1 Samwelo 4 - Baibo Busansulushi Bwa Libuku Ili

Bene Filisiti mbobakabwesa Libokoshi lya Cipangano

¹ Ono bene Isilaeli bakalibambila kuya mukulwana abene Filisiti. Bakayaka misumba yabo kuEbenesa abalo bene Filisiti bakayaka yaabo kuAfeki.

² Bene Filisiti bakaya balwana bene Isilaeli. Lyalo kwakaba nkondo yabulowa iyo yakeela mukukomwa kwa bene Isilaeli akucaikwa kwa bashilumamba babo bali mpashi shuulu shili shone mumusena weenka wakulwaninaawo.

³ Bene Isilaeli bakapuluka ndibakaboola pamisumba yabo bamaloba bakaamba ayi, “Ceebonshi Mwaami Lesa wasuminisha bene Filisiti kutukoma? Tiya tukalete Libokoshi lya Cipangano ca Mwaami Lesa kuswa kuShilo kwaamba ayi tuye akwe akatupulushe kubalwani besu.”

⁴ Mpeeke bakatuma bantu kuShilo ayi bakalete Libokoshi lya Cipangano ca Mwaami Lesa Shinkusu shoonse, uyo ucite cuuna cakwe ca bwaami pakati ka shintu shicite mapapaminwa shiitwa ayi bakelebu. Ofini aFineyasi bakesa abalo pantu pomwi aLibokoshi lya Cipangano.

⁵ Libokoshi lya Cipangano ca Mwaami Lesa ndilyakashika kumisumba yabo, bene Isilaeli bakakondwa abuumbi cakwaamba ayi bakoolobesha cakutenkaanya ainshi.

⁶ Bene Filisiti ndibakanyumfwa ciyobeyobe ico bakeepusha ayi, “Ino ciyobeyobe ico ncaanshi mumisumba ya baEbulu?” Ndibakeshiba ayi Libokoshi lya Cipangano lyaletwa mumisumba ya baEbulu,

⁷ bakaloonda akwaamba ayi, “Lesa umwi wesa mumisumba yabo! Ono twamana! Tacina kucitikawo kale ca mushobo uyu!

⁸ Anu ngani weenga watufuna kubalesa bacite nkusu balya? Mbobalesa bakanyonyoola bene Ijipiti muluyanga!

⁹ Amuyumye myoyo nobene Filisiti! Mulwane cisankwa! Kwakubula boobo tutooba basha kubaEbulu bweenka mbobakalinga basha besu. Ee, amulwane cisankwa!”

¹⁰ Bene Filisiti bakalwana cankusu akukoma bene Isilaeli. Baya kumaandaabo kabaya cicica. Kwakafwa bashilumamba baanji abuumbi bashika kushuulu shili makumi one pabaabo bakalinga kulwanina panshi.

¹¹ Libokoshi lya Cipangano ca Mwaami Lesa lyakacatwa, bana bakwe Eli basankwa, Ofini aFineyasi bakacaikwa boonse bobilo.

Lufu lwakwe Eli

¹² Mpomunyaawo umwi musankwa wa mumukowa wakwe Benjameni wakacica kuswa kumusena wakulwaninaawo kuya kuShilo cakushika bushiku bomwi. Wakakwamoona shakufwala shakwe akulibika bulongo pamutwi kutondesha buumba bwakwe.

¹³ Ndyaakashika, wakacana Eli ulishiite pacuuna kufwaafwi anshila kaalindilila. Wakalinga kulisukeme bunene aLibokoshi lya Cipangano. Musankwa uyo wakapukisha makani ngaakaleta mundabala yoonse. Mpeeke boonse bakalila kuboowa.

¹⁴ Eli wakanyumfwa ciyobeyobe akwiipusha ayi, “Ciyobeyobe ico ncaanshi?” Lyalo cakufwambaana musankwa uyo wakaya mukulwiita Eli makani akacitika.

¹⁵ Eli ico ciindi wakalinga waba amyaaka makumi osanwe aone amyaaka yosanwe ayotatwe cakwaamba ayi wakalinga kupofwete.

¹⁶ Musankwa uyo wakaamba ayi, “Ndaloboka kunkondo akucica kwisa kokuno akushika sunu lyeenka.” Eli wakeepusha ayi, “Ino nciinshi cacitika omwanaangu?”

¹⁷ Musankwa uyo wakakumbula ayi, “Bene misheesu bacica kubene Filisiti. Yalinga nkondo iyoosha njebatukomenaamo! Kuteshibo boobo bweenka, bana banu basankwa Ofini aFineyasi bacaikwa alimwi aLibokoshi lya Cipangano ca Mwaami Lesa balicata.”

¹⁸ Musankwa uyo ndyaakaamba shaLibokoshi lya Cipangano ca Mwaami Lesa, Eli wakawa cifuteenuma kuswa pacuuna cakwe kuwita kulubasu lomwi lwa munjililo. Ono mukwiinga wakalinga wacembela abuumbi alimwi keenite, nshingo yakwe yakatyoka. Aboobo wakafwa. Wakalinga mutanjilili muIsilaeli kwamyaaka makumi one.

Muka Fineyasi mbwaakafwa alakwe

¹⁹ Mulokashi wakwe Eli muka Fineyasi, wakalinga pakati alimwi wakalingabo pafwaafwi kupulukaamo. Ndyaakanyumfwa ayi Libokoshi lya Cipangano ca Mwaami Lesa lyacatwa kubalwani alimwi ayi bapongoshi bakwe abeebaye bafwa, lifumo lyakabuka mpomunyaawo wakatumbuka.

²⁰ Ndyaakalinga kuya citula moyo balutundu bakalinga kumutumbusha bakamulwiita ayi, “Yumya moyo! Watumbuka mwaana musankwa!” Sombi taakwe kubikaako amaano alimwi taakwe kukumbulaawo.

²¹ Nakubi boobo wakatumba mwaana ayi Ikabodi, lisansulula ayi, “Bulemu bwakwe Lesa bwaswa pakati ka bene Isilaeli.” Ici cakalinga kukumite kukucatwa kwa Libokoshi lya Cipangano ca Mwaami Lesa, kufwa kwa bapongoshi bakwe basankwa alimwi akwa beebaye.

²² Wakaamba ayi, “Bulemu bwakwe Lesa bwaswa pakati ka bene Isilaeli, mukwiinga Libokoshi lya Cipangano ca Mwaami Lesa lyacatwa.”