2 Baami 13 - Baibo Busansulushi Bwa Libuku Ili

Jeowasi mwaami wa bene Isilaeli

¹ Mumwaaka wa makumi obilo ayotatwe wa bwaami bwakwe Joashi mwanaakwe Aasiya mwaami wa bene Juda, Jeowasi mwanaakwe Jewu wakaba mwaami wa bene Isilaeli. Wakalela mundabala ya Samaliya kwamyaaka likumi ayosanwe amyaaka yobilo.

² Jeowasi wakabishisha Mwaami Lesa bweenka bwakalinga mwaami Jeloboamu uyo wakalengesha bene Isilaeli kubisha. Jeowasi taakwe kucilekaawo kweenda mushibiibi.

³ Lyalo Mwaami Lesa wakakalalila bene Isilaeli akubaaba mumaansaakwe Asayelo mwaami wa bene Silya amumaansaakwe Benadadi mwanaakwe kwaciindi cilaamfu.

⁴ Kuswawaawo Jeowasi wakapaila kuMwaami Lesa. Lyalo Mwaami Lesa ndyaakabona mwaami wa bene Silya mbwaakalinga kulyatilila bene Isilaeli calunkutwe, wakumbula mipailo yakwe Jeowasi.

⁵ Mwaami Lesa wakatuma shikubafuna kwaamba ayi akabafuneeko bene Isilaeli kubene Silya. Lyalo bene Isilaeli bakekala muluumuno mbuli mbobakalinga kwikala kataanshi.

⁶ Sombi bakatolelela kucita shibiibi shakalinga kucita Jeloboamu isho nshaakalengesha bene Isilaeli kucita. Ncakwiila Bakatolelela kubisha alimwi cikoshanyo cakwe Ashela lesa mwanakashi cakalingaamobo mundabala ya Samaliya.

⁷ Jeowasi taakalinga kucite bashilumamba bakacaalaako, sombibo beshikulwanina pamaaki bali makumi osanwe, shikoci likumi abashilumamba beshikulwanina panshi bali 10,000 mukwiinga mwaami wa bene Silya wakanyonyoola boonse akubapela anga ngamaila pampelo.

⁸ Shintu shimwi shoonse shakacita Jeowasi, kubikaawo amicito yakwe yakubula boowa, shililembetwe mulibuku lya buumi bwa bamaami ba bene Isilaeli.

⁹ Wakafwa akubikwa muSamaliya. Lyalo Jeowasi mwanaakwe ngowakapyana bwaami bwakwe.

Jeowashi mwaami wa bene Isilaeli

¹⁰ Mumwaaka wa makumi otatwe ayosanwe amyaaka yobilo wa bwaami bwakwe Joashi mwaami wa bene Juda, Jeowashi mwanaakwe Jeowasi wakaba mwaami wa bene Isilaeli. Wakalela mundabala ya Samaliya kwamyaaka likumi ayosanwe amwaaka womwi.

¹¹ Alakwe wakabishisha Mwaami Lesa alimwi wakatolelela kucita shibiibi shakalinga kucita Jeloboamu mwanaakwe Nebati uyo wakalengesha bene Isilaeli kubisha.

¹² Shintu shimwi shoonse shakacita Jeowashi, kubikaawo ankoondo njaakalwana aAmasiya mwaami wa bene Juda, shililembetwe mulibuku lya buumi bwa bamaami ba bene Isilaeli.

¹³ Jeowashi wakafwa akubikwa kushuumbwe sha bamaami muSamaliya. Jeloboamu mwanaakwe ngowakapyana bwaami bwakwe.

Kufwa kwakwe Elisha

¹⁴ Mulaluki Elisha wakaciswa bulwashi bunene ubo bwakamucaya. Ndyaakalinga kufwa Jeowashi mwaami wa bene Isilaeli wakesa mukumubona. Ndyaakashika wakalila ayi, “Ta! Ta! Mwalinga beshikufuna bene Isilaeli beshinkusu!”

¹⁵ Mpomunyaawo Elisha wakamwaambila ayi, “Bwesa buta amifwi.” Jeowashi wakashibwesa.

¹⁶ Lyalo Elisha wakamwaambila ayi alibambe kwiiwaala. Mwaami wa bene Isilaeli wakalibamba, mpeeke Elisha wakabika maansa pamaansa a mwaami.

¹⁷ Ono mwaami mukukonkela bwakamulwiita mulaluki, wakacalula mbwelyo iyo yakalinga kulanga kulubasu lwa Silya. Mpeeke Elisha wakamwaambila ayi, “Waala mufwi!” Mwaami ndyaakawaala mufwi uyo, mulaluki wakaamba ayi, “Webo ndiwe mufwi wa Mwaami Lesa, ngweshi akakomesheko cishi ca Silya. Ulaakulwana bene Silya muAfeki kushikila ukabakoome.”

¹⁸ Mpeeke Elisha wakaambila mwaami ayi abwese mifwi imwi akuyasa panshi. Mpomunyaawo Mwaami wakayasa panshi mankanda otatwe akucileka.

¹⁹ Ico cakakalasha Elisha, lyalo wakaambila mwaami ayi, “Walinga kweelete kuyasa panshi mankanda osanwe nabi osanwe alyomwi, lyalo naakwiinga wakakoma bene Silya akubanyonyoola cakumaninina. Sombi bulya ulaakubakomabo mankanda otatwe.”

²⁰ Ono Elisha wakafwa akubikwa. Mpeeke mwaaka amwaaka bene Moabu bakalinga kwisa mukusaala cishi ca bene Isilaeli.

²¹ Bumwi bushiku bene Isilaeli bamwi bakalinga kubika umwi muntu, likoto lya beshikusaala bene Moabu lyakaboneka. Lyalo bene Isilaeli bakawaalabo mutuntu uyo mucuumbwe cakwe Elisha akucica. Mpeeke mutuntu uyo ndiwakakumya shifuwa shakwe Elisha, muntu uyo wakabuka akwiimikana.

Nkondo pakati ka bene Isilaeli abene Silya

²² Ono Asayelo mwaami wa bene Silya wakalinga kupensha bene Isilaeli kwaciindi coonse ca bwaami bwakwe Jeowasi.

²³ Sombi Mwaami Lesa wakalinga kunyumfwila bene Isilaeli nkumbu aluse. Taakwe kusuminisha ayi banyonyoolwe, sombi wakalinga kubacafwa ceebo ca cipangano ico ncaakapanga aAbulaamu, Isaki alimwi aJakobo. Kushikila abobulya taakwe kulubaawo bantu bakwe napaceyi.

²⁴ Asayelo mwaami wa bene Silya wakafwa. Lyalo Benadadi mwanaakwe ngowakapyana bwaami bwakwe.

²⁵ Lyalo mwaami Jeowashi mwaami wa bene Isilaeli wakakoma Benadadi mankanda otatwe. Wakaboosha mandabala ayo akalinga abweswa amwaami Benadadi muciindi ca bwaami bwakwe Jeowasi, baishi Jeowashi.