2 Baami 15 - Baibo Busansulushi Bwa Libuku Ili

Asaliya mwaami wa bene Juda

¹ Mumwaaka wamakumi obilo amyaaka yosanwe ayobilo wa bwaami bwakwe Jeloboamu mwaami wa bene Isilaeli, Asaliya mwanaakwe Amasiya wakaba mwaami wa bene Juda.

² Wakalinga kucite myaaka likumi amyaaka yosanwe awomwi. Wakalela kwamyaaka makumi osanwe ayobilo muJelusalemu. Banyina bakalinga baJekoliya bene Jelusalemu.

³ Wakacita shiluleme pameenso akwe Lesa bweenka bwakacita Amasiya ishi.

⁴ Nakubi boobo misena yakulambililaako ya patulundu taikwe kunyonyoolwa. Aboobo bantu bakatolelela kubenga milambu akuya mukutenta tununkila kabotu uko.

⁵ Ono Mwaami Lesa wakalengesha Asaliya kuba abulwashi bwa manata ubo bwakakatila kushikila ndyaakafwa. Wakalinga kwikalabo muŋanda eenka. Jotamu mwanaakwe ngowakalinga kulama ŋanda ya bwaami akweendelesha bantu ba mucishi.

⁶ Shintu shimwi shoonse shakacita Asaliya shililembetwe mulibuku lya buumi bwa bamaami ba bene Juda.

⁷ Asaliya wakafwa akubikwa kushuumbwe sha bamaami muNdabala yakwe Defedi. Lyalo Jotamu mwanaakwe wakapyana bwaami bwakwe.

Sekaliya mwaami wa bene Isilaeli

⁸ Mumwaaka wa makumi otatwe aosanwe aotatwe wa bwaami bwakwe Asaliya mwaami wa bene Juda, Sekaliya mwanaakwe Jeloboamu wakaba mwaami wa bene Isilaeli. Wakalela muSamaliya kwamyeenshi yosanwe awomwi.

⁹ Ono alakwe wakabisha kuMwaami Lesa bweenka bwakacita bamaami bakataanguna kulela pali nguwe. Wakatolelela kucita shibiibi shakalinga kucita Jeloboamu mwanaakwe Nebati uyo wakalengesha bene Isilaeli kubisha.

¹⁰ Mpeeke Shalumu mwanaakwe Jabeshi wakabukila Sekaliya akumucaya kuIbileamu akuba mwaami mumusena wakwe.

¹¹ Shintu shimwi shoonse shakacita Sekaliya shililembetwe mulibuku lya buumi bwa bamaami ba bene Isilaeli.

¹² Aboobo cakashomesha Mwaami Lesa kuli Jewu cakacitika cancinencine. Wakashomesha ayi, “Bamulunyungu lwako kushikila akulishalane lyane, balaakunooba bamaami ba bene Isilaeli.”

Shalumu mwaami wa bene Isilaeli

¹³ Mumwaaka wamakumi otatwe amyaaka yosanwe ayone wa bwaami bwakwe Usiya mwaami wa bene Juda, Shalumu mwanaakwe Jabeshi wakaba mwaami wa bene Isilaeli. Wakalela muSamaliya kwamweenshi womwi.

¹⁴ Menaemu mwanaakwe Gadi wakaswa kuTesa akuya kuSamaliya. Mpeeke wakacaya Shalumu akuba mwaami mumusena wakwe.

¹⁵ Shintu shimwi shoonse shakacita Shalumu kubikaawo anshaakacita pakubukila Sekaliya, shililembetwe mulibuku lya buumi bwa bamaami ba bene Isilaeli.

¹⁶ Bweenka Menaemu mbwaakeenda kuswa kuTesa wakanyonyoola ndabala ya Tapuwa abantu bakooko alimwi acishi coonse cishingulukite. Wakacita boobo mukwiinga bantu bakakaka kulyaaba mumaansaakwe. Wakapasoola banakashi bakalinga kucite mafumo.

Menaemu mwaami wa bene Isilaeli

¹⁷ Mumwaaka wamakumi otatwe amyaaka yosanwe ayone wa bwaami bwakwe Asaliya mwaami wa bene Juda, Menaemu mwanaakwe Gadi wakaba mwaami wa bene Isilaeli. Wakalela muSamaliya myaaka likumi.

¹⁸ Ono alakwe wakabisha kuMwaami Lesa. Wakatolelela kucita shibiibi shakalinga kucita Jeloboamu mwanaakwe Nebati uyo wakalengesha bene Isilaeli kubisha.

¹⁹ Mpeeke Tigilati Pilesa, mwaami wa bene Asilya wakaya ayi alwane bene Isilaeli. Ono Menaemu wakamupa makilogilamu a Silifa ali 34,000 kwaamba ayi amucafweeko kuyumya bwaami bwakwe.

