2 Baami 10 - Baibo Busansulushi Bwa Libuku Ili

Bamulunyungu lwakwe Aabu mbobakacaikwa

¹ Ciindi ico kwakalinga bamulunyungu lwakwe Aabu bali makumi osanwe aobilo bakalinga kwikala mundabala ya Samaliya. Jewu wakalemba makalata akwaatuma kubamatanjilili ba mundabala, bamaloba alimwi akubeshikulama bamulunyungu lwakwe Aabu. Makalata ayo akalembwa ayi,

² “Mwebo ndimwe mulama bamulunyungu lwa mwaami Aabu alimwi mulicite ashikoci, maaki, shakulwanisha alimwi amalinga mumandabala. Ono na mutambulebo nkalata iyi,

³ musale wamulunyungu wiindaawo kweelela akumubika pabwaami. Lyalo mukalwane mukumufuna.”

⁴ Bamatanjilili ba muSamaliya bakaloonda abuumbi akwaamba ayi, “Ino Jewu inga twamulwana buyani, na mwaami Jolamu nabi Aasiya tabakwe kucikonsha?”

⁵ Lyalo munene wa paŋanda ya bwaami amweendeleshi wa ndabala inene kubikaawo abamaloba bamundabala alimwi abeshikulama ba bamulunyungu lwakwe Aabu boonse bakatuma nkalata kuli Jewu yakwaamba ayi, “Swebo tuli basebenshi banu alimwi tulilibambite kukusebensela. Sombi twakaaka kusala mwaami aumwi. Amucitebo ncemwayeeya mwebo ayi cilyeelete.”

⁶ Jewu wakabalembela aimwi nkalata ayi, “Na muli kulubasu lwangu alimwi na mulisuminite kunyumfwila, mukalete mitwi ya bamulunyungu lwakwe Aabu kuli ndime kuJesiliilu ciilo ciindi ceenka cino.” Bamulunyungu lwakwe Aabu bakalinga makumi osanwe aobilo boonse bakalinga kulelwa abamatanjilili ba mundabala ya Samaliya.

⁷ Nkalata yakwe Jewu ndibakeetambula bamatanjilili ba mundabala ya Samaliya, bakacaya boonse bamulunyungu lwakwe Aabu bakalinga makumi osanwe aobilo. Mpeeke bakabika mitwi yabo mumitaanga akwiituma kuli Jewu kuJesiliilu.

⁸ Jewu ndibakamulwiita ayi mitwi ya bamulunyungu lwakwe Aabu bakeeleta, wakabaambila ayi beebunjike mumilwi yobilo kumwinjililo wa ndabala akwiileka ayi yoone kushikila macuunsa.

⁹ Ndibwakaca Jewu wakaya kumwinjililo akwaambila bantu ayi, “Mwebo tamucite mulandu mukwiinga ndime ndakabukila Jolamu akumucaya. Ono ngani wakacaya bantu boonse aba?

¹⁰ Ici cabonesha kale ayi makani akaamba Mwaami Lesa pabamulunyungu lwakwe Aabu alaakucitika cancinencine. Mwaami Lesa wacita ico ncaakaamba kwiinda mumulaluki Elija.”

¹¹ Lyalo alakwe Jewu wakacaya bamulunyungu lwakwe Aabu bamwi boonse bakalinga kwikala muJesiliilu pantu pomwi abacinenenene bakwe, babye beene beene alimwi abapailishi. Ncakwiila taaku wakacaala kaali muumi.

Beshikamukowa bakwe Aasiya mbobakacaikwa

¹² Jewu wakanyamuka kuswa kuJesiliilu akuya kuSamaliya. Munshila, pamusena wiitwa ayi “Pamisumba ya beembeshi,”

¹³ wakakumana abamakwabo mulobe Aasiya mwaami wa bene Juda akubeepusha ayi, “Ndimwe baani?” Bakakumbula ayi, “Ndiswe bamakwabo Aasiya. Tutooya kuJesiliilu mukupa bulemu kubana ba mwaami Aabu amukaakwe Jesebelo.”

¹⁴ Jewu wakaambila bantu bakwe ayi, “Amubatole kabali boomi!” Bakabacata akuya mukubacaya pafwaafwi acilindi uko. Bantu abo bakalinga makumi one abobilo pantu pomwi. Taakuuwo nabi womwi wakacaala kaali muumi.

Boonse bamakwabo Aabu bakacaikwa

¹⁵ Jewu wakanyamuka alimwi. Munshila wakakumanya Jonadabu mwanaakwe Lekabu. Jewu wakamwansha akwaamba ayi, “Webo anebo tutooyeeyabo cintu comwi, sa inga tooncafwiiko?” Jonadabu wakakumbula ayi, “Ee, ntoomucafwa.” Mpomunyaawo Jewu wakaamba ayi, “Na mboboobo, tambika lyaansa lyako.” Mpeeke bakacatana maansa, lyalo Jewu wakacafwa mubye akumutantika mucikoci.

¹⁶ Jewu wakaamba ayi, “Kwesa anebo ubone mbuli mboontoosebensela Mwaami Lesa cankusu.” Lyalo bakaya boonse kuSamaliya.

