2 Baami 11 - Baibo Busansulushi Bwa Libuku Ili

Ataliya mwaami mwanakashi wa bene Juda

¹ Ono Ataliya banyina mwaami Aasiya ndyaakabona ayi mwanaakwe musankwa bamucaya, wakaamba ayi boonse bamuŋanda ya bwaami bacaikwe.

² Sombi Jeosheba mwanaakwe Jeolamu mwanakashi, nankashi yakwe Aasiya wakabwesa Joashi mwanaakwe Aasiya akumukusha pabamuŋanda ya bwaami abo bakaambwa kucaikwa. Wakamutola mucipinda cakoonaamo ashikumulela kumushisa kuli Ataliya kwaamba ayi atacaikwi.

³ Mwaana uyo wakalinga kushisitwe kwamyaaka yosanwe awomwi kaalibo ashikumulela muŊanda yakwe Lesa. Ciindi ico Ataliya ngowakalinga kulela mucishi cabo.

⁴ Mumwaaka wasanu ayobilo Jeoiyada mupailishi wakaambila bamatanjilili ba beshikulindilila mwaami abeshikulindilila ŋanda ya bwaami ayi bese kuŊanda yakwe Lesa. Uko wakapanganaabo akubaambila ayi bashomeshe cakulumbila ayi balaakucita ceeco ncaakalinga kusuni. Mpeeke wakabatondesha Joashi mwanaakwe Aasiya.

⁵ Lyalo wakabaambila ayi, “Mbulya mbomweelete kucita. Na mukese kuncito pabushiku bwakookesha bwa Cibelu, mukalibaanye mumakoto otatwe. Likoto lyomwi likalaame ŋanda ya bwaami.

⁶ Lyabili likalaame mwinjililo wa Saa alyalo lyatatu likalaame mwinjililo kwisule lya beshikulindilila.

⁷ Pamakoto obilo ayo eshi kookesha pabushiku bwakookesha bwa Cibelu, mwebo mukalindilile kuŊanda yakwe Lesa ayi mutabilile mwaami.

⁸ Mukalaame mwaami Joashi cakunoomushingulukite amipeeni keeli mumaansa. Mulyeelete kunoolyaakwe pafwaafwi cakutamushiila musena. Woonse weshi akasene pafwaafwi amwebo, ngwakucayabo.”

⁹ Bamatanjilili abo bakanyumfwa shakaamba Jeoiyada mupailishi. Mpeeke bakaleta basankwa babo kuli nguwe, abo bakalinga kookesha paCibelu alimwi abaabo bakalinga kuya kuncito.

¹⁰ Mpomunyaawo Jeoiyada wakapa bamatanjilili masumo amayawo shakalinga sha mwaami Defedi isho shakalinga kulaminwa muŊanda yakwe Lesa.

¹¹ Beshikulindilila bakeemikana kushinguluka mwaami, womwi awomwi amupeeni mulyaansa lyakwe pafwaafwi acipaililo alimwi aŊanda yakwe Lesa kuswa kulubasu lwakumalenge kuya mukushika akulubasu lwakumatwa.

¹² Lyalo Jeoiyada wakakusha Joashi, wamufwalika mushini wa bwaami kumutwi. Lyalo wakamupa pakalembwa milawo ya bwaami. Mpomunyaawo Joashi wakananikwa mafuta akwaambilishikwa ayi ngumwaami. Bantu bakasangalala, bakamba mapaka akwaamba ayi, “Mwaami kaabukila buumi!”

¹³ Ataliya mwaami mwanakashi ndyaakanyumfwa ciyobeyobe cakacitika beshikulindilila abantu, wakaya lubilo kuŊanda yakwe Lesa uko kwakalinga kubungene bantu.

¹⁴ Ndyaakashika, wakacana mwaami uliimfwi kulicinko pamwinjililo wa Ŋanda yakwe Lesa kweelana akwishibila kwabo. Wakalinga kushingulukitwe abamatanjilili alimwi abeshikulisha mapeenga. Bantu boonse bakalinga koolobesha cakusangalala akulisha mapeenga. Mpomunyaawo Ataliya wakakwamoona shakufwala shakwe ceebo ca moyo kucisa akwaamba ayi, “Bambukila! Bambukila!”

¹⁵ Jeoiyada mupailishi taakalinga kusuni kwaamba ayi Ataliya acailwe muŊanda yakwe Lesa. Aboobo wakaambila bamatanjilili ba beshikulindila ayi, “Amumutole pansengwe pakati ka mindando ya beshikulindilila. Ono mucaye muntu uli woonse weshi amukonkele.”

¹⁶ Bakamucata, bamutola kuŋanda ya bwaami akumucaila kuMwinjililo wa Maaki.

Jeoiyada mbwaakanyonyoola ŋanda yakwe Baali

¹⁷ Jeoiyada mupailishi wakalengesha ayi Mwaami Joashi abantu boonse bapange cipangano aMwaami Lesa kwaamba ayi babe ba Mwaami Lesa. Wakelengesha alimwi ayi mwaami Joashi abantu bapange cipangano.

¹⁸ Lyalo bantu bakaya kuŋanda yakwe Baali akwiipwaya alimwi akupwaya shipaililo ashibumbuwabumbwa. Bakacaya Matani mupailishi wakwe Baali kunembo lya shipaililo. Mpeeke Jeoiyada wakabika beshikulindilila kuŊanda yakwe Lesa.

¹⁹ Lyalo wakaya abamatanjilili, beshikulindilila ba mwaami abeshikulindilila kuŋanda ya bwaami kushindikila mwaami kuswa kuŊanda yakwe Lesa kuya kuŋanda ya bwaami. Pesule bantu boonse bakabakonkela. Joashi wakenjilila kuMwinjililo wa Beshikulindilila akwikala pacuuna ca bwaami.

²⁰ Bantu boonse bakasangalala abuumbi, ndabala yoonse yakoomunabo tontolo, mukwiinga Ataliya wakacaikwa muŋanda ya bwaami.

²¹ Joashi wakaba mwaami wa bene Juda kaacite myaaka yosanwe ayobilo.