1 Samwelo 3 - Baibo Busansulushi Bwa Libuku Ili

Mwaami Lesa mbwaakaboneka kuli Samwelo

¹ Muciindi ico mwanike Samwelo ndyaakalinga kusebensela Mwaami Lesa mubutanjilili bakwe Eli, maswi aswa kuli Lesa alimwi shili anga nshiloto shakalinga nshice.

² Bumwi bushiku, mashiku Eli uyo wakalinga kuya cipofola, wakalinga kulete mucipinda cakwe.

³ Samwelo alakwe wakalinga kulete muMusena Usalalite umo mwakalinga Libokoshi lya Cipangano. Kakutana kuba kumuyamaca, lilampi kalicinyaka,

⁴ Mwaami Lesa wakeeta Samwelo. Alakwe wakakumbula ayi, “Nkambo!”

⁵ Lyalo wakacicila kuli Eli akwaamba ayi, “Ndime ngomwalinga kwiita, ndesa.” Sombi Eli wakakumbula ayi, “Nshikwe kukwiita, sobwe. Boolelabo ukoone.”

⁶ Mwaami Lesa wakeeta Samwelo alimwi. Lakwe wakabuka waya kuli Eli akwaamba ayi, “Ndime ngomwalinga kwiita, ndesa.” Sombi Eli wakakumbula ayi, “Omwanaangu nshikwe kukwiita, sobwe. Boolelabo ukoone.”

⁷ Ono mwanike taakwe kwishiba ayi nguMwaami Lesa, ceebo taakwe kunyumfwawo kale liswi lyakwe Lesa.

⁸ Mwaami wakeeta Samwelo lyatatu. Wakabuka waya kuli Eli akwaamba ayi, “Ndime ngomwalinga kwiita, ndesa.” Lyalo Eli wakeshiba ayi nguMwaami Lesa wakalinga kwiita mwanike uyo.

⁹ Mpeeke wakamwaambila ayi, “Boolelabo ukoone. Ono na aite alimwi, waambe ayi, ‘Amwaambe noBaami baLesa, ntoonyumfwa nemusebenshi wanu.’ ” Mpomunyaawo Samwelo wakaboolela waya woona.

¹⁰ Lyalo Mwaami Lesa wakesa weemikana palya akwiita bweenka mbuli pakataanshi ayi, “Samwelo! Samwelo!” Samwelo wakakumbula ayi, “Amwaambe noBaami baLesa, ntoonyumfwa nemusebenshi wanu.”

¹¹ Mpeeke Mwaami Lesa wakaambila Samwelo ayi, “Kutika ndi pafwaafwi kucita cintu cimwi ciyoosha kubantu bene Isilaeli cakwaamba ayi uyo woonse weshi akacinyuumfwe akakankamane.

¹² Pabushiku ubo ndaakucita shoonse nshindakaamba kucita kubamuŋanda yakwe Eli, kuswabo kumatalikilo kushika akumeelelesho.

¹³ Ndakamulwiitawo kale ayi ndaakupa mulandu bamuŋanda yakwe kwamuyayaya ceebo bana bakwe basankwa bakancobola. Eli wakalinga kwishi ayi mbobatoocita ubo, sombi taakwe kubakasha.

¹⁴ Aboobo ndakashomesha cakulumbila kubamuŋanda yakwe Eli ayi taaku mulambu nabi cipo ceshi cikakonshe kumana mulandu wa cibiibi ciyoosha ca mushobo uyu.”

¹⁵ Mpeeke Samwelo wakoona kushikila bwaca. Lyalo wakabuka wacalula shisasa sha Ŋanda ya Mwaami Lesa. Ono wakalinga kuloondete kulwiita Eli shacili anga ciloto ico ncaakabaaco.

¹⁶ Sombi Eli wakamwiita ayi, “Samwelo omwanaangu!” Alakwe wakakumbula ayi, “Nkambo.”

¹⁷ Eli wakeepusha ayi, “Ino Mwaami Lesa wakulwiitanshi? Utashisi. Lesa utookupa mulandu unene na ushise cimwi cili coonse kuli ndime.”

¹⁸ Aboobo Samwelo wakamulwiita shoonse cakutashisaawo nabi paniini. Mpomunyaawo Eli wakaamba ayi, “NgoMwaami Lesa, aacite cili coonse ncaasuni kucita.”

¹⁹ Samwelo wakakula mumaansa akwe Mwaami Lesa uyo wakalengesha ayi coonse cakaamba Samwelo cicitike cancinencine.

²⁰ Mpeeke bantu boonse mucishi ca Isilaeli, kuswa kuDani tibili akuBiyasheba bakeshiba ayi Samwelo ncakwiila ngumulaluki wa Mwaami Lesa.

²¹ Mwaami Lesa wakatolelela kuliyubulula kuShilo uko nkwaakaboneka kuli Samwelo akwaambaakwe. Lyalo coonse cakalinga kwaamba Samwelo, bene Isilaeli bakalinga kunyumfwila.