1 Samwelo 26 - Baibo Busansulushi Bwa Libuku Ili

Defedi mbwaakalekelela Saulo alimwi kutamucaya

¹ Ono bene Sifu bamwi bakaya kuli Saulo kuGibiya akuluula ayi, “Defedi uliyubite pakalundu ka Akila pafwaafwi akuJeshimoni.”

² Mpomunyaawo Saulo wakanyamuka abashilumamba bali shuulu shotatwe bene Isilaeli bakusaloola ayi bakalangoole Defedi kuluyanga lwa Sifu.

³ Mpeeke Saulo wakayaka misumba pafwaafwi anshila ya paKalundu ka Akila pafwaafwi akuJeshimoni, sombi Defedi wakalinga kunoocilibo muluyanga. Ono Defedi ndyaakanyumfwa ayi Saulo wamukonkela uko,

⁴ wakatuma beshikusensa abo bakashinisha ayi ncakwiila wakapola.

⁵ Kuswawaawo Defedi wakanyamuka akuya kumisumba yakwe Saulo. Wakabona musena apo pakoona Saulo alimwi aAbina mwanaakwe Neli, uyo wakalinga mutanjilili wa bashilumamba. Saulo wakalinga kulete mumusumba wakalinga pakati ka misumba ya bashilumamba.

⁶ Mpomunyaawo Defedi wakeepusha Ayimeleki mwine Iti aAbishayi mwanaakwe Seluiya, mukwabo Joabu ayi, “Ngani eshi aye anebo mumisumba pali Saulo?” Abishayi wakakumbula ayi, “Ntooyaanu nebo.”

⁷ Mpeeke mashiku Defedi aAbishayi bakaya mumisumba yakwe Saulo akucana Saulo ngooyu ulilete cakufwa, lisumo lyakwe kalishimpikitwe kufwaafwi amutwi wakwe. Abina abashilumamba bamwi bakalinga kulete kabashingulukite Saulo.

⁸ Lyalo Abishayi wakaambila Defedi ayi, “Sunu Mwaami Lesa waaba mulwani wanu mumaansaanu. Amunsuminishe mutungile kuntu komwi anshi alisumo palinkanda lyomwibo, teshi mbooshemo lyobilo.”

⁹ Defedi wakaambila Abishayi ayi, “Utamucaayi! Taakuuwo weenga wacisa mwaami wakasalwa aMwaami Lesa kwiinda mukunanikwa weenga wabula kuba amulandu.”

¹⁰ Mpeeke wakaamba ayi, “Ncakwiila bweenka mbocibete lushinisho ayi Mwaami Lesa ngumuumi, Mwaami Lesa mwiine ulaakumutondesha bukali. Bumwi bushiku ciindi cakwe cakufwa lufu ŋanda cilaakushikila nabi ulaakuya mukufwita kunkondo.

¹¹ Nebo nshikwe, Mwaami Lesa atansuminishi kucaya mwaami ngwaakasala kwiinda mukunanikwa mafuta. Bwesabo lisumo akankuli kakwe ka maanshi pafwaafwi amutwi wakwe, mpeeke tunooya.”

¹² Aboobo Defedi wakabwesa lisumo alimwi akankuli ka maanshi pafwaafwi amutwi wakwe Saulo, lyalo bakaya. Taaku wakabona nabi kwishiba cakacitika alimwi taaku nabi womwi wakapapuka. Boonse bakalinga kulete mukwiinga Mwaami Lesa wakabalengesha ayi boone cakufwa.

¹³ Kuswawaawo Defedi wakeenda kulubasu lumwi lwa cinyika akwiimikana kantalamukila peculu lya kalundu kamwi. Pakalingabo musena unene pakati kabo.

¹⁴ Mpeeke wakoolobesha kubashilumamba akuli Abina mwanaakwe Neli ayi, “Sa teshi unkumbule Abina?” Abina wakakumbula ayi, “Anu ndiwe ni ootokoolobesha kumwaami?”

¹⁵ Defedi wakaamba ayi, “Abina te ndiwebo ngobashoma muIsilaeli? Ono waalilwa buyani kulama ukulela, mwaami wako? Muntu umwi walingaako coonoonobo uko kwisa mukucaya ukulela uyo?

¹⁶ Ici ncewacita tacikwe kubotaawo napaceyi. Ncakwiila bweenka mbocili lushinisho kwaamba ayi Mwaami Lesa ngumuumi, webo abashilumamba bako mulyeelete kufwa, mukwiinga tamutoolindilila mwaami wanu, uyo wakasalwa aMwaami Lesa kwiinda mukunanikwa mafuta. Ono bulya inga wandwiita ayi lisumo lya mwaami akankuli ka maanshi isho shalingabo pafwaafwi amutwi wakwe shili kuli?”

¹⁷ Mpomunyaawo Saulo wakalishiba liswi lyakwe Defedi akwiipusha ayi, “Sa ncakwiila ndiswi lyako ilyo Defedi omwanaangu?” Defedi wakakumbula ayi, “Ee, ndendilyo nkambo nobaami bangu.”

¹⁸ Mpeeke wakatolelela akwaamba ayi, “Anu nceebonshi nkambo ncemutooya cimfwimina nemusebenshi wanu? Nciinshi ncindakacita alimwi ngumulandunshi ngooncite?

¹⁹ Ono nkambo nobaami bangu amukutike makani angu nemusebenshi wanu. Na nguMwaami Lesa walengesha ayi mumbukile, aatambule mulambu. Sombi na mbantu, Mwaami Lesa aabashingane! Mukwiinga bantanda kuswa mucishi ca Mwaami Lesa akundekela mumusena mweenga ndalambilabo balesa beensu.

²⁰ Ono kutandeka ayi mfwite mumusena uli kulaale akubete Mwaami Lesa. Ino nceebonshi mwaami wa cishi ca Isilaeli utoosa ciyandoola ndime nenjina, anga ngumuntu utooya cifwima bakancele mutulundu.”

²¹ Mpomunyaawo Saulo wakaamba ayi, “Ndabiisha. Boola Defedi omwanaangu. Teshi nkakuyeeyelewo kukucisa alimwi, mukwiinga walinga kweelete kuncaya mashiku ainda, sombi wandekelela. Ncakwiila ndacita mbuli muntu muluya alimwi ndalubya abuumbi.”

²² Mpeeke Defedi wakakumbula ayi, “Ndino lisumo lyanu nobaami, amutume musankwa womwi ese aliloonde.

²³ Mwaami Lesa ulalambula muntu kweelana abululami bwakwe alimwi akushomeka kwakwe. Mwaami Lesa walinga wamwaaba mumaansaangu ayi mucaaye. Ono ndaloonda kucisa mwaami uyo Mwaami Lesa ngwaakasala kwiinda mukunanikwa mafuta.

²⁴ Ono bweenka mbondamulekelela kutamucaya, mbweeke ubo Mwaami Lesa afune buumi bwangu akunkusha mumapensho oonse.”

²⁵ Lyalo Saulo wakaambila Defedi ayi, “Mwaami Lesa akupe coolwe Defedi omwanaangu. Ulaakunoocita shintu shikankamika alimwi ulaakunooswitilila.” Mpeeke Defedi wakalanga kwaakwe, lakwe Saulo wakaya kumushi.