1 Samwelo 28 - Baibo Busansulushi Bwa Libuku Ili

¹ Ono munshiku isho bene Filisiti bakabunganya bashilumamba boonse ayi bakalwane bene Isilaeli. Mpeeke Akishi wakaambila Defedi ayi, “Ono nyumfwa, webo abantu bako bulya mutooya mukacafweeko bashilumamba bangu kunkondo.”

² Defedi wakaambila Akishi ayi, “Ncilibo kabotu, mulaakubona nceshi nkacite nemusebenshi wanu.” Lyalo Akishi wakakumbula ayi, “Cabota, ndaakukulengela kuba shikunindilila wa lyoonse.”

Saulo mbwaakaya kumwanakashi shikwaamba amishimu

³ Ono paciindi ico Samwelo wakalinga kufwite. Ndyaakafwa, bene Isilaeli boonse bakamulila akumubika muLama, ndabala ine mishaabo. Ico ciindi Saulo, beshikusonda abeshikwaamba amishimu kaali wakabatandaamo kale mucishi cakwe.

⁴ Mpeeke bene Filisiti ndibakamana kulibungabunga bakaya bayaka misumba yabo kuShunemu. Alakwe Saulo wakabunganya bene Isilaeli boonse akuyaka misumba kuGilubowa.

⁵ Mpeeke Saulo ndyaakabona bashilumamba ba bene Filisiti, wakaloonda abuumbi akututuma.

⁶ Saulo ndyaakeepusha kuMwaami Lesa cakucita, Mwaami Lesa taakwe kumukumbulaawo muciloto, mucisolo cakwe Ulimu aTumimu nabi mubalaluki.

⁷ Mpomunyaawo Saulo wakaambila bacinenenene bakwe ayi, “Amunyandweeteko mwanakashi waamba amishimu kwaamba ayi njeeko mukusonda.” Mpeeke bacinenenene bakwe abo bakakumbula ayi, “Nkwaali kundabala ya Endo.”

⁸ Kuswawaawo Saulo wakalilubyalubya mukufwala shakufwala shiimbi. Lyalo ingayi pashiye wakanyamuka abacinenenene bakwe bobilo kuya kumwanakashi uyo. Mpeeke wamwaambila ayi, “Njipushileeko kumishimu bunene bunene wooyo ngweshi ŋambe liina.”

⁹ Mwanakashi wakamukumbula ayi, “Mwebo mulishi mwaami Saulo ncaakacita, mbuli mbwaakasukumya beshikusonda abaabo baamba amishimu. Ono nceebonshi mutooyanda kumbikila koose kwaamba ayi muncaishe?”

¹⁰ Sombi Saulo wakashomesha cakulumbila muliina lya Mwaami Lesa ayi, “Bweenka mbocibete lushinisho ayi Mwaami Lesa ngumuumi, webo teshi ukapekwe mulandu ceebo ca cikani ici.”

¹¹ Mpomunyaawo mwanakashi wakeepusha ayi, “Ino ngani ngomusuni ayi mwiitile?” Saulo wakakumbula ayi, “Njitile Samwelo.”

¹² Mwanakashi uyo ndyaakabona Samwelo, wakoolobesha kuli Saulo ayi, “Ono mwambecelanshi? Ndimwe baSaulo!”

¹³ Lyalo Saulo wakamwaambila ayi, “Utaloondi, ino wabonanshi?” Mwanakashi ulya wakaamba ayi, “Ndabona mushimu utooswa panshi.”

¹⁴ Saulo wakeepusha mwanakashi uyo ayi, “Utooboneka buyani?” Lakwe wakaamba ayi, “Ngumusankwa mucembele ufwete mungaanjo.” Mpomunyaawo Saulo wakeshiba ayi nguSamwelo, mpeeke wakafukama cakushisha ciwa panshi mukumulemeka.

¹⁵ Lyalo Samwelo wakeepusha Saulo ayi, “Ino wanyonganishilanshi mukumbusha?” Saulo wakakumbula ayi, “Ndi mumapensho anene abuumbi. Bene Filisiti batooyanda kundwana alakwe Lesa taabete anebo mukwiinga taatoonkumbulaawo kwiinda mubalaluki nabi mushiloto. Nceceeco ncendamwiitila kwaamba ayi mundwiite cakucita.”

¹⁶ Samwelo wakaamba ayi, “Ino utoonjipushishanshi oobwene ayi Mwaami Lesa taabete awebo alimwi waba mulwani wako?

¹⁷ Mwaami Lesa wacita kuli ndiwe bweenka mbwaakakwaambila kwiinda muli ndime. Wakunyaya bwaami akubupa shikamukobonyoko, Defedi.

¹⁸ Mukwiinga tookwe kunyumfwila nshaakaamba mukutacaya bene Amaleki boonse ashintu shabo shoonse. Nceceeci Mwaami Lesa ncaacitila bobulya sunu.

¹⁹ Kwiilika waawo Mwaami Lesa ulaakwaaba Isilaeli alimwi andiwe mumaansa a bene Filisiti. Nkokwaamba ayi ciilo webo abana bako basankwa nkwisa kokuno nkoombete. Mwaami Lesa ulaakwaaba abashilumamba bene Isilaeli kubene Filisiti.”

²⁰ Mpomunyaawo Saulo wakawa mushinga, kaamanite kuboowa ceebo ca maswi akaamba Samwelo. Wakalinga kufwite aluwisu ceebo mashiku amalumwi akaindabo akaya mulomo.

²¹ Mwanakashi uyo ndyaakesa pakalinga Saulo akubona ayi waloonda abuumbi, wakamwaambila ayi, “Amubone nebo nemusebenshi wanu ndamunyumfwila. Ndanyamuna buumi bwangu mumaansa akucita kweelana ambomwaamba.

²² Paceebo ceeco ndaseenga ayi amwebo amunkutike nemusebenshi wanu. Amunsuminishe mubambilewo cakulya kwaamba ayi mube ankusu mwanooya mulweendo lwanu.”

²³ Sombi Saulo wakakaka akwaamba ayi, “Teshi ndyeewo.” Sombi bacinenenene bakwe abo pantu pomwi amwanakashi bakamusengesha cankusu ayi alye. Mpeeke wakanyumfwa nshebakalinga kwaamba, lyalo wakanyamukaawo panshi apo akwikala pabulo.

²⁴ Mwanakashi uyo wakalinga kucite moombe wiinite abuumbi uyo ngwaakacaya peenka apo. Wakabwesa afulaulo, waukanda akupanga cimaande.

²⁵ Ndyaakamanisha wakashitulila Saulo abacinenenene bakwe, lyalo bakalya. Mpeeke bakanyamuka akuya mashiku ayo ngomunya.