1 Samwelo 30 - Baibo Busansulushi Bwa Libuku Ili

Defedi mbwaakalwana bene Amaleki

¹ Lyalo ndipakeenda nshiku shobilo Defedi abashilumamba bakwe bakashika kuSikilagi. Ono bakacana bene Amaleki basaala kumalenge lya cishi ca Juda pantu pomwi andabala ya Sikilagi. Bakalwana ndabala iyo akwiitenta.

² Mpeeke bakatola busha banakashi boonse bakalinga mundabala iyo, nkokwaamba ayi banike abamanene. Taaku ngobakacaya, sombi boonse bakayaabo mulweendo lwabo.

³ Defedi abashilumamba bakwe ndibakashika kundabala, bakacana baitenta akutola busha bamakaabo abana babo boonse.

⁴ Mpeeke Defedi abashilumamba bakwe abo bakalila cakooloma kushikila nkusu shakulila shamana.

⁵ Bamakaakwe Defedi boonse abalo bakatolwa busha, nkokwaamba ayi Ayinoamu mwine Jesiliilu aAbigelo mwanakashi wakashiya Nabali mwine Kamelo.

⁶ Defedi wakapenshekwa abuumbi mumoyo mukwiinga bashilumamba bakwe bakalinga kwaamba ayi batoomuuma mabwe. Womwi awomwi pakati kabo wakalinga kukalalite ceebo ca bana bakwe bakatolwa busha. Nakubi boobo Mwaami Lesa, Lesa wakwe wakamuyumyayumya.

⁷ Defedi wakaambila Abiyata mupailishi mwanaakwe Aimeleki ayi, “Ndetele efodi.” Lyalo Abiyata wakeeleta kuli nguwe.

⁸ Mpeeke Defedi wakeepusha Mwaami Lesa ayi, “Sa beshikusaala bacita bobulya mbakonkele? Sa ntoobeensha?” Mwaami Lesa wakakumbula ayi, “Ee, bakonkele, utoobeensha alimwi utoofuna bantu bako.”

⁹ Mpomunyaawo Defedi wakanyamuka akuya abashilumamba bakwe abo bali myaanda yosanwe amwaanda womwi, akushika kuMulonga wa Beso uko bamwi nkobakaya mukucaala.

¹⁰ Sombi Defedi wakeendilila kaaya cibakonkela abashilumamba bali myaanda yone. Bamwi bali myaanda yobilo bakacaala kwisule mukwiinga bakalema. Tebakalinga kucitewo nkusu shakusubuka Mulonga wa Beso.

¹¹ Mpeeke abo bakalinga aDefedi bakacana muntu umwi mwine Ijipiti muluundu akumutola kuli Defedi. Wamupa shinkwa, maanshi akunwa,

¹² caampe ca nkuyu alimwi ashisankanta sha minyansa yakuyanika shobilo. Ndyaakamana kulya, meenso akaboola ekala mukwiinga wakalinga wainsha nshiku shotatwe kutalyaawo shinkwa nabibo kunwaawo maanshi.

¹³ Lyalo Defedi wakamwiipusha ayi, “Ino mwaami wako ngani? Anu waswita kuli?” Muntu uyo wakakumbula ayi, “Nebo ndi mwine Ijipiti, alimwi ndi musebenshi wa mwine Amaleki. Mwaami wangu wakanshiya ceebo ndakaciswa kwanshiku shotatwe shainda ishi.

¹⁴ Twakasaala kulubasu lwakumalenge a cishi ca bene Keleti, acishi ca bene Juda, kubikaawo acishi cakumalenge ca bene Kalebu, ndiswe nkuya mukutenta andabala ya Sikilagi.”

¹⁵ Mpomunyaawo Defedi wakeepusha ayi, “Sa inga wantoola kubete likoto lya bashilumamba ilyo ndiwakalingaalyo?” Alakwe wakakumbula ayi, “Inga ndamutola nkolibete na mwanshomesha cakulumbila muliina lyakwe Lesa ayi teshi muye mukancaaye nabi kumboosha kumwaami wangu.”

¹⁶ Mpeeke muntu uyo wakatola Defedi uko bene Amaleki nkobakalinga, bakabacana balipalangene luundu loonse. Bakalinga kushiite kabalya, kunwa akushana ceebo ca buboni mbobakasaala kuswa mucishi ca bene Filisiti aca bene Juda.

¹⁷ Defedi wakabalwana kuswa kumuyamaca kushikila macolesha a bushiku bwakaboolaawo. Taaku wakacica kulekabo basankwa bacikula bwangu bali myaanda yone bakatanta ngamela.

¹⁸ Ono Defedi wakafuna shoonse isho bene Amaleki nshebakalinga batola kubikaawo abamakaakwe bobilo.

¹⁹ Taaku cakasoweka nabi comwi, cinene nabi ciniini, baana nabi buboni ubo bwakalinga bwatolwa. Shoonse Defedi wakashiboosha.

²⁰ Wakatola mbelele aŋombe isho bantu bakwe nshebalinga kuya cibinga panembo lyabo kabaamba ayi, “Ishi nshakwe Defedi.”

²¹ Mpeeke Defedi wakashika kubashilumamba abo bali myaanda yobilo bakalinga bacaala kuMulonga wa Beso ceebo bakalema bunene. Basankwa bakanyamuka baya mukukumanya Defedi abaabo mbwaakalingaabo. Lyalo Defedi wakabaansha cakukondwa.

²² Ono babiibi myoyo alimwi balisuni pakati ka baabo bakalinga aDefedi bakaamba ayi, “Aba basankwa mbobatakwe kuya aswebo, teshi tubapeewo cintu nabi comwi pabuboni mbotwapilusha. Bamakaabo abana babo inga babwesa.”

²³ Sombi Defedi wakaamba ayi, “Tamweelete kucita boobo nobamakwesu paceeco Mwaami Lesa ncaatupa. Watulama kabotu akwaaba baabo bakesa mukutusaala mumaanseesu ayi tubakoome.

²⁴ Anu ngani ngomutooyeeya inga waanyumfwa aayo ngomutokwaamba? Amubone, shikulama shakulya ashintu shimwi shoonse alimwi ashikuya kunkondo boonse baleelanina mukubaana shintu.”

²⁵ Defedi wakaubika ayi ngumulawo kuswa bushiku ubo kushikila asunu mucishi ca Isilaeli.

²⁶ Lyalo Defedi ndyaakashika kuSikilagi, wakatumya buboni bumwi kubabye, bamaloba ba cishi ca Juda amaswi akwaamba ayi, “Nceeci cipo caswa kububoni mbotwakasaala kubalwani ba Mwaami Lesa.”

²⁷ Wakatumina baabo ba muBetelo, ba muLamoti kulubasu lwa kumalenge a Juda, ba muJatiya,

²⁸ ba muAlowa, ba muSifumoti, ba muEshitemowa,

²⁹ ba muLakalu, ba mumandabala abene Jelamiyelo aabene Keni,

³⁰ ba muOma, ba muBoli Ashani, ba muAtaki,

³¹ ba muEbuloni, akumisena yoonse iyo Defedi abashilumamba bakwe njibakalinga kweendaanaamo.