2 Baami 1 - Baibo Busansulushi Bwa Libuku Ili

Elija amwaami Aasiya

¹ Aabu mwaami wa bene Isilaeli ndyaakafwa, bene Moabu bakabukila bene Isilaeli.

² Mwaami Aasiya wakaloka pambwelyo ya cipinda ca peculu ca ŋanda yakwe muSamaliya akulicisa abuumbi. Lyalo wakatuma beshinkombe kuya mukwiipusha Baali Sebubu lesa wa kuEkiloni ndabala inene ya bene Filisiti ayi na ulaakuba kabotu.

³ Sombi munjelo wa Mwaami Lesa wakaambila Elija mulaluki mwine Tishibe ayi, “Koya ukakumane abeshinkombe abo mwaami Aasiya mbwaakatuma akubeepusha ayi, ‘Sa nceebo cakwaamba ayi taamu Lesa muIsilaeli ncemutooita mukwiipusha kuli Baali Sebubu, lesa wa kuEkiloni?’

⁴ Ono Mwaami Lesa waamba ayi, ‘Omwaami Aasiya, teshi ukabukeewo kuswa pabulo bwako apo, ncakwiila ulaakufwa!’ ” Elija wakacita bweenka bwakaamba Mwaami Lesa.

⁵ Beshinkombe abo bakaboolela kumwaami. Lyalo mwaami wakeepusha ayi, “Ino mwaboolelamonshi?”

⁶ Abalo bakakumbula ayi, “Twakumana amusankwa uyo watwaambila ayi tubooleemo akwisa mukumulwiita maswi aswa kuMwaami Lesa akwaamba ayi, ‘Sa nceebo cakwaamba ayi taamu Lesa muIsilaeli ncemutooita mukwiipusha kuli Baali Sebubu, lesa wa kuEkiloni?’ Paceebo ceeco teshi mukabukeewo kuswa pabulo bwanu apo, ncakwiila mulaakufwa!”

⁷ Mwaami wakeepusha ayi, “Ino musankwa uyo walinga kuboneka buyani?”

⁸ Balo bakakumbula ayi, “Walinga kufwete cakufwala ca booya peculu alimwi kaangite alamba wa cipaya mubukome.” Mwaami wakaamba ayi, “Anu nguElija mwine Tishibe!”

⁹ Lyalo mwaami wakatuma mutanjilili wa bashilumamba pantu pomwi abashilumamba bakalinga makumi osanwe kuya mukucata Elija. Mutanjilili uyo wakamucana kashiite pakalundu akumwaambila ayi, “Omuntu wakwe Lesa, mwaami waamba ayi useluke.”

¹⁰ Elija wakakumbula ayi, “Na ndi muntu wakwe Lesa, mulilo auseluke kuswa kwiculu akucaya ndiwe abashilumamba bako boonse!” Mpomunyaawo mulilo wakatenta mutanjilili uyo abashilumamba bakwe boonse.

¹¹ Mpomunyaawo mwaami wakatumako mutanjilili aumwi abashilumamba makumi osanwe abo bakaya mukwaamba kuli Elija ayi, “Omuntu wakwe Lesa, mwaami waamba ayi useluke bulya bweenka!”

¹² Elija wakakumbula ayi, “Na ndi muntu wakwe Lesa, mulilo auseluke kuswa kwiculu akucaya ndiwe abashilumamba bako boonse!” Mpomunyaawo mulilo wakatenta mutanjilili uyo abashilumamba bakwe boonse.

¹³ Lyalo mwaami wakatuma mutanjilili watatu abashilumamba bakalinga makumi osanwe. Wakatanta peculu pakalundu, wakafukama kunembo kuli Elija, akusenga ayi, “Omuntu wakwe Lesa nyumfwileko nkumbu pantu pomwi abantu bangu boonse. Utatucaayi!

¹⁴ Batanjilili bamwi bobilo ba mwaami bacaikwa pantu pomwi abantu babo boonse kumulilo wakaswa kwiculu, ono nebo nyumfwileko nkumbu!”

¹⁵ Munjelo wa Mwaami Lesa wakaambila Elija ayi, “Koya anguwe, utaloondi.” Lyalo Elija wakaya amutanjilili wa bashilumamba uyo kumwaami

¹⁶ akumwaambila ayi, “Mwaami Lesa waamba ayi, ‘Sa nceebo cakwaamba ayi taamu Lesa muIsilaeli ncemutooita mukwiipusha kuli Baali Sebubu, lesa wa kuEkiloni?’ Paceebo ceeco teshi mukabukeewo kuswa pabulo bwanu apo, ncakwiila mulaakufwa!”

¹⁷ Aasiya wakafwa kweelana abwakaamba Mwaami Lesa kwiinda muli Elija. Taakalinga kucitewo baana basankwa, aboobo Jolamu mukwabo wakapyana bwaami bwakwe mumwaaka wabili wa bwaami bwakwe Jeolamu mwanaakawe Jeoshafati mwaami wa bene Juda.

¹⁸ Shimwi shoonse shakacita mwaami Aasiya shililembetwe mumabuku a buumi bwa bamaami ba bene Isilaeli.