²⁰ Menaemu wakacana maali ayo kubene Isilaeli kwiinda mukulipilisha mubile womwi awomwi maali a silifa ali makumi osanwe. Lyalo Tigilati Pilesa wakaboolela kumishaabo.

²¹ Shintu shimwi shoonse shakacita Menaemu shililembetwe mulibuku lya buumi bwa bamaami ba bene Isilaeli.

²² Menaemu wakafwa akubikwa. Lyalo Pekaiya mwanaakwe ngowakapyana bwaami bwakwe.

Pekaiya mwaami wa bene Isilaeli

²³ Mumwaaka walikumi ayosanwe wa bwaami bwakwe Asaliya mwaami wa bene Juda, Pekaiya mwanaakwe Menaemu wakaba mwaami wa bene Isilaeli. Wakalela muSamaliya kwamyaaka yobilo.

²⁴ Pekaiya alakwe wakabisha kuMwaami Lesa. Taakwe kusanduka kuswa kushibiibi shakacita Jeloboamu mwanaakwe Nebati uyo wakalengesha bene Isilaeli kubisha.

²⁵ Ono Peka mwanaakwe Lemaliya, mutanjilili umwi wa bashilumamba wakwe Pakaiya, wakamupinga akubwesa basankwa bali makumi osanwe abo bakaswa kuGilyadi. Mpeeke bakacaya Pekaiya mucipinda ciyumu ca mukati ka ŋanda ya bwaami kuSamaliya. Lyalo Peka wakaba mwaami mumusena wakwe.

²⁶ Shintu shimwi shoonse shakacita Pekaiya shililembetwe mulibuku lya buumi bwa bamaami ba bene Isilaeli.

Peka mwaami wa bene Isilaeli

²⁷ Mumwaaka wamakumi osanwe ayobilo wa bwaami bwakwe Asaliya mwaami wa bene Juda, Peka mwanaakwe Lemaliya wakaba mwaami wa bene Isilaeli. Wakalela muSamaliya kwamyaaka makumi obilo.

²⁸ Peka alakwe wakabisha kuMwaami Lesa. Taakwe kusanduka kuswa kushibiibi shakacita Jeloboamu mwanaakwe Nebati uyo wakalengesha bene Isilaeli kubisha.

²⁹ Muciindi ca bwaami bwakwe Peka mwaami wa bene Isilaeli, Tigilati Pilesa mwaami wa bene Asilya wakesa wabwesa ndabala ya Ijoni, Abelo Beti Maaka, Janowa, Kedeshi alimwi aya Asoli, kubikaawo acishi ca Gilyadi, Galili alimwi aca Nafutali. Wakatola bantu busha kuAsilya.

³⁰ Mumwaaka wamakumi obilo wa bwaami bwakwe Jotamu mwanaakwe Usiya mwaami wa bene Juda, Osheya mwanaakwe Ela wakabukila mwaami Peka akumucaya. Mpeeke wakaba mwaami mumusena wakwe.

³¹ Shintu shimwi shoonse shakacita Peka shililembetwe mulibuku lya buumi bwa bamaami ba bene Isilaeli.

Mwaami Jotamu wa bene Juda

³² Mumwaaka wabili wa bwaami bwakwe Peka mwanaakwe Lemaliya mwaami wa bene Isilaeli, Jotamu mwanaakwe Usiya wakaba mwaami wa bene Juda.

³³ Wakaba mwaami kaacite myaaka makumi obilo ayosanwe. Wakalela muJelusalemu kwamyaaka likumi ayosanwe awomwi. Banyina bakalinga mbaJelusha mwanaakwe Sadoki.

³⁴ Lakwe wakacita shiluleme pameenso a Mwaami Lesa bweenka bwakacita Usiya ishi.

³⁵ Nakubi boobo misena yakulambililaako ya patulundu taikwe kunyonyoolwa. Aboobo bantu bakatolelela kubenga milambu akuya mukutenta tununkila kabotu uko. Jotamu ngowakayaka Mwinjililo wakumatwa wa Ŋanda yakwe Lesa.

³⁶ Shintu shimwi shoonse shakacita Jotamu shililembetwe mulibuku lya buumi bwa bamaami ba bene Juda.

³⁷ Muciindi ca bwaami bwakwe, Mwaami Lesa wakatalika kutuma Lesini mwaami wa bene Silya alimwi aPeka mwaami wa bene Isilaeli ayi balwane bene Juda.

³⁸ Jotamu wakafwa akubikwa kushuumbwe sha bamaami muNdabala yakwe Defedi. Lyalo Aasi mwanaakwe ngowakapyana bwaami bwakwe.