1 Samwelo 7 - Baibo Busansulushi Bwa Libuku Ili

¹ Mpomunyaawo bantu bene Kilyati Jeyalimu bakaya babwesa Libokoshi lya Cipangano ca Mwaami Lesa akulitola kuŋanda ya musankwa wiitwa ayi Abinadabu, uyo wakalinga kwikala pakalundu. Bakasala akupailila Eliyasa mwanaakwe musankwa ayi Libokoshi libe mumaansaakwe.

Samwelo mbwaakeendelesha bene Isilaeli

² Libokoshi lya Cipangano lyakekala muKilyati Jeyalimu kwa ciindi cilaamfu, myaaka yakakwana makumi obilo. Muciindi coonse ici bene Isilaeli bakalinga kusenga Mwaami Lesa ayi abacaafwe.

³ Mpeeke Samwelo wakaambila bantu ayi, “Na musandukile kuMwaami Lesa amyoyo yoonse, mutoosowa balesa beensu ashikoshanyo shakwe Ashitaloti lesa mwanakashi. Amulyaabe cakumaninina kuMwaami Lesa akulambilabo nguwe eenka. Lyalo ulaakumufuna kuswa munkusu sha bene Filisiti.”

⁴ Mpomunyaawo bene Isilaeli bakasowa shibumbwabumbwa shakwe Baali ashikoshanyo shakwe Ashitaloti akutalika kulambilabo Mwaami Lesa eenka.

⁵ Mpeeke Samwelo wakaamba ayi, “Amubunganye bene Isilaeli boonse kuMisipa kwaamba ayi nkabapailileeko kuMwaami Lesa uko.”

⁶ Aboobo boonse bakabungana kuMisipa. Bakateka maanshi akwaabenga ayi ncipo kuMwaami Lesa mukwaatila. Lyalo bakalikasha kulya bushiku boonse ubo akusumina ayi, “Twakabishisha Mwaami Lesa.” KuMisipa Samwelo nkwaakatalikila koombolosha pakati ka bene Isilaeli.

⁷ Bene Filisiti ndibakanyumfwa kwaamba ayi bene Isilaeli babungana kuMisipa, bamaami bosanwe ba bene Filisiti bakanyamuka abashilumamba ayi bakabalwaane. Bene Isilaeli bakacinyumfwa cikani ico, mpeeke bakaloonda

⁸ akwaambila Samwelo ayi, “Tolelela kutupaililaako kuMwaami Lesa, Lesa wesu kwaamba ayi atufuune kubene Filisiti.”

⁹ Samwelo wakacaya mwanaambelele akumutenta kaalibo wakabumbulu ayi ngumulambu kuMwaami Lesa. Lyalo wakapaila kuMwaami Lesa ayi acafwe bene Isilaeli. Mpeeke Mwaami Lesa wakakumbula kupaila kwabo.

¹⁰ Samwelo kaacibenga mulambu, bene Filisiti bakasena kwaamba ayi balwane bene Isilaeli. Sombi mpomunyaawo Mwaami Lesa wakabalulumina kuswa kwiculu. Bakafulungana maano akutalika kucica mukulisukama.

¹¹ Bene Isilaeli bakafuumuka kuswa muMisipa akutandaanya bene Filisiti cakuyanda kushikabo akuBeti Ka kunooya cibacaya munshila.

¹² Lyalo Samwelo wakabwesa libwe akulibika pakati ka ndabala ya Misipa aSheni. Libwe ilyo wakalitumba ayi Ebenesa akwaamba ayi, “Mwaami Lesa watucafwa mushinso woonse uyu.”

¹³ Ubo bene Filisiti mbobakakomwa. Mwaami Lesa wakalengesha bene Filisiti kutakonsha kulwana bene Isilaeli kwaciindi coonse Samwelo ndyaakalinga muumi.

¹⁴ Mandabala anene oonse ayo ngobakalinga baalisha bene Filisiti ayo akalinga pakati ka Ekiloni aGati akabooshekwa mumaansa abene Isilaeli. Mpeeke nyinsa ya cishi ca Isilaeli yakaboola mweenka mukulukulu. Lyalo kwakaba luumuno pakati ka bene Isilaeli abene Amo.

¹⁵ Samwelo wakatanjilila cishi ca Isilaeli kwamyaaka yoonse ya buumi bwakwe.

¹⁶ Mwaaka amwaaka wakalinga kushinguluka kuBetelo, Gilugala, alimwi aMisipa. Mumisena iyi wakalinga kuya coombolosha milandu.

¹⁷ Lyalo ndyaakalinga kuya kumishaabo kuLama, uko akwalo nkwaakalinga kucite mulimo wa boomboloshi. Mwalo muLama wakayaka acipaililo mukulemeka Mwaami Lesa.