “Mutanoolambila balesa bamwi, kubafukamina, kubasebensela nabi kubenga milambu kuli mbabo.

³⁶ Kamunyumfwila ndime neMwaami Lesa, nendakamukusha muIjipiti ankusu shiinji abulemu. Mulyeelete kumfukamina akubenga milambu yanu kuli ndime.

³⁷ Mulyeelete kukonkela milasho amilawo lyoonse iyo njendakamulembela. Mutanoolambila balesa bamwi.

³⁸ Mutakaluubi cipangano ncendakapanga amwebo. Mutanoolambila balesa bamwi.

³⁹ Sombi kamulambilabo ndime neMwaami Lesa, Lesa wanu. Nebo ndaakumufuna kuswa kubalwani banu.”

⁴⁰ Nakubi boobo bantu abo tabakwe kunyumfwa, bakatolelela amicito yabo ikulukulu.

⁴¹ Ncakwiila bantu abo bakalinga kulambila Mwaami Lesa, sombi bakatolelela akulambila shibumbwabumbwa shabo. Ono kushikila abobulya bamulunyungu lwabo bacicita bweenka ubo.