¹⁷ Ndibakashika uko, Jewu wakacaya bamakwabo Aabu boonse bakalinga bacaalaawo, kutashiyaawo nabi womwi kweelana abwakaamba Mwaami Lesa kwiinda muli Elija.

Beshikulambila Baali mbobakacaikwa

¹⁸ Jewu wakabunganya bene Samaliya boonse akubaambila ayi, “Mwaami Aabu wakalinga kulambila Baali paniini, sombi nebo ndaakwiindaawo kumulambila.

¹⁹ Ono mwiite balaluki boonse bakwe Baali, boonse bamulambila alimwi abapailishi bakwe. Taaku weshi acaale. Ntoobenga mulambu unene kuli Baali. Ono uyo woonse weshi abuleeko ulyeelete kucaikwa.” Sombi Jewu wakalinga kubecabo kwaamba ayi acaye bakalinga kulambila Baali boonse.

²⁰ Jewu wakaamba ayi, “Amwaambilishe bushiku bwakulambila Baali!” Bushiku ubu bwakaambilishikwa.

²¹ Lyalo Jewu wakatuma nkombe mucishi coonse ca Isilaeli. Bantu boonse balambila Baali bakesa, taaku nabi womwi wakalela. Boonse bakenjila muŋanda yakwe Baali akwiisusha kuswa kweela akweela.

²² Lyalo Jewu wakaambila mupailishi wakalinga kulama mingaanjo isalalite ayi aikuushe akwiipa bakalinga kulambila. Alakwe wakacita ubo.

²³ Ndipakeenda ciindi ciniinibo Jewu lakwe mwine wakaya muŋanda yakwe Baali aJonadabu mwanaakwe Lekabu akuya mukulwiita bantu ayi, “Amubone kwaamba ayi muno mwenjilabo baabo balambila Baali beenka. Kutabi muntu ulambila Mwaami Lesa nabi womwi wenjila.”

²⁴ Lyalo lakwe aJonadabu bakeenjila mukati kuya mukubenga milambu yakutenta aimwibo kuli Baali. Ono Jewu wakabika bantu bosanwe abotatwe pansengwe akubalwiita ayi, “Kulilabo weshi aleke muntu nabi womwi pabaabo babikwa mumaansaakwe ayi aloboke, utoocaikwa nguwe!”

²⁵ Jewu ndyaakamanabo kubenga milambu, wakaambila beshikulindilila abacinenenene bakwe ayi, “Kamuya mucaye boonse, mutaleeki muntu nabi womwi kucica!” Bakenjila amipeeni akumana kubacaya. Mibili yabo bakeetintila pansengwe. Lyalo bakeenjila mucipinda cisalalite muŋanda yakwe Baali.

²⁶ Bakakusha libwe lyakwiimika ilyo lyakalinga muŋanda yakwe baali akulitenta.

²⁷ Mpomunyaawo bakanyonyoola libwe ilyo aŋanda yakwe Baali akulengesha ŋanda iyo kuba cimbushu, asunu mboibete.

²⁸ Munshila iyi Jewu mbwaakanyonyoola kulambila kwakwe Baali mucishi ca Isilaeli.

²⁹ Sombi alakwe wakacita cibiibi ceenka cakacita mwaami Jeloboamu mwanaakwe Nebati uyo wakalengesha bene Isilaeli kubisha mukulambila bacende baana ba golodi abo mbwaakabika mundabala ya Betelo aya Dani.

³⁰ Mpomunyaawo Mwaami Lesa wakaambila Jewu ayi, “Wacita kubamulunyungu lwakwe Aabu shoonse nshendalinga kusuni ayi ucite. Ono bulya ntooshomesha ayi bamulunyungu lwako kushikila akulishalane lyane, balaakunooba bamaami ba bene Isilaeli.”

³¹ Nakubi boobo Jewu taakwe kukonkela camoyo woonse milawo ya Mwaami Lesa, Lesa wa bene Isilaeli. Lakwe wakakonkela bwakacita Jeloboamu uyo wakalengesha bene Isilaeli kubisha.

Kufwa kwakwe Jewu

³² Paciindi ico Mwaami Lesa wakatalika kuceesha cishi ca bene Isilaeli. Asayelo mwaami wa bene Silya wakakoma cishi coonse ca Isilaeli

³³ kwicwe lya Joodani kuya mukushika akundabala ya Alowa kumalenge paMulonga wa Anoni. Nkokwaamba ayi cishi ca Gilyadi aca Bashani umo mukowa wa bene Gadi, bene Lubeni awa bene Manase wakwicwe, shakalinga mukati.

³⁴ Shintu shimwi shoonse shakacita Jewu kubikaawo amicito yakwe yakubula boowa, shililembetwe mulibuku lya buumi bwa bamaami ba bene Isilaeli.

³⁵ Wakafwa akubikwa muSamaliya. Lyalo Jeowasi mwanaakwe musankwa ngowakapyana bwaami bwakwe.

³⁶ Jewu wakalela muSamaliya kwamyaaka makumi obilo aosanwe alimwi amyaaka yotatwe.