1 Timoti 4 - Baibo Busansulushi Bwa Libuku Ili

Bafundishi babeshi

¹ Ncakwiila Mushimu Usalashi ulaamba patuba ayi munshiku shitoosa bamwi balaakushiya lushomo. Balaakutalika kunookonkela mishimu ibeshi akwiisha kwa bashikaswa.

² Kwiisha uko kulaakwisa kwiinda mubabeshi abo baamba nshebataciti, bacite miyeeyo italuleme, sombi ili anga yakatentwa ceela cilungula.

³ Balo baleeisha ayi kweeba akulya shakulya shimwi ncibiibi. Sombi Lesa wakalenga shakulya kwaamba ayi bashomi abo bakashiba shalushinisho banoolya, na bamana kulumba Lesa.

⁴ Mukwiinga shintu shoonse Lesa nshaakalenga nshibotu. Tasheelete kukakwa, sombi shoonse shilyeelete kutambulwa amupailo wakulumba Lesa,

⁵ ceebo shilasalashikwa pameenso akwe Lesa kwiinda muliswi lyakwe alimwi amupailo.

Musebenshi mubotu wakwe Klistu Jesu

⁶ Na weeisha bashominyoko shintu ishi ulaakuba musebenshi mubotu wakwe Klistu Jesu, ulishikwa mumushimu amaswi alushomo lwesu alimwi akwiisha kwa lushinisho uko nkowakakonkela.

⁷ Swaako kushintu isho shili anga ntulabi shitacite ncito. Webo usukamebo kuliisha kwikala kweelana akuyanda kwakwe Lesa.

⁸ Kwiisha mubili kuyuma kulacafwa paniini, sombi kwiisha kwikala kweelana akuyanda kwakwe Lesa kulacafwa munshila shoonse, ceebo kulalengesha kuba abuumi bubotu bulya alimwi aciindi citoosa.

⁹ Aya ngamakani alushinisho alimwi alyeelete kutambulwa cakumaninina akushomwa.

¹⁰ Nceceeco ncetusebensela cankusu akulwisha ceebo kulangila kwesu kuli muli Lesa muumi, uyo ngomupulushi wa bantu boonse, bunene bunene abo bashoma.

¹¹ Kobaambila akubeeisha makani aya.

¹² Kutabi muntu ukuubya ceebo cakuba mwanike. Sombi ube citondesho kubashomi boonse mumyaambo, mubuumi, mulusuno, mulushomo amukubula kampenda.

¹³ Kushikila nkese, ulyeelete kulyaaba mukubelengela bantu Malembo akwe Lesa, kushimikila alimwi akwiisha.

¹⁴ Utasuuli cipo ico ncewakapekwa balaluki ndibakashimikila makani akwe Lesa, ciindi likoto lya bamatanjilili ndilyakabika maansa pali ndiwe.

¹⁵ Cita shintu ishi cakulibenga kwaamba ayi boonse babone ayi buumi bwako muli Klistu butooya cikula.

¹⁶ Cenjela abuumi bwako alimwi akwiisha kwako. Kotolelela kucita shintu ishi ceebo mukucita boobo ulaakulipulusha omwiine alimwi abaabo bakukutika.