2 Baami 16 - Baibo Busansulushi Bwa Libuku Ili

Aasi mwaami wa bene Juda

¹ Mumwaaka walikumi amyaaka yosanwe ayobilo wa bwaami bwakwe Peka mwanaakwe Lemaliya mwaami wa bene Isilaeli, Aasi mwanaakwe Jotamu wakaba mwaami wa bene Juda.

² Wakaba mwaami kaacite myaaka makumi obilo. Wakalela muJelusalemu kwamyaaka likumi amyaaka yosanwe awomwi. Taakwe kukonkela bwakacita Defedi mushali wakwe mukulukulu, sombi wakacita shitaluleme pameenso a Mwaami Lesa, Lesa wakwe.

³ Wakakonkela shakacita bamaami ba bene Isilaeli. Lakwe wakabenga amwanaakwe ayi ngumulambu wakutenta kushibumbwabumbwa mukukonkela kwishibila kulensha bunya kwa baabo Mwaami Lesa mbwaakatanda mucishi cabo.

⁴ Aasi wakalinga kubenga milambu akutenta tununkila kabotu kumisena yakulambililaako ya patulundu alimwi amunshaashisamu shicite shimfule shibotu.

⁵ Lesini mwaami wa bene Silya aPeka mwaami wa bene Isilaeli bakalwana abene Jelusalemu akushinguluka ndabala yabo iyo. Sombi bakaalilwa kukoma Aasi.

⁶ Paciindi ceenka ico mwaami wa bene Edomu wakaboosha ndabala ya Elati mumaansaakwe akutandaamo baJuda. Bene Edomu bakekala muElati alimwi acecino ciindi mobekala.

⁷ Aasi wakatuma beshinkombe kuli Tigilati Pilesa mwaami wa bene Asilya amakani akwaamba ayi, “Nebo ndi musebenshi wanu ushomeka. Kamwisa mumfuneeko kumwaami wa bene Silya awa bene Isilaeli abo batoondwana.”

⁸ Wakabwesa silifa agolodi kuswa muŊanda yakwe Lesa alimwi amucipinda ca buboni ca muŋanda ya bwaami akushitola kumwaami wa bene Asilya ayi ncipo.

⁹ Tigilati Pilesa, mukucita kweelana akusenga kwakwe Aasi wakaya abeshilumamba mukulwana ndabala ya Damasikasi. Wakeekoma, wacaya mwaami Lesini akutola bantu busha kuKili.

¹⁰ Lyalo mwaami Aasi wakaya kuDamasikasi kuya mukukumanya Tigilati Pilesa mwaami wa bene Asilya. Ono wakabona cipaililo uko akutuma cikoshanyo ca ncico kuli Uliya mupailishi kwaamba ayi akaboneshe mbobakaciyaka.

¹¹ Mpomunyaawo Uliya mupailishi wakayaka cipaililo bweenka mbuli mushobo wa ceeco ca kuDamasikasi. Wakacimanisha mwaami Aasi kataana kuboola.

¹² Ndyaakaboola kuswa kuDamasikasi wakacana cipaililo camana kuyakwa. Wakasena pafwaafwi akubenga milambu pali ncico.

¹³ Nkokwaamba ayi wakabenga milambu yakutenta alimwi acipo ca fulaulo, watilaawo cipo ca cakunwa akusanseela bulowa bwa mulambu wa bwanabwanakashi pacipaililo ico.

¹⁴ Cipaililo cakapangwa abulonse cakabengwa kuMwaami Lesa cakalinga pakati ka cipaililo cipya aŊanda yakwe Lesa. Lyalo Aasi wakacisenya kumatwa acipaililo cipya.

¹⁵ Mpomunyaawo Aasi wakapa Uliya mupailishi milasho ayi, “Kosebensesha cipaililo cangu ici cinene kubengelaawo milambu yakutenta ya macuunsa, shipo sha fulaulo sha macolesha, milambu yakutenta ashipo sha fulaulo sha mwaami alimwi asha bantu kubikaawo ashipo sha cakunwa sha bantu. Munoosanseelawo bulowa boonse bwa banyama babengwa. Sombi cipaililo ca bulonse ndanoocisebensesha kusenga kuyanda kwakwe Lesa.”

¹⁶ Aboobo Uliya mupailishi wakacita bweenka mwaami Aasi mbwaakamulwiita.

¹⁷ Mwaami Aasi wakabwesa cipansha ca cikoci ca bulonse cakalinga kusebenseshekwa kuŊanda yakwe Lesa akukusha mbale shakalinga pali ncico. Wakabwesa acingomo ca bulonse cakalinga pamisana ya bacende ba bulonse bakalinga likumi abobilo, akucibika palwiimbi lwa mabwe.

¹⁸ Lyalo kwaamba ayi mwaami wa bene Asilya akondwe, Aasi wakakusha cakayakwa ayi kapekala cuuna ca bwaami akucala nshila yakalinga kwinjililako mwaami eenkabo.

¹⁹ Shintu shimwi shoonse shakacita mwaami Aasi shililembetwe mulibuku lya buumi bwa bamaami ba bene Juda.

²⁰ Aasi wakafwa akubikwa mushuumbwe sha bamaami muNdabala yakwe Defedi. Esekiya mwanaakwe ngowakapyana bwaami bwakwe.