1 Samwelo 31 - Baibo Busansulushi Bwa Libuku Ili

Lufu lwakwe Saulo abana bakwe basankwa

¹ Ono bene Filisiti bakalwana bene Isilaeli paKalundu ka Gilubowa, mpeeke bene Isilaeli bakacica. Nakubi boobo baanji bakacaala kabafwite pakalundu ako.

² Bene Filisiti bakaya beensha Saulo abana bakwe basankwa. Bene Filisiti bakacaya Jonasani, Abinadabu alimwi aMalukishuwa bana bakwe Saulo.

³ Lyalo nkondo yakakomenena Saulo kushikila beshimata bakamweensha akumucisa abuumbi.

⁴ Mpomunyaawo Saulo wakaambila shikunyamuna shakulwanisha wakwe ayi, “Kusha mupeeni wako uncaisheeko mukwiinga bantu batapalwitwe aba inga besa mukunsekanya akuncaya.” Sombi cikula bwangu uyo taakwe kucita ubo mukwiinga wakaloonda abuumbi. Mpeeke Saulo wakabwesa mupeeni wakwe mwiine akuwitaawo kawiimfwi.

⁵ Shikunyamuna shakulwanisha uyo ndyaakabona ayi Saulo wafwa, alakwe wakawita pamupeeni wakwe wafwa pantu pomwi anguwe.

⁶ Mboboobo Saulo mbwaakafwa abana bakwe basankwa botatwe pantu pomwi ashikumunyamwita shakulwanisha alimwi abantu bakwe boonse mubushiku ubo bweenka.

⁷ Lyalo bene Isilaeli bakalinga muya cinyika abaabo bakalinga kwitala lya Mulonga wa Joodani ndibakabona ayi bene Isilaeli bacica, abana bakwe Saulo bamana kufwa, bakashiya mandabala abo cisuukila akucica. Mpeeke bene Filisiti bakaya mukwikalaamo.

⁸ Ono bushiku bwakaboolaawo bene Filisiti ndibakaboolela ayi baye basaale shintu sha baabo bakacaikwa, bakacana Saulo abana bakwe basankwa botatwe mbaaba balifwite paKalundu ka Gilubowa.

⁹ Mpeeke bakatimbula mutwi wakwe Saulo akumufuula shakulwanisha shakwe shoonse. Kuswawaawo bakatuma beshinkombe mucishi cine mishaabo coonse ayi baambilishe makani abotu muŋanda ya shibumbwabumbwa shabo akubene mishaabo.

¹⁰ Pesule bakabika shakulwanisha shakwe Saulo muŋanda njebakalinga kulambililaamo Ashitaloti lesa wabo mwanakashi akupopa mubili wakwe kulubumbu lwa ndabala ya Beti Shani.

¹¹ Bantu bene Jabeshi Gilyadi ndibakanyumfwa bene Filisiti mbobakacita Saulo,

¹² basankwa boonse batacite boowa bakanyamuka akweenda mashiku oonse kuya kuBeti Shani. Ndibakashika bakakusha mubili wakwe Saulo amibili ya bana bakwe basankwa kuswa kulubumbu lwa ndabala ya Beti Shani akwiitola kuJabeshi uko nkobakaya mukwiitentela.

¹³ Lyalo bakabwesa mafuwa akwaabika munshaacisamu cakalinga mundabala ya Jabeshi. Mpeeke bakalikasha kulya kwa nshiku shili shosanwe ashobilo.