1 Samwelo 25 - Baibo Busansulushi Bwa Libuku Ili

Samwelo mbwaakafwa

¹ Ono Samwelo wakafwa, mpeeke bene Isilaeli boonse bakabungana ayi bamuliile akumubika kumishaabo kuLama. Mpomunyaawo Defedi wakasena muluyanga lwa Palani.

Defedi aAbigelo

² Ono muMaoni uko, mwakalinga musankwa wakalinga kucite bukwebo mundabala ya Kamelo. Musankwa uyo wakalinga kubilite abuumbi. Wakalinga kucite mpongo shili cuulu alimwi ambelele shili shuulu shotatwe isho nshaakalinga kucesesha booya muKamelo.

³ Musankwa uyo wakalinga kwiitwa ayi Nabali, wa mucipani cakwe Kalebu. Mukaakwe wakalinga kwiitwa ayi Abigelo. Mwanakashi uyo wakalinga musongo alimwi mubotu ciwa, sombi musankwa wakalinga muunyu alimwi ucenena.

⁴ Ono Defedi ndyaakalinga muluyanga uko wakanyumfwa ayi, Nabali utoocesesha booya mbelele.

⁵ Mpeeke wakatuma basankwa bacikula bwangu bali likumi akubaambila ayi, “Kamuya kuli Nabali kuKamelo, mukaŋashisheeko.

⁶ Mumwaanshe ayi, ‘Luumuno lube awebo, bamuŋanda yako alimwi asheesho shoonse shaambwa ayi nshaako!’

⁷ Mumulwiite ayi ndakanyumfwa ayi utoocesesha mbelele shako. Ono ndisuni kukushibisha ayi beembeshi bako twakalingaabo alimwi tatukwe kubacisaawo napaceyi. Ciindi ndibakalinga aswebo kuKamelo, taaku caabo ncitwakeepa nabi comwi.

⁸ Ipusha basebenshi bako, balakulwiita. Ono bulya mbotwesa ciindi ndyekuli kusekelela twaseenga mututambule kabotu akutupaawo cili coonse nceenga kamucite sobasebenshi banu pantu pomwi aDefedi mweenshinyinaanu.”

⁹ Basankwa bakwe Defedi ndibakashika, nkombe iyo yakaswa kuli Defedi bakeeshisha kuli Nabali. Mpeeke bakalindila.

¹⁰ Nabali wakakumbula basebenshi bakwe Defedi ayi, “Anu Defedi uyo ngani? Mwanaakwe Jese ngomutokwaamba ngani anu? Shinoonshiku mbaanji basebenshi batokwaalookila bamaami babo.

¹¹ Sa inga ndabwesa cakulya cangu anyama yangu iyo njindacaila beshikucesa akupa bantu mbooteshi ankobaswita?”

¹² Aboobo basankwa bakwe Defedi bakaboolela akuya mukumwaambila makani oonse akaamba Nabali.

¹³ Lyalo Defedi wakaambila bantu bakwe ayi, “Muntu amuntu aabwese mupeeni wakwe.” Mpomunyaawo boonse bakasomeka mipeeni yabo mumakome. Defedi alakwe wakasomeka mupeeni wakwe banyamuka akuya. Basankwa mbwaakalingaabo bakalinga mpashi myaanda yone, bakacaala kabalama shintu bakalinga myaanda yobilo.

¹⁴ Ono musebenshi womwi wakaambila Abigelo ayi, “Amubone, Defedi wakatuma bantu kuswa muluyanga ayi bese baanshe mwaami wesu, sombi mwaami wesu wakabacobola.

¹⁵ Nakubi boobo bantu abo bakatulama kabotu, tabakwe kutupenshaawo alimwi tatukwe kusowekelwaawo cintu nabi comwi, ciindi ncetwakalinga malaala muluundu.

¹⁶ Mashiku amalumwi bakalinga kutulama kwaciindi coonse ncitwakalingaabo katweembela mbelele.

¹⁷ Bulya ndaamba ayi mwishibe cikani ico akwaamba ayi muyeeye mbomweelete kucita, mukwiinga pamwaami wesu abamuŋanda yakwe boonse inga pacitika cilensha boowa. Cibiibi ncakwaamba ayi mwaami wesu ngushicimpamya alimwi taalwiitikwa.”

¹⁸ Mpomunyaawo Abigelo wakafwambaana wabwesa shinkwa uli myaanda yobilo, nkomwe sha shipaya sha waini shobilo, nyama yakayokelwa limwi ya mbelele shosanwe, makilogilamu ali 17 a ciwaya, shisankata sha minyansa yakuyanika shili mwaanda, ashaampe sha nkuyu shakuyanika shili myaanda yobilo akushibika pambongolo.

¹⁹ Lyalo wakaambila basebenshi bakwe ayi, “Amutanjile kunembo anebo nanoosa pesule lyanu.” Sombi Nabali ibaye taakwe kumulwiitaawo.

²⁰ Mpeeke ndyaakalinga kuya pambongolo yakwe. Ono cilya ncaakaamba ayi apetuluke kufwaafwi akalundu, nkukumana aDefedi alimwi abashilumamba bakwe batookunkuluka kalundu ako batoosa kuli nguwe.

²¹ Paciindi ico Defedi ndyaakamanabo kuyeeya ayi, “Anu ndakanyonyoolabo ciindi cangu kulama buboni bwa muntu ulya kwaamba ayi kubule cisoweka muluyanga mulya. Ono ngooyu pabubotu mbondakacita lakwe waboosha bubi.

²² Paceebo ceeci Lesa aakampe mulandu na nkashiye musankwa nabibo womwi kutamucaya ciilo macuunsacuunsa pabamuŋanda yakwe.”

²³ Abigelo ndyaakabonabo Defedi, wakaseluka pambongolo yakwe wafukamina Defedi cakushisha ciwa panshi.

²⁴ Mpeeke kaafukeme kunembo lyakwe akwaamba ayi, “Nobaami bangu, mulandu amupe ndime neenka. Ndaseenga kwaamba ayi nemusebenshi wanu munsuminishe kubandikaanu alimwi munkutike.

²⁵ Nobaami bangu mutabikili mfundilishi ibaangu ulya mubiibi moyo mukwiinga bweenka bubete liina lyakwe alakwe mbwaabete, ee liina lyakwe nguNabali, lisansulula ayi muluya! Nebo nshindakalingaawo basebenshi banu ndibakashika.

²⁶ Ono ceebo cakwaamba ayi nobaami bangu Mwaami Lesa wamulengesha ayi mutabooshi cishole akutaba amulandu wakucaya muntu, ndalumbila ayi bweenka mbocibete lushinisho ayi Mwaami Lesa ngumuumi alimwi amwebo mbomuli boomi, boonse batoopinga kumucisa bakapekwe mulandu mbweenka mbuli Nabali ibaangu.

²⁷ Ono ndaseenga kwaamba ayi shipo ishi nemusebenshi wanu nshindaletela ndimwe, nobaami bangu, shipekwe kubashilumamba mbomuli abo.

²⁸ Ndaseenga mundekelele cilubo ncindacita nemusebenshi wanu. Ncakwiila Mwaami Lesa ulaakulengesha bwaami kuba pali ndimwe abamulunyungu lwanu mukwiinga mutoolwana nkondo sha Mwaami Lesa. Aboobo akubule kubisha kwishi kucanike muli ndimwe kulilabo kamucili boomi

²⁹ Nakubi kwaamba ayi kuli utoosa cimukonkela ayi amucaaye, buumi bwanu bulaakulamwa kabotu aMwaami Lesa bweenka muntu mbwaalama cintu camakwebo. Sombi buumi bwa balwani banu ulaakubuwaala kulaale mbweeke buwaalwa libwe kucipaya cakuwaalisha mabwe.

³⁰ Lyalo Mwaami Lesa aakucita shoonse nshaakashomesha akumubika pabwaami,

³¹ teshi mukoongumane nkambo ceebo ca mulandu wakucaya muntu pataapu aciliiwo, nabi ceebo cakuboosha cishole mwebo nobeene. Ono nkambo, Mwaami Lesa aakumucitila shibotu shoonse nshaakashomesha, mukanjeeye nemusebenshi wanu.”

³² Mpomunyaawo Defedi wakaambila Abigelo ayi, “Aalumbwe Mwaami Lesa, Lesa wa bene Isilaeli uyo walengesha ayi tubonane sunu.

³³ Ube acoolwe ceebo ca nkuta ya mumoyo wako ibotu, kunciba kwaamba ayi ntabi amulandu wakucaya muntu sunu, akwaamba ayi nebo nemwiine ntabooshi cishole.

³⁴ Sombi ndalumbila Mwaami Lesa, Lesa wa bene Isilaeli wanciba ayi ntabi amulandu wakutila bulowa, ayi bweenka mbocibete lushinisho ayi ngumuumi, nootakwe kufwambaana kuncinsha, taaku mwanaakwe Nabali musankwa wakalinga kweelete kunoociliiwo kushika ciilo macuunsa.”

³⁵ Lyalo Defedi watambula shintu isho shakaleta Abigelo kuli nguwe akumulwiita ayi, “Koya muluumuno, ndanyuumfwa maswi ako akusumina kusenga kwako.”

³⁶ Mpeeke Abigelo ndyaakashika kuli Nabali wakacana ulicite kusekelela uko kwakalingabo anga nkwa mwaami. Wakalinga kusamitwe alimwi kaakoletwe abuumbi. Aboobo Abigelo taaku ncaakamulwiita kushikila ndibwakaca.

³⁷ Ndibwakaca macuunsa, Nabali ndyaakakololokwa, Abigelo mukaakwe wakamwaambila makani oonse ayo. Mpeeke wakafwa citu akuyumabo nta anga ndibwe.

³⁸ Kuswawaawo pakeendabo nshiku likumi Mwaami Lesa wakatondesha Nabali bukali, mpeeke wakafwa.

³⁹ Lyalo Defedi ndyaakanyumfwa ayi Nabali wakafwa, wakaamba ayi, “Aalumbwe Mwaami Lesa uyo waboosha cishole kuli Nabali ceebo cakutananga kabotu. Wanciba nebo nemusebenshi wakwe ayi ntaciti cibiibi akubooshela Nabali cibiibi cakwe.” Mpeeke Defedi wakatuma basankwa bakwe ayi bamwiipushisheko kuli Abigelo shakweeba.

⁴⁰ Basebenshi bakwe bakaya kuKamelo akwaambila Abigelo ayi, “Defedi watutuma ayi tukutoole kuli nguwe, uye ube mukaakwe.”

⁴¹ Mpomunyaawo Abigelo wakafukama cakushisha ciwa panshi akwaamba ayi, “Nebo nemusebenshi wanu ndilibambite nabi kusansha shimpanta sha basebenshi ba mwaami wangu.”

⁴² Cakufwambaana Abigelo wakanyamuka akutanta mbongolo, wakaya abasebenshi bakwe banakashi bali bosanwe. Mpeeke Abigelo wakaya abasebenshi bakwe Defedi ayi akeebwe kuli nguwe.

⁴³ Defedi wakalinga kweebete kale Ayinoamu wa kuJesiliilu. Lyalo boonse bobilo bakaba bamakaakwe.

⁴⁴ Ciindi ico Saulo kaali weebesha kale Mikali muka Defedi kuli Paliti mwanaakwe Laishi musankwa, mwine Galimu.