1 Samwelo 6 - Baibo Busansulushi Bwa Libuku Ili

Kupilusha Libokoshi lya Cipangano

¹ Mpeeke Libokoshi lya Cipangano ca Mwaami Lesa ndilyakekala myeenshi yosanwe ayobilo mucishi ca Filisitiya,

² bantu bakeeta bapailishi abamukamwaami akubeepusha ayi, “Ino tutoocita buyani aLibokoshi lya Cipangano ca Mwaami Lesa? Ino na twaamba ayi tulituumye nkolyakaswa, nciinshi nceenga twatumisha andilyo?”

³ Bakakumbula ayi, “Na mutooyanda kuboosha Libokoshi lya Cipangano ca Mwaami Lesa, Lesa wa bene Isilaeli, mutumye acipo cakumana mulandu wanu uyu kuli nguwe. Libokoshi lya Cipangano talyeelete kuyabo kwakubula cipo. Na mukatumye cipo mulaakuba kabotu alimwi mulaakwishiba ncaalinga kunoomutondeshesha bukali.”

⁴ Mpomunyaawo bantu bakeepusha ayi, “Ino nciponshi ceshi tutumishe kuli nguwe?” Mpeeke bakakumbula ayi, “Mutumye shintu shili anga nshuute sha golodi shili shosanwe alimwi ashili anga mbakoswe shili shosanwe kweelana amweelo wa bamaami ba bene Filisiti. Mukwiinga mwaalu wa mushobo womwi ngowakacitikila ndimwe noonse pantu pomwi abamaami banu.

⁵ Mulyeelete kupanga shili anga nshuute sha golodi ashili anga mbakoswe isho shitoonyonyoola cishi canu. Alimwi mulyeelete akulemeka Lesa wa bene Isilaeli. Mpashi inga wacileka kutondesha bukali kuli ndimwe, balesa banu alimwi acishi canu.

⁶ Ino mutooyanda kubetaanshi beshicimpamya mbuli Falawo mwaami wa bene Ijipiti abantu bakwe? Sa tamwiingashite mbwaakabapensha kushikila basuminisha bene Isilaeli kuswa muijipiti akuya?

⁷ Amubambe cikoci cipya ampwishi shobilo shitooyamwisha shitana kwaangwaawo. Mushaangeeko akuboosha boombe ba nshisho mukabaya.

⁸ Lyalo mubwese Libokoshi lya Cipangano ca Mwaami Lesa mulibike mucikoci. Kweela kwa ndilyo mubikeeko libokoshi lya sheesho sha golodi nsheshi mupange akutumya kuli nguwe ayi ncipo cakumana mulandu wanu. Mushilulike munshila ŋombe isho mpeeke mushileeke shinooya sheenka.

⁹ Lyalo munoosheebelabo akubona nkweshi shiye. Na shilulame kundabala ya Beti Shemeshi, citoosansulula ayi nguLesa wa bene Isilaeli walengesha mapensho a mushobo uyu kucitika pakati kesu. Ono na cibule kuba boobo, tutooshiba ayi teshi ngowakatuma mwaalu, ingayi wakababo wiine.”

¹⁰ Mpomunyaawo bakacita nshebakalwiitikwa. Bakabwesa mpwishi shobilo baanga kucikoci, akucalila boombe mukabaya kabo.

¹¹ Bakabika Libokoshi lya Cipangano ca Mwaami Lesa mucikoci pantu pomwi alibokoshi lya sha golodi shili anga mbakoswe alimwi ashili anga nshuute

¹² Mpwishi isho shakatalika kweenda kuya kuBeti Shemeshi cakutapambookaawo, sombi kashilulemebo kundabala iyo. Ndishakalinga kuya shakalinga kuya cilila. Bamaami ba bene Filisiti bosanwe abo bakashikonkela kushika akunyinsa ya Beti Shemeshi.

¹³ Bantu bene Beti Shemeshi bakalinga kucesa witi mucinyika ndibakeenamuka akubona Libokoshi lya Cipangano. Bakasangalala abuumbi kulibona.

¹⁴ Cikoci cakaya mumuunda wa musankwa wakalinga kwiitwa ayi Joshuwa uyo wakalinga kwikala muBeti Shemeshi akwiimikana umo pafwaafwi amwaandami. Mpeeke bantu bakatimboola cikoci ico cakalinga ca mapulanga, bacaya mpwishi isho akushibenga ayi ngumulambu wakutenta kuMwaami Lesa.

¹⁵ Lyalo bene Lefi bakabwesa Libokoshi lya Cipangano alibokoshi lyakalinga kuyumwite sha golodi isho akwaabika pamwaandami uyo. Mpomunyaawo bantu bene Beti Shemeshi bakabenga milambu yakutenta amilambu imwibo ku Mwaami Lesa.

¹⁶ Bamaami bene Filisiti bakalinga kweebela ishi ndishakalinga kucitika, mpeeke bakaboolela kuEkiloni bushiku bweenka ubo.

¹⁷ Bene Filisiti bakatumya shuute sha golodi shili shosanwe ayi comwi acomwi ciimikanine ndabala inene ya Ashidodi, Gasa, Ashikeloni, Gati aya Ekiloni.

¹⁸ Bakatumya abakoswe ba golodi womwi awomwi keemikanina ndabala inene yomwi iyo yakalinga kutanjililwa amwaami womwi awomwi wa bene Filisiti. Nkokwaamba ayi ndabala ili mulilinga amishibo itabeteemo. Mwaandami apo bantu mpobakabika Libokoshi lya Cipangano mumuunda wakwe Joshuwa wa kuBeti Shemeshi uleebalusha bantu shakacitika kushikila asunu.

¹⁹ Ono Mwaami Lesa wakacaya basankwa bene Beti Shemeshi bali makumi osanwe aobilo ceebo bakasondela muLibokoshi lya Cipangano. Bantu bakalila abuumbi ceebo Mwaami Lesa wakalengesha imfwa ya bantu baanji bobulya pakati kabo.

Shalibokoshi lyakwe kuKilyati Jeyalimu

²⁰ Aboobo basankwa bene Beti Shemeshi bakaamba ayi, “Anu ngani weenga weemikana pameenso aMwaami Lesa, Lesa uyu Usalalite? Anu nkuli nkweenga twatumya Libokoshi lya Cipangano cakwe kwaamba ayi abe kulaale aswebo?”

²¹ Mpeeke bakatumya beshinkombe kuKilyati Jeyalimu amaswi akwaamba ayi, “Bene Filisiti bapilusha Libokoshi lya Cipangano ca Mwaami Lesa. Kamwisa muliloonde.”