1 Timoti 6 - Baibo Busansulushi Bwa Libuku Ili

¹ Basha boonse balyeelete kupa bulemu bamaami babo kwaamba ayi bantu batacoboli liina lyakwe Lesa anshetwiisha.

² Basha bacite bamaami babo bashomi, tabeelete kutanoobapa bulemu ayi mukwiinga mbashominyinaabo, sobwe. Sombi balyeelete kubasebensela kabotu abuumbi ceebo abo bacana mpindu mumilimo yabo mbashominyinaabo basunikwi. Ulyeelete kwiisha akushimikila shintu ishi.

Kwiisha kwakubeca abubile bwancinencine

³ Muntu uli woonse wiisha njiisho shipusene alimwi shiteendelani amaswi aMwaami wesu Jesu Klistu akwiisha kwesu kuswa kuli Lesa,

⁴ ngushikulisumpula alimwi taaku nceeshi. Ono ulisunishibo kupikisha akwaambana pamaswi. Ici cilaletabo munyono, kupikishanya, matushi, kuyeeyela shibiibi

⁵ alimwi akwaambana kuteeli kuswa kubantu abo bacite miyeeyo ibiibi batakoonshi kwishiba shalushinisho. Balo balayeeya ayi kupaila Lesa ninshila yakubililaamo.

⁶ Ee, kupaila kulabilisha muntu abuumbi, kulilabo na ulabona ayi isho nshaacite nshiinji.

⁷ Mukwiinga taaku ncetwakaletelela pacishi ca panshi alimwi taaku nceshi tukatolelele.

⁸ Ono aboobo na katucite shakufwala ashakulya ingayi twakwaana.

⁹ Sombi abo basunishi kubila balawita mumasunko akucatwa mutoose twa shiyanda mubili shiinji shabuluya alimwi shinyonyoola. Shintu isho shilabanjisha mukunyonyooka kwa buumi bwabo akuloba.

¹⁰ Ceebo kusuna maali ngomatalikilo a bubi boonse. Bamwi bakalinga kwaasuni abuumbi, aboobo beengaila kuswa kulushomo akulinjisha mubuumba bunene.

Timoti mbwaakalashikwa

¹¹ Ono webo omuntu wakwe Lesa, swa kushintu shoonse sha mushobo uyu. Koelesha kuba abuumi bululeme, bwakulemeka Lesa, bwalushomo, bwalusuno, bwakutaboola pesule abwa kulibombya.

¹² Ulyeelete kulwana nkondo ibotu ya lushomo kwaamba ayi ukatambule buumi butamaani. Ceebo ici ncaakakwiitila Lesa bulya bushiku ndiwakaamba kabotu shalushomo lwako pameenso a bakamboni baanji.

¹³ Ono ntookwaambila pameenso akwe Lesa upa buumi shintu shoonse apameenso akwe Klistu Jesu, uyo wakapa bukamboni bubotu pameenso akwe Pontyasi Pilato,

¹⁴ ayi kokonkela shoonse nshoolwiitwa kucita kushikila bushiku Mwaami wesu Jesu Klistu aakwisa.

¹⁵ Lesa ulaakumulengesha kuboneka paciindi ceelete, Lesa shicoolwe uli ngomweendeleshi eenkabo, mweendeleshi wa beendeleshi alimwi Mwaami wa baami.

¹⁶ Lakwe eenkabo ngootafwi alimwi ngookala mumumuni utashikwa pafwaafwi. Taaku wakamubonawo kale alimwi taaku ukonsha kumubona. Bulemu abweendeleshi butamaani bube kuli nguwe lyoonse alyoonse. Ameni.

¹⁷ Waambile bantu abo babile mushintu sha cishi ca panshi cino ayi batanoolisumpula akulangila mububile ubo bumana. Sombi balyeelete kulangila muli Lesa uyo utupa camaansa obilo shintu shoonse shitusangalasha.

¹⁸ Ubaambile ayi banoocita shibotu, kwaamba ayi babile mumicito ibotu. Balyeelete kuba bantu bapa camaansa obilo alimwi balibambite kupa bamwi shintu.

¹⁹ Mukucita boobo, balaakulibunjikila bubile ubo bweshi bukabe anga ndwiimbi luyumu lwa kuciindi citoosa. Lyalo balaakulicanina buumi, ee buumi bwancinencine.

²⁰ Webo Timoti, kolama kabotu shoonse nshewakapekwa ayi ulame. Swa kumibandi italeti bulemu kuli Lesa alimwi akukupikishanya kwabuluya uko bantu nkobaamba cakubeca ayi ndushibo.

²¹ Ceebo balinga kwaamba ayi balilucite, ono paceebo ceeco baswa munshila ya lushomo. Luse lwakwe Lesa lube amwebo noonse.