1 Samwelo 5 - Baibo Busansulushi Bwa Libuku Ili

Libokoshi lya Cipangano pakati ka bene Filisiti

¹ Mpeeke bene Filisiti ndibakamana kucata Libokoshi lya Cipangano, bakaliyumuna kuswa kuEbenesa kulitola kundabala inene ya Ashidodi.

² Bakalibika muŋanda ya lesa wabo Dagoni pafwaafwi acibumbwabumbwa ca lesa uyo.

³ Macuunsacuunsa ndibwakaca bene Ashidodi bakacana cibumbwabumbwa cakwe Dagoni cawa cakuya mukuumawo cameenso panshi kunembo lya Libokoshi lya Cipangano ca Mwaami Lesa. Mpeeke bakacibusha akuciboosha mumusena wa ncico.

⁴ Bushiku bwakaboolaawo macuunsacuunsa bakacanabo cawa alimwi kunembo lya Libokoshi lya Cipangano ca Mwaami Lesa. Ubo bushiku kucana mutwi amaansa a ncico oonse obilo kashipwaikiteeko alimwi kashilibo mumulyango. Kwakacaalabo cibilibili.

⁵ Nceceeco bapailishi bakwe Dagoni abeshikumulambila ncibasotokela pamulyango alimwi tabalyatiiwo kushikila asunu.

⁶ Kuswawaawo Mwaami Lesa wakatondesha bantu bene Ashidodi bukali akubaloondesha. Wakabatondesha bukali pantu pomwi abaabo bakalinga mushishi shakalinga kushingulukite kwiinda mukubapa shuute.

⁷ Ndibakabona cakalinga kucitika bakaamba ayi, “NguLesa wa bene Isilaeli utootupa mulandu pantu pomwi alesa wesu Dagoni. Tatukoonshi kuleka Libokoshi lya Cipangano kunoocili momuno.”

⁸ Mpeeke bakatuma beshinkombe kuya mukwiita bamaami ba bene Filisiti boonse. Lyalo bakabeepusha ayi, “Tutoocita buyani aLibokoshi lya Cipangano ca Mwaami Lesa, Lesa wa bene Isilaeli?” Balo bakakumbula ayi, “Amulitole kuGati.” Mpeeke bakalitola kuGati, ndabala imwi inene ya bene Filisiti.

⁹ Ono ndilyakashika uko, Mwaami Lesa abalo wakabatondesha bukali cakwaamba ayi bakalisukama abuumbi. Wakabatumina shuute isho shakakumanabo bantu boonse, banike abanene mushobo womwi.

¹⁰ Mpomunyaawo Libokoshi lya Cipangano ilyo bakalitumya kuEkiloni, ndabala imwi inene ya bene Filisiti. Sombi ndilyakashika uko, bantu bakoolobesha ayi, “Libokoshi lya Cipangano ca Mwaami Lesa, Lesa wa bene Isilaeli balileta kokuno kwaamba ayi batucaaye soonse!”

¹¹ Mpeeke alimwi bakatuma bantu kwiita bamaami ba bene Filisiti boonse. Lyalo bakaamba ayi, “Amupilushe Libokoshi lya Cipangano lya bene Isilaeli kumusena wa ndilyo kwaamba ayi litacaayi abamumaandeesu.” Mwakalinga kunyonyongana mundabala ceebo Lesa wakalinga kubatondesha bukali cakubula nkumbu.

¹² Abo batakwe kufwa wakabatumina shuute. Bantu bakalila abuumbi akusenga balesa babo ayi babacaafwe.