1 Samwelo 29 - Baibo Busansulushi Bwa Libuku Ili

Bene Filisiti mbobakakaka Defedi

¹ Ono bene Filisiti bakabunganya bashilumamba babo kuAfeki, bene Isilaeli bakalinga kuyakite misumba yabo kufwaafwi akantupu muJesiliilu.

² Mpeeke baami ba bene Filisiti ndibakalinga kuya bweenda mumakoto abantu myaanda, abamwi shuulu, Defedi abashilumamba bakwe bakalinga kwisa mwisule pantu pomwi aAkishi.

³ Lyalo bamatanjilili ba bashilumamba bakeepusha ayi, “Ino baEbulu aba batoocitanshi kuno?” Akishi wakakumbula ayi, “Uyu nguDefedi wacinenenene wakwe Saulo mwaami wa cishi ca Isilaeli. Ndekalaakwe shafula, bulya ngumwaaka wakabumbulu akwiindilila. Ono mbwaakaswitabo kuli Saulo kushikila asunu taaku bubi nebo mboomubwenene.”

⁴ Nakubi boobo bamatanjilili ba bashilumamba ba bene Filisiti bakakalala abuumbi pali Akishi akwaamba ayi, “Amumuboosheemo musankwa uyu, aye kumusena ngomwakamupa. Teelete kuya aswebo kunkondo sobwe. Cimwi ciindi inga watubukila mukwiinga taakuuwo aimwi nshila njeenga wasangalashilamo mwaami wakwe kwiindabo mukucaya bantu besu.

⁵ Sa te ngoDefedi ulya ngobakaanshaawo kabamwiimbila ayi, ‘Saulo wakacaya shuulu ashuulu, Defedi wakacaya makumi amakumi a shuulu.’ ”

⁶ Mpomunyaawo Akishi wakeeta Defedi akumwaambila ayi, “Bweenka mbocibete lushinisho ayi Mwaami Lesa ngumuumi, webo ulashomeka. Nebo taaku bubi mboonkubwenene kuswa bushiku mbowakesa mulubansa lwangu kushikila asunu, sombi bamatanjilili bamwi tabasangalete kuya awebo kunkondo.

⁷ Aboobo uboolelebo muluumuno, utaciti cintu cimwi cili coonse ceshi cibule kusangalasha bamatanjilili bene Filisiti.”

⁸ Defedi wakeepusha Akishi ayi, “Ino ndacita cilubonshi? Ncibiibinshi ncemwabona pali ndime nemusebenshi wanu kuswa bushiku mbondakashika akutalika kumusebensela kushikila asunu, ico ceshi cilengeshe ayi ntayi mukulwana balwani ba mwaami wangu utoondela?”

⁹ Akishi wakakumbula Defedi ayi, “Ee, ndishi kwaamba ayi bweenka butacite kampenda munjelo wakwe Lesa awebo mboobete mumeenso angu. Nakubi boobo bamatanjilili ba bashilumamba ba bene Filisiti baamba ayi tooelete kuya aswebo kunkondo, sobwe.

¹⁰ Ono na patubetubeekobo ufume unooya abasebenshi ba mwaami boonse mbowakesaabo.”

¹¹ Ndibwakaca Defedi wakafuma abashilumamba bakwe kuboolela kucishi ca bene Filisiti. Balo bene Filisiti bakaya kuJesiliilu.