1 Timoti 2 - Baibo Busansulushi Bwa Libuku Ili

Kulambila kwa coonde

¹ Ono citaanshi ndaseenga ayi mupailile bantu boonse. Kupaila kwanu kube kusenga, mipailo, kusengela bamwi alimwi akulumba Lesa.

² Mupailile baami abaabo bali mubweendeleshi kwaamba ayi twikale muluumuno cakulemeka Lesa abuumi bubotu.

³ Ici ncibotu alimwi cilakondelesha Lesa Mupulushi wesu,

⁴ uyo usuni kwaamba ayi bantu boonse bakapulushikwe akwishiba shalushinisho.

⁵ Ceebo kuli Lesa womwibo ashikwiimikana pakati kakwe Lesa abantu womwibo. Muntu uyo nguKlistu Jesu,

⁶ uyo wakalibenga ayi alubule bantu boonse. Cilya cakaba ncitondesho paciindi ceelete ayi ncakwiila Lesa ulisuni kupulusha boonse.

⁷ Nceceeco alimwi ncaakampeta butumwi abufundishi bwa kubaswamashi bakunsengwe kwaamba ayi nshimikile Makani Abotu a lushomo alushinisho. Nshintoobeca, ntokwaamba lushinisho.

⁸ Ndisuni basankwa kuli koonse, kabapaila amaansa kaanyamukite, amoyo usalalite, kakutaaku kukalala nabi kupikishanya.

⁹ Ndisuni akwaamba ayi abalo banakashi kabafwala kabotu cabulemu akulibombya. Kuteshi cakusandoola bubaambo bwa misusu, kufwala shibekabeka sha golodi, bulungu munshingo, nabi shakufwala shamakwebo.

¹⁰ Sombi baliboteshe amilimo ibotu yeelete banakashi balyaamba ayi balalambila Lesa.

¹¹ Banakashi pakwiiya balyeelete kunokuumwite cakuliceesha.

¹² Nshisuminishi banakashi kwiisha nabi kweendelesha basankwa. Balyeelete kunokuumwitebo.

¹³ Ceebo Adamu wakataanguna kulengwa, lyalo pesule Efa.

¹⁴ Peculu lya waawo teshi Adamu wakabecekwa, ngumwanakashi wakabecekwa akusotoka mulawo wakwe Lesa.

¹⁵ Sombi mwanakashi ulaakupulushikwa kwiinda mukushala baana, na watolelela kushoma, kuba alusuno, kunoosalalite alimwi akulibombya.