1 Samwelo 27 - Baibo Busansulushi Bwa Libuku Ili

Defedi mbwaakekala abene Filisiti

¹ Ono Defedi wakalyaamboosha mumoyo wakwe ayi, “Bumwi bushiku Saulo ulaakuncaya, taaku ceenda kubota kwiinda kulobokela kucishi ca bene Filisiti. Lyalo Saulo cilaakumulensha butolo kunyandoola kuli koonse mucishi ca Isilaeli. Munshila iyi ndaakufuna buumi bwangu.”

² Mpeeke Defedi wakanyamuka abashilumamba bakwe abo bakalinga myaanda yosanwe amwaanda womwi akuya kuli Akishi mwanaakwe Maoki mwaami wa cishi ca Gati.

³ Defedi abashilumamba bakwe abo bakekala aAkishi muGati. Womwi awomwi pakati kabo wakalinga abamuŋanda yakwe, alakwe Defedi wakalinga abakaakwe boonse bobilo, nkokwaamba ayi Ayinoamu mwine Jesiliilu alimwi aAbigelo mwine Kamelo mwanakashi wakashiya Nabali.

⁴ Saulo ndyaakalwiitwa ayi Defedi walobokela kuGati, wakacilekelabo limwi kumulangoola.

⁵ Mpeeke Defedi wakaambila Akishi ayi, “Na ncakwiila muli beensuma, amumpeewo ndabala yomwi paayo ali mumishi njeshi nookalaamo. Nsheelete kunookala momuno amwebo mundabala inene ya bwaami nemusebenshi wanu.”

⁶ Mpomunyaawo pabushiku ubo Akishi wakamupa ndabala ya Sikilagi. Kuswawaawo ndabala iyo yakalingabo nja bamaami ba cishi ca Juda.

⁷ Mucishi ca bene Filisiti ico, Defedi wakekalaamo mwaaka amyeenshi yone.

⁸ Muciindi ico Defedi abantu bakwe bakalinga kuya mukusaala shintu sha bene Geshuli, bene Gesi alimwi abene Amaleki. Bantu abo kalekale mbobakalinga kwikala mucishi ico kuya mukushikabo akuSheli mucishi ca Ijipiti.

⁹ Kumusena uli woonse Defedi ngweenga waya mukulwana taakalinga kushiya musankwa nabi mwanakashi kutamucaya, sombi wakalinga kubwesa mbelele, ŋombe, mbongolo alimwi ngamela pantu pomwi ashakufwala. Lyalo wakalinga kuboolela kuli Akishi.

¹⁰ Mpeeke Akishi na weepusha ayi, “Ino sunu mwalingila kuli mukusaala?” Defedi wakalinga kwaamba ayi, “Twalingila kulubasu lwa kumalenge a cishi ca Juda, na ayi kucishi ca bene Jalamilu nabi ayi kucishi ca bene Keni.”

¹¹ Defedi taakalinga kushiya musankwa nabi mwanakashi kutamucaya kwaamba ayi kubule uya kuGati mukwaamba nshaakalinga kucita abashilumamba bakwe. Ciindi coonse ncaakalinga kushiite mucishi ca bene Filisiti mbwaakalinga kucita bweenka ubo.

¹² Sombi Akishi wakalinga kushoma Defedi kaayeeya ayi, “Walipatisha abuumbi kubene Isilaelinyina, aboobo unanoolibo musebenshi wangu lyoonse